3
1 Cɔ, bii dɛ́bɛ́kɛ́tɔki phiphia á bondeaga, kanga á digimisa á nyɔngɔ anu, béogea ande anja bíikɛ na Atɛ́nɛ sasa asu, 2 béonótekisia Timɔtɛ́ɔ k'aphe á gbagisa anu ka měma na phɛa anu gea te, bɔ́mɔtisɛ ka beekea a Mokonga. Yɛ ande dhasu mbhɛdanigi ékuma ndea Mokonga. A phɔtɔ ɔɛmbisa Nyɔngɔ Anja ndea Kiísito.3 Timɔtɛ́ɔ ǎnoambi gea te, ka benu kadeketɛmbɛ beekea á Mokonga ka nyɔngɔ á bakpa tambisaga akɛ. Bo gǎkɛ uubha gea, tambisaga ndɔ a tɔ moangɔ ndea Mokonga ka besu. 4 Débenóngodi nyɔngɔ á tambaga mosa, bii débetú mɔtɛnu, tambaga ndɔ nakánodhondimbɛ. Bii ǎnodhondi ye gǎkɛ, bo yetɔ uubha. 5 Ka bondɔ unge, bii dɛ́kɛ́tɔki phiphia á bondeaga, kanga á digimisa á beekea nɛnu, dénotekisii Timɔtɛ́ɔ. Nga, débangi gea, Ndhemigi kǎnotombɛgɛ mɔnɔ, mmbe ekuma nɛsu mɔtɛnu akuande etiti.
6 Kɛkɛ nde gǎkɛ, Timɔtɛ́ɔ ǎsodhondi bii atoki mɔtɛnu. Asɔtɔ̌migi nyɔngɔ anja, ndea kondana anu na bii bo phɔ́tɔ ombeekea Kiísito. Bo phɔtɔ ǒsokanisia esa bhui na měma anja. Bóokonda dhondana na besu, sumbii be phɔtɔ okonda dhondana na benu.
7 Cɔ, baya, bii Timɔtɛ́ɔ ǎsɔtɔ̌migi bó, měma asu aphɔngi, nanga bii débetambigi phɛ̂. Eya, beekea nɛnu amame akpɛ. 8 Be yetɔ na bukpɛkpɛ bii bɛɔki gea, bo kimoti na Mɔkɔta ka měma. 9 Eya, betumi na maseye ka nyɔngɔ anu, bɛ́kɛ́ɔtɔka nebedeketi sega á Mokonga. 10 Keiphe n'esa, beondengemisaga Mokonga gea, bégɛ bɛ́nɔɔnɛ goto, bɛ́gɔbɛɛ tɔ̌miaga anu, nyɔngɔ bhui á beekea a Kiísito.
ěmɛmi: Bátumɛ n'ekondani ngungu abɔ
11 Cɔ, ɛmɛmi nɛsu ande gea, Abhasu Mokonga na Mɔkɔta nɛsu Yéso Kiísito, ásokodeɛ aphe á dhondana asu na benu. 12 Mɔkɔta ánotumisɛ phɔtɔ n'ekondi ka bakpa bea mboso natumi n'ibo, áoduukanaga. Mpɔ, ekondi nɛnu áokengeana nindesu ka benu. 13 Mɔkɔta ǎnophi ekondi ndɔ, ka mɔtisaga á měma anu gea te, bóbɛ na měma anja phɛ̂, kanga á kisɛki, mosa á Abhasu Mokonga. Abaeka tɔ bó, k'esa ndɔ Mɔkɔta nɛsu Yéso Kiísito abhikaeka kimoti na bamɛna-bonjánja nɛkɛ.