1 Batɛsalɔníka 2

Ekuma ndea Pɔ́lɔ na badhakɛ bateki, mɔtɛ a baTɛsalɔníka

1 Baya, buubhi gea, bhika asu mɔtɛnu dákátú etiti. 2 Buubhi phɔtɔ gea, mosa á kidia asu mɔtɛnu, dábasótambisigi phɔ na bhóma asu ka Philípɔ. Mɔtɛnu phɔtɔ, Mokonga dásophi bukpɛkpɛ á phɛa á Nyɔngɔ Anja nɛkɛ. Débegi bo, nanga bii dábasôye. 3 Bɔphɛi nɛsu gǎkɛ, nna na mbɛa, nna na maibhe, nna n'odhemayɔ. 4 Be ndiu ɔphɛa bíndɔ Mokonga akondi. Nga, dásɔɔphani, áosópha Nyɔngɔ Anja nɛkɛ. Béké phɔtɔ okaba ékondisaga na bakpa, be ndiu okondisaga na Mokonga, mmbe aodigimisa měma asu.

5 Buubhi phɔtɔ, békéǒbhebha bakpa jǎi ka nyɔngɔ ékondisaga na bɔ, béké phɔtɔ okaba bangɔa ka nyɔngɔ á bɔphɛi nɛsu. Mokonga a ámbé ande mmamei. 6 Béké phɔtɔ okaba obhebhɔ ka bakpa, kabɛ ka benu, kabɛ ka bakpa buangbo.

7 Nanga bii débetú na bukpɛkpɛ édokomisa mɔtɛnu bea bateki ndea Kiísito, bê ndiu oba na měma aphɔngɔ. Débetú bea baama-niki, bunde báotambea nyɔngɔ á banabɔ. 8 Nga, débetú na siki anu phɛ̂. Ka bondɔ unge, dɛ́bɛnɔ́tɔ̌migi Nyɔngɔ Anja ndea Mokonga. Nna tɔndɔ nndɔ, bê phɔtɔ oba na mɔphɛ á kuia anu. Eya, débenókondi phɛ̂.

9 Baya, bûubha bii dɛ́bɛɔbhɛdanaga akpɛ phɛ̂ mɔtɛnu, keiphe n'esa, gea te, békenódokomanaeɛ mɔnɔ, mbenɔ nde dɛ́bɛɔ́nɔtɔmiaga Nyɔngɔ Anja ndea Mokonga. 10 Bonde bamamei nɛsu, na Mokonga phɔtɔ, bii tambea asu mosa anu benu babeeki, dátú anja, kanga á bojede, na kanga á kisɛki.

11 Bo phɔtɔ uubha bii débetú bea baabha-niki ka benu bɔbhu. 12 Nga débenógbagisi měma anu, na phɔngisa anu, na phɛa anu gea, bótambeɛ bíndɔ ambɔngɛi Mokonga. Yɛ a ámbé ǎnɔɔphani gea, bóbɛ batɔa ka koboamɛ á boombia nɛkɛ.

13 Be phɔtɔ onsega Mokonga esa bhui, ka nyɔngɔ nde, bii dɛ́bɛnɔ́tɔ̌migi Nyɔngɔ Anja ndea Mokonga, bɔ́ɔɔka, bóobeekea gea: «Ande nyɔngɔ á Mokonga. Nna nyɔngɔ á kokpa.» Cɔ, ande doni anu. Nga, nyɔngɔ á Mokonga angi ka mɛngɛ anu, benu babeeki.

Tambisaga á baTɛsalɔníka, a tɔ kimoti ninde á baKiísito buangbo

14 Baya, bokengeani tɔ na batɔa ka kanisa ndea Mokonga, á ka Yudhɛ́a, bunde bámbeeki Kiísito. Nga, batɔa k'ekuna nɛnu bánotambisigi bíndɔ baYúdha dábětambisigi baKiísito baYúdha. 15 Ai! baYúdha dáběme baɔtu-nyɔngɔ, bâ phɔtɔ omoa Mɔkɔta Yéso. Mpɔ, báosótambisaga, besu bateki. Bakpa ndɔ bámbɛisi Mokonga, báoba babibia á bakpa bɔbhu. 16 Báokaba imisia asu geae, bɛ́kɛtɔ̌miɛgɛ mɔnɔ bakpa nde bána baYúdha nyɔngɔ á boamia ka měma. Ande gea te, bojede nɛbɔ, nnde á kala, ninde á kɛkɛ, abiki phɛ̂. Cɔ, kɛkɛ nde gǎkɛ, esuia ndea Mokonga ědhondi.

Mɔphɛ á Pɔ́lɔ ka bakpa nde dégoisigi

17 Baya, besu bateki gǎkɛ, nanga bii débekatani mbenɔ abhɔa ka keongi, békékatani ka měma. Ka bondɔ, débetú na mɔphɛ ángbó á ɔna anu goto. 18 Eya, eme Pɔ́lɔ, netókondi mɔngɔ ási ga á ɔna anu, kimoti na badhani. Sɛtáni â gǎkɛ ǒsodakea aphe. 19 Cɔ, mbenɔ á ja a Mɔkɔta nɛsu Yéso Kiísito, animbe abande nsebeɔ na maseye nɛsu, kabɛ nǎna tɔndɔ benu? Eya, benu bá unge bobande kekombo nɛsu k'ébhebha ne mosa akɛ. 20 Nga, bonde cina á boombia na maseye nɛsu.