Baobá́ á mosa-mosa ndea Pɔ́lɔ ka BaTɛsalɔníka
Mɔ á Nyɔngɔ
Animbe dádundu baobá́ nde? Dátú Nteki Pɔ́lɔ bii dátú ka tamba nɛkɛ á ko ibɛ, á tɔ̌miaga á Nyɔngɔ Anja ndea Kiísito ka nji danga- danga.
Dádundu ka saga sina? Dádundu ka saga sɔsɔbɛ a 50 na 52, mbusa á bɔkɔtɛana á Yéso.
Dádundu ka nyɔngɔ sina? Dádundu ka nyɔngɔ nde, bii dátú tɔ mɔtɛ a baTɛsalɔníka ka matu abhɔa, dákágɔbi tɔ̌miaga abɔ Nyɔngɔ Anja ndea Mokonga. Ka bondɔ, baTɛsalɔníka dábatú phɔ́tɔ babeeki á kɛkɛ. Bakpa dábakpangi phɔtɔ tambisaga abɔ. Ka bondɔ unge, Pɔ́lɔ dákondi gbagisa abɔ ka měma.
Bɔphɛi nɛkɛ dátú eke? Pɔ́lɔ dɛ́phɛi baTɛsalɔníka gea te, bii dábambeeki Kiísito akpɛ, akeni bágbagisɛu. Dákondi phɔtɔ be: Báphiphiɛ tambaga, nga, a tɔ bo ka baKiísito buangbo. Bákondanɛ sɔsɔbɛ abɔ. Bátambeɛ bíndɔ a anja ka bakpa ndea Mokonga. Ka sungiaga a baobá́, Pɔ́lɔ dákabi gbagisa abɔ na opha abɔ nsebeɔ á ja a Mɔkɔta Yéso.
Nsesɔ
1
1 Ka babeeki á ka Tɛsalɔníka, sambani.Eme Pɔ́lɔ a ámbé nedundu baobá́ ndee. Be kimoti na Síla, na Timɔtɛ́ɔ.
Benu bá unge bɔɔngani na Abhasu Mokonga, na Mɔkɔta Yéso Kiísito.
Cɔ, bɔjɛjɛ na bonjánja ábɛ ka benu.
Obhebhɔ ka Mokonga
2 Beonsega Mokonga esa bhui ka nyɔngɔ anu, benu bɔbhu. Béké phɔtɔ odeketa kumia ína anu k'ɛmɛmi nɛsu. 3 K'ɛmɛmi kau, beónokanisia mosa á Abhasu Mokonga. Nga, beuubha bii bɔtɔtɔkisi ekuma ási ka nyɔngɔ nde, bombeeki, bóonkonda. Bo phɔtɔ na bukpɛkpɛ phɛ̂ bii bonsebei Mɔkɔta nɛsu Yéso Kiísito.
4 Baya, beubhi gea, Mokonga dánɔsɔmbu gea, bóbɛ bakpa nɛkɛ. Nga, yɛ ǎnokondi. 5 A bó, ka nyɔngɔ nde, bii dɛ́bɛnɔ́tɔ̌migi Nyɔngɔ Anja ndea Mokonga, dána tɔndɔ ka yɔnga, dátú ndiu ka bukpɛkpɛ ndea Měma á Mokonga. Débebhisi měma asu kau gea, ande doni.
Buubhi phɔtɔ tambea asu bii débeiki sɔsɔbɛ anu, nadátú anja ka benu. 6 Benu phɔtɔ, dóbobi tambea asu, ninde á Mɔkɔta. Bô phɔtɔ obeekea bɔphɛi á Nyɔngɔ anja ndɔ, nanga bii dóbotambigi phɛ̂ ka nyɔngɔ ndɔɔ. Dóbotú ndiu na maseye, á Měma á Mokonga.
7 Ka bondɔ, bonde mphaniɔ ka babeeki bɔbhu á ka Makɛdhɔnía na Akáia. 8 Nga, ka nyɔngɔ anu, nyɔngɔ á Mɔkɔta dáɛmbi ka mokonda bhui, nna tɔndɔ ka Makɛdhɔnía na Akáia. Nga, beekea nɛnu ka Mokonga a unge andandisi nyɔngɔ nɛkɛ. Ka bondɔ unge, béké ye na nyɔngɔ ángbo á ngodea á bakpa. 9 Nga, báɔsɔ́tɔmiaga sasa abɔ bii dóbosósesi ka kidia asu mɔtɛnu, na bii dóbodu nkumba ésomba ajede, bóophaia ka Mokonga, bóoba babhɛdanigi nɛkɛ. Nga, Mokonga a ámbé aoenda mɛyɔ nande mɔkɔta á doni, á na kobha. 10 Cɔ, bô phɔtɔ ombondea Anakɛ, mmbe Mokonga dánjujukisi ka basí, natokaeka na kobha. Ina akɛ ande Yéso, mmbe ǎsoamisi k'esuia ndea Mokonga, nnde aobhika.