4
1 Benu bakɔta, ógeeani bakɔbɛ nɛnu anja phɛ̂. Ubhani gea, benu phɔtɔ, bo na Mɔkɔta nɛnu na kobha.Bɔphɛi danga-danga á ka sungiaga a baobá́
2 Suiani ɛmɛmi, ɛngɛphani k'ɛmɛmi kau, bani phɔtɔ na měma á bosegi ka Mokonga.
3 Mɛmani phɔtɔ ka besu gea, Mokonga ákodɛ k'asu aphe á tɔ̌miaga á nyɔngɔ nɛkɛ, nnde dásɔ̌mi. Nga, ka nyɔngɔ á nyɔngɔ ndɔ unge bámomaki ne ka mekakɔ. 4 Mɛmani phɔtɔ gea, nɛ́tɔ̌miɛgɛ bhase, nyɔngɔ nɛkɛ bíndɔ amososi.
5 Tambeani anja mosa á bakpa nde bána k'ekombo á Kiísito. Esa kǎnokuiɛmbɛ jǎi. 6 Yɔnga nɛnu ábɛ anja esa bhui, ɛ́bɔngɛɛ bakpa bea eea nabátusi na mɔnɛi. Mpɔ, bǔubha sikisia á nkpa bhuakɛ, boabhi anja.
Mɔkɔ
7 Dhasu ékondi Tukíkɔ ǎnuubhisande nyɔngɔ ani bhui. Ande mbhɛdanigi anjanja, be phɔtɔ ɔmbhɛdaneaga Mɔkɔta kimoti na yɛ. 8 Nenteki mɔtɛnu ka gea te, bódigimisɛ boiki asu. Mpɔ, měma anu áɔphɔnga.
9 Yɛ, báge na Ɔnɛsímɔ. Ɔnɛsímɔ ande dhasu ékondi, na ntɔa-doni. Cɔ, nna phɔ k'ekombo nɛnu, á baKiísito? Eya, bɔ, bánongodeagande nyɔngɔ bhui nde a koni.
10 Aisitákɔ ǎnosesi, mmbe a ka mekakɔ kimoti n'eme. Málikɔ, ayakɛ na Bhaanábha, ǎnosesi phɔtɔ. Yɛ a ámbé dénongodigi nyɔngɔ akɛ. Cɔ, a ye okidia, nseseani anja. 11 Yéso, mmbe báɔmɔphana Yúsitɔ, ǎnosesi phɔtɔ. Boko basaɔ ndɔ tɔ, ka bunde báɔbhɛdanaga kimoti n'eme, bánde baYúdha. Besu bɔbhu be tɔ ɔtɔmiaga nyɔngɔ á koboamɛ ndea Mokonga kimoti. Ka bondɔ, bámophiphisii měma.
12 ěpáphaá ǎnosesi phɔtɔ. A phɔtɔ k'ekombo nɛnu ndea baKiísito. Ande mbhɛdanigi nde ba a Kiísito Yéso. Aɔmɛma Mokonga na moingi ka nyɔngɔ anu bea nkpa na k'etu. ěmɛmi nɛkɛ ande gea, bɔ́mɔtɛ ka měma, bódigimisɛ bhase, mɔphɛ bhui á Mokonga. 13 Nemamei nyɔngɔ nɛkɛ gea, ǎnɔbhɛdaneigi akpɛ phɛ̂. Agi phɔtɔ bó ka batɔa-Laɔdhikía na Iɛlapɔ́li.
14 Dhasu ékondi Lóka, mmbɔ nsaku, na Dhɛmá, bánosesi.
15 Oseseani k'ani badhasu na Laɔdhikía. Ka bakpa bɔbhu ndɔ, nseseani phɔtɔ aoasu Níipha, na babeeki bɔbhu bunde báodhondana mɔtɛkɛ. 16 Mbusa á tanga a baobá́ nde, tekisani phɔtɔ ka batɔa-kanisa á ka Laɔdhikía, bátangɛ. Détekisi baobá́ nɛngbo mɔtɛbɔ, nnde bánotekisiande goto. A ye okidia, bóotanga.
17 Ngodeani Aakípɔ gea, átɔtɔkisɛ ekuma ndea Mɔkɔta, nnde dábamophi.
18 Eme Pɔ́lɔ a ámbé nedundu mɔkɔ nde sasa ani: a Bókoboseɛmbɛ gea, ne ka mekakɔ.
Cɔ, bonjánja ékondi ndea Mokonga ábɛ na benu.