3
1 Benu gǎkɛ, bojujuki ka kukua kimoti na Kiísito. Ka bondɔ, kabani kema á na kobha, ɔma nde Kiísito aiki ka njaga á muku á Mokonga. a 2 Bhisani phɔ měma anu ka kema nde á na kobha, nǎna nnde á ka mokonda. 3 Nga, boku yetɔ, bo ndiu oenda kimoti na Kiísito, bii Mokonga ǎnɔsɔmi kimoti na Kiísito ka gea te, kema ajede á ka mokonda kǎnoboteɛmbɛ.4 Cɔ, bii Kiísito ande cina á enda anu, k'esa á ja akɛ, bobhikaeka na bɔ ka boombia nɛkɛ. 5 Ka bondɔ, kusani kema ajede á ka měma anu, nnde á ka mokonda bea:iɛbɛ,bɔjɔɔkiɔ,otungɔ,siki á gea ajede,kuma, nnde ande etete á boia. b
6 Ka nyɔngɔ á kema ajede ndɔ unge, esuia ndea Mokonga abhikaeka kau. c 7 Nga, tambea anu dátú tɔ bó, mosa á beekea a Kiísito. 8 Kɛkɛ nde ye gǎkɛ, akeni tokisa á kema bhui ndee:bɛi,esuia,kokaembhóma,ɛphɔti, nnde dáotoka k'aphe-nɔkɔ anu.
9 Bɔ́kɔyɔngɛanɛmbɛ mbɛa. Nga, bodeketi ye tambea anu á kala, na kema nde dóboogea mosa. 10 Eya, Mokonga ǎnoconji goto, mpɔ, bóoba bakpa á kɛkɛ. Ande gea te, Mokonga aoketia tambea anu esa bhui, gea te, bókengeanɛ na bɔ. Mpɔ, bóomǔbha phɛ̂. 11 Ka bondɔ, nna ye nyɔngɔ á baYúdha na bakpa nde bána baYúdha, bagu ganja na bunde bákágu ganja, bakɛni, batɔa-jǎi-jǎi, bakɔbɛ, baniki á nji. Ande ka nyɔngɔ nde, Kiísito a gu á kema bhubhui naiki ka měma á bakpa nɛkɛ bɔbhu.
Ɔlani bhɔngɔ anja á ka měma
12 Mokonga ǎnɔsɔmbu, áonókonda, bóoba bakpa nɛkɛ. Ka bondɔ, ɔlani bhɔngɔ anja á ka měma, nande:ngomi,bonjánja,édhidhisa,bɔphɔngɔphiphia.
13 Eya, phiphianani. Aoba nkpa na na nyɔngɔ na dhakɛ, ádeketɛ. Geanani tɔ bó bíndɔ Mɔkɔta dádeketi bojede nɛnu. 14 Bii bɔɔli bhɔngɔ ndɔ bhubhui á ka měma, bhisani ekondani gui. Nga, ekondani a unge aɔ́ɔnganisa babeeki bɔbhu anja.
15 Bɔjɛjɛ ndea Kiísito áikɛ bea moamɛ ka měma anu. Nga, Mokonga ǎnɔɔphani gea te, bóbɛ bea nkpa moti. Bii a bó, akeni bóbɛ na bɔjɛjɛ benu bɔbhu, bóbɛ phɔtɔ na měma á sega a Mokonga.
16 Nyɔngɔ Anja ndea Kiísito ábikɛ subi anu phɛ̂. Goisanagani, phɛanani na kɔbɔngɛ phɛ̂. Embani phɔtɔ embɔ á buku á Mokonga, embɔ á bhebha á Mɔkɔta na embɔ nde Měma á Mokonga ǎnoophi. Eya, němbeani Mɔkɔta na měma anu bhui.
17 Kema bhubhui nde boogea, na nyɔngɔ bhui nde bɔɔyɔnga, geani tɔ bo k'ina a Mɔkɔta Yéso, nobo phɔtɔ onsega Abhasu Mokonga ka nyɔngɔ á Kiísito.
ěɔphi k'endu ndea baKiísito
18 Cɔ, bake, ɔ́bɔkani bamunyanu bíndɔ akeni ka bakpa nde báɔngani na Mɔkɔta.
19 Boko, ókondani bake anu, bókǒkaeɛmbɛ.
20 Baniki, ɔ́bɔkani babɔkɔti anu ka kema bhubhui. Nga, nndɔ unge ambɔngɛi Mɔkɔta.
21 Benu baabhɛ, bókǔubɛmbɛ baniki, ámbe bákátɔtɔkisɛku ye ka kema.
22 Benu bakɔbɛ, ɔ́bɔkani bakɔta nɛnu á ka mokonda, ka kema bhui. Bɔ́kɔbhɛdanɛgɛmbɛ tɔ, mmbe bánobondi ka nyɔngɔ ékondisaga na bo. Bhɛdanagani ndiu na měma mo, ka nyɔngɔ nde, boombanga Mɔkɔta Yéso. 23 Eya, aobá́ noboogea kema, bhisani měma anu bhui kau. Ubhani ka měma anu gea te, a tɔ Mɔkɔta Yéso ámbé bɔɔmbhɛdaneaga, nna nkpa. 24 Nga, bûubha gea, Mɔkɔta ǎnoophande botukɔ, nnde abande ophendɔ nɛnu. d Eya, Mɔkɔta Kiísito a ámbé bɔɔmbhɛdaneaga. 25 Nkpa nde aogea ajede, Mɔkɔta Yéso amphendaeka ajede ka nyɔngɔ á bojede ndɔ agi. Nga, Mɔkɔta Yéso atenande nyɔngɔ á bakpa bɔbhu dhɛ! kanga á sɔmbɔa á nkpa sɔsɔbɛ abɔ.