2
1 Nekondi gǎkɛ búubhɛ, bii nɛbhɛdanigi akpɛ ka nyɔngɔ anu, ka batɔa-Laɔdhikía, na phɔtɔ ka bakpa bɔbhu bunde bákámɔɔnimbɛ. 2 Nɛbhɛdanigi tɔ bondɔ ka gbagisa a měma á baKiísito bɔbhu gea te, bábɛ kimoti k'ekondani, bádigimisɛ ubhapha bhui. Nndɔ akeni ka ubha a moangɔ á bɔsɔmɛa ndea Mokonga, nande nyɔngɔ á Kiísito. 3 Nga, yɛ, ande cina á ubhapha na kɔbɔngɛ bhui. Nndɔ ande ɛtɔi nɛsu á ka měma.4 Negi bo ka gea, nkpa kǎnodhemɛgɛmbɛ na boabhi á mbɛa. 5 Nga, be kimoti ka měma, nanga néba danga. Ne gǎkɛ na maseye, ka nyɔngɔ nde nɛɔni moangɔ nɛnu anja na ka nyɔngɔ nde bosui beekea á Kiísito.
Bani n'ebhigɔ ndea Kiísito
6 Ka bondɔ, bii bobeeki gea, Kiísito Yéso ande Mɔkɔta nɛnu, ndakateani yɛ. 7 Bani phɔtɔ bea me nangisi migi akɛ subi á odo, Kiísito nande bea odo ndɔɔ. Bani goto bea mɔphɛkɔ nabácumi akpɛ. Ande gea te, suiani beekea akɛ bíndɔ bánogoisigi. Bani phɔtɔ na bosegi ási ka yɛ.
8 Oambani ndiu gea, nkpa kǎnokodɛmbɛ ka bɔphɛi ódhemayɔ, á jǎi-jǎi, nnde atoki ka asii ndea bakpa, phɔtɔ ka baketi á ka mokonda, nakátoki ka Kiísito.
9 Nga, bii yɛ dátú phɔ́tɔ ka mokonda, dátumi n'ebhigɔ bhui ndea Mokonga. 10 Bii bɔɔngani na yɛ, bo n'ebhigɔ nɛkɛ bhui, yɛ nande moamɛ á bauka, na bai-nji á ka mpɛna.
Obatisɔ, ande ganja ndea baKiísito
11 Mbenɔ nde bɔɔngani na yɛ, bogu ganja. Ganja ndɔ nna gǎkɛ ka njaga á nkpa, a ndiu ganja ndea Kiísito. Ande gea te, Kiísito atokisi ebhigɔ nɛnu ajede. 12 Nga, mbenɔ nde bánobatisi, ande bea umba anu na jujukisa anu kimoti na Kiísito. Nga, bobeeki bukpɛkpɛ á Mokonga, mmbé anjujukisi Kiísito ne sɔsɔbɛ a basí. 13 Benu gǎkɛ, dóboku mosa k'iso á Mokonga, ka nyɔngɔ á bojede na měma á kouo. Kɛkɛ nde, Mokonga ǎnojujukisi ka kukua ndɔ kimoti na Kiísito, áobosea bojede nɛsu bhui. 14 Nga, aimi baobá́ nɛkɛ, á kitɔngi asu.Baobá́ ndɔ dátú bea mbibia asu, ka ntua á tena a nyɔngɔ nɛkɛ.Kiísito â gǎkɛ ɔbhɛdau, áɔkɔkɛaga ka mosaaba. 15 Oa, áuuta bukpɛkpɛ á bauka,na bai-nji bɔbhu á ka mpɛna.Aǒbotaga baamɛ ndɔ mbusa akɛ bea batɔa-mekakɔ,áǒkusa na soni mosa á bakpa bɔbhu.
16 Ka bondɔ, nkpa kǎnoteneɛmbɛ nyɔngɔ akpɛ ka nyɔngɔ á kema nde booea, ninde boonoa. Bókombeekeɛmbɛ nkpa nde aokaba dokomisa esa á maseye ésomba bea esa á baeka a songe na esa á sabato. a 17 Nyɔngɔ ndɔ bhui, a tɔ iii á kema nde abhikaeka. Cina iii ndɔ, ande Kiísito.
18 Eya, bókǒbeekeɛmbɛ bakpa nde báotena nyɔngɔ nɛnu akpɛ. Bɔ, báogea te, akeni bótambisɛgɛ nyama anu, na bhebha á bamalaeka k'esomba nɛnu. Bábhisi phɔtɔ měma abɔ ka kema nde báɔɔna ka mphaniɔ. Báǒbimbikisa etiti. Cina á ubhapha abɔ a tɔ nyɔngɔ á kokpa.
19 Cɔ, bakpa ndɔ bákatani na Kiísito, mmbe a bea mɔ á kanisa, kanisa na bea nyama akɛ. Nga, ka nyɔngɔ akɛ, nyama akɛ bhui aokuta, kesuku na nkua áodakateana. Mpɔ, nyama akɛ áɔmɔta bíndɔ Mokonga akondi.
Kusani kema ajede á ka měma anu
20 Eya, bii boku yetɔ kimoti na Kiísito, bókó ye kusi a baketi á ka mokonda. Cɔ, eke nde boiki bea bakpa nde bánaomǔbha Kiísito Yéso bii boobeekea ɛɔphi nde bende: 21 «Bɔ́kɔbhɛdɛmbɛ kema ótaɔ, bókokengeɛmbɛ k'eea ótaɔ, bókodhungɛmbɛ tanda kau»? 22 ěɔphi ndɔ bhui ande tɔ kema á ujukana, mbenɔ nde báɔbhɛdanaga ne. A tɔndɔ bakpa bá unge báobhisa na goisaga ɛ́ɔphi ndɔɔ. 23 Eya, bakpa báuubha te, ɛɔphi ndɔ ande kɔbɔngɛ, bii báobea nyɔngɔ ésomba, báǒbhisa kusi, báǒtambisaga ne. Nanga ába bó, asii ndɔ nnaoněnga nkpa, bii yɛ aokaba tea á kema ajede, nnde aombotea.