Bakɔɔsái 1

Baobá́ ndea Pɔ́lɔ ka baKɔɔsái

Nsesɔ

1-2 Ka babeeki á ka Kɔɔsái, sambani!

Eme Pɔ́lɔ a ámbé nedundu baobá́ ndee. Nende nteki nde ba a Kiísito Yéso ka nyɔngɔ á mɔphɛ á Mokonga.

Dhasu Timɔtɛ́ɔ a ámbé amoengi ka dunduai.

Bonde badhasu doni, bunde bɔɔngani na Kiísito.

Abhasu Mokonga ánophɛ bɔjɛjɛ na bonjánja.

ěmɛmi

3 Beonsega Mokonga, abha-Mɔkɔta nɛsu Yéso Kiísito, mbenɔ bhui nde bɛɔmɛma ka nyɔngɔ anu. 4 Nga, bɛɔki bii bombeeki Kiísito Yéso, nobǒkondi bakpa ndea Mokonga bɔbhu. 5 Cina á beekea n'ekondi ndɔ, ande nsebeɔ nde bo ne ka kema nde Mokonga anɔ́bɔngisii na kobha. Dóbodigimisi nsebeɔ ndɔ mbenɔ nde dábanɔ́tɔ̌migi nyɔngɔ á doni, nande Nyɔngɔ Anja ndea Mokonga. 6 Nyɔngɔ Anja ndɔ, aɛmbi mokonda bhui, bea me natɛi, áɔgɔmba. A tɔ bó ka benu sumbii dɔ́bɔɔki mosa-mosa, bonjánja nde Mokonga dánogii doni.

7 Eya, ěpáphaa a ámbé dánophangigi nyɔngɔ ndɔɔ. Yɛ a ámbé bɛɔbhɛdanaga na yɛ. Benkondi phɛ̂. A phɔtɔ ɔmbhɛdaneaga Kiísito na měma mo ka nyɔngɔ anu. 8 Yɛ a ámbé dásongodi gea, bokondani phɛ̂. Doni, Měma á Mokonga a ámbé atɔtɔkisi nndɔ sɔsɔbɛ anu.

9 Besu gǎkɛ, kpanga á bii dɛ́bɛɔki nyɔngɔ anu, békéodeketa dengemisaga á Mokonga ka nyɔngɔ anu. ěmɛmi nɛsu ande gea:Bódigimisɛ anja, mɔphɛ akɛ,bóbɛ na kɔbɔngɛ na ubhapha ási, á ka měma. 10 Mpɔ, bóotambea anja bíndɔ ěkeni bakpa ndea Mɔkɔta,bɔ́ɔmbɔngɛa Mokonga phɛ̂,bɔ́ɔtɔtɔkisa ekuma ási na anja,bɔ́ɔmɔta ka ubha a Mokonga phɛ̂. 11 Mpɔ, yɛ áonógbagisa na bukpɛkpɛ nɛkɛ bhui, nnde a na boombia phɛ̂.Ka bondɔ, bokiniande, bôphiphia nyɔngɔ bhui na maseye.

12 Mpɔ, bóonsega Abhasu Mokonga, ka nyɔngɔ nde, abɔngisigi měma anu, áonópha motumbɔ á botukɔ nɛkɛ. Botukɔ ndɔ ande ba na bokambia kimoti na batɔa-koboamɛ ndea Mokonga, k'ɔma ndɔ yɛ aɔbhɛnya bea mani.

13 Yɛ a ámbé ǎsophui ka bukpɛkpɛ á kaiphiɔ, ǎsotoisi, áosóngisa ka koboamɛ ndea miki nɛkɛ ékondi. 14 Yɛ a ámbé ǎsosodu ka bojede, áobosea.

Embɔ ka Kiísito

15 Kiísito ande iii á Mokonga, mmbe bánaɔmɔ̌na.Ande ange, gu á kema bhubhui nde Mokonga dáconji.

16 Nga, yɛ a ámbé Mokonga dámophi bukpɛkpɛ á conja á kema bhubhui,nnde a na kobha, ninde á ka mokonda,nnde báɔɔna, ninde bánaɔɔna,bakɔta na baamɛ á k'ego,bauka na bai-nji á ka mpɛna.Kema bhubhui ndɔ, Mokonga dáconji ka nyɔngɔ akɛ na ka bukpɛkpɛ nɛkɛ. 17 Dáendi mosa á kema bhubhui,kema bhubhui abei ka nyɔngɔ á bukpɛkpɛ nɛkɛ. 18 Batɔa-kanisa bánde bea nyama akɛ,yɛ ande mɔ abɔ. Ande phɔtɔ kpangeɔ á kema bhubhui.Ande ange á bajujuki ka kukua,gea te, ábɛ moamɛ á kema bhubhui. 19 Nga, ambɔngɛi Mokonga gea, anakɛ ábɛ n'ebhigɔ nɛkɛ bhui.20 Mpɔ, áɔɔngana na bakpa bɔbhu ka nyɔngɔ á Kiísito. Aɔɔnga konsamba ndea magia á anakɛ,nnde aduukani ka mosaaba. Agi bo, ka nyɔngɔ á ɔnganisa á kema bhubhui na yɛ,kabɛ na kobha, kabɛ ka mokonda.

21 Benu gǎkɛ, dóbokatanigi na Mokonga, bóoba babibia akɛ ka nyɔngɔ á ubhapha anu na tambea anu ajede. 22 Kɛkɛ nde ye gǎkɛ, Mokonga ǎnɔɔnganisi na yɛ ka nyɔngɔ á kukua á anakɛ bii dátú nkpa. Yɛ, dági bo gea, ánokidianisɛ mosa á Abhakɛ, nobo na bonjánja, kanga á nkiki na kisɛki ka měma anu.

23 Akeni tɔ, bósuiɛ beekea akɛ, bódhodeɛ ka měma, kanga á deketa á nsebeɔ nde a subi á Nyɔngɔ Anja nɛkɛ. Nyɔngɔ Anja ndɔ a unge dɔ́bɔɔki, na dábɛ̌̀tɔ̌migi bakpa bɔbhu ka mokonda. Eme Pɔ́lɔ gǎkɛ, nende mbhɛdanigi ka ubhisai.

Ekuma ndea Pɔ́lɔ, ande phangiaga bhase moangɔ á bɔsɔmɛa ndea Mokonga

24 Ka matu nde, ne na maseye nanga nétambaga ka nyɔngɔ anu. Nga, bíndɔ Kiísito dátambigi, ne phɔtɔ otambaga bea yɛ k'ina á kanisa, nnde ande bea nyama akɛ. Ande gea te, nɛɔgɔbɛa ekuma nɛkɛ, nnde ajigi. 25 Mokonga amopi kɔkɔta, nébɛ mbhɛdanigi ndea kanisa, nɛ́tɔtɔkisɛ ekuma nde amopi ka nyɔngɔ anu. Ekuma ndɔ ande tɔ̌miaga á nyɔngɔ nɛkɛ bhui. 26 Nyɔngɔ ndɔ ande gǎkɛ moangɔ nde dɛ́sɔmɛi bakpa bɔbhu kala phɛ̂. Kɛkɛ nde, aphangi yetɔ bhase ka bakpa nɛkɛ. 27 Dákondi phɔtɔ phangia á bakpa nde bána baYúdha gea, moangɔ á bɔsɔmɛa ndɔ, ande ketangaɔ. Ketangaɔ ndɔ ande gea, Kiísito aiki ka měma anu, mpɔ, bóoba na nsebeɔ á ika kimoti na yɛ k'ɔma á boombia.

28 Besu gǎkɛ, bɛɔ́phɛa na tɔ̌miaga á bakpa bɔbhu, nyɔngɔ nɛkɛ. Beogea bó na kɔbɔngɛ bhui gea te, bɛ́mɔtisɛ baKiísito bɔbhu ka měma, mpɔ, béǒkidianisa mosa á Mokonga. 29 Ekuma nɛmɔ ndɔ, ande be'etu, nnde neomana na bukpɛkpɛ ángbó nde Kiísito amopi.