Baobá́ ndea Pɔ́lɔ ka BaPhilípɔ
Mɔ á Nyɔngɔ
Animbe dádundu baobá́ nde? Dátú Nteki Pɔ́lɔ bii dátú ka mekakɔ, ka Lɔ́ma, ka nyɔngɔ á tɔ̌miaga á bakpa Nyɔngɔ Anja ndea Mokonga.
Dádundu ka saga sina? Dádundu ka saga sɔsɔbɛ a 61 na 63, mbusa á bɔkɔtɛana á Yéso.
Dádundu ka nyɔngɔ eke? BaPhilípɔ dábantekisii Pɔ́lɔ nkɛbɛa. Ka bondɔ, dákondi sikisia abɔ bosegi. Pɔ́lɔ dáubhi phɔtɔ gea, baPhilípɔ dábaoianaga nyɔngɔ ésambɔ ndea ěpaphɔɔdítɔ, na makea á Pɔ́lɔ ka mekakɔ.
Bɔphɛi nɛkɛ dátú eke? Bakpa ba ási bági geae, baobá́ nde ande baobá́ á maseye. Nga, Pɔ́lɔ akondi gea, bábɛ na maseye ka kema bhubhui, kabɛ ka tambaga, ekuma, n'etete á enda bhubhui, ka nyɔngɔ nde báɔngani na Kiísito.
Nsesɔ
1
1 Ka babeeki bɔbhu ndea Kiísito Yéso á ka Philípɔ, baamɛ á kanisa na baambi-kanisa, sambani.Eme Pɔ́lɔ, na Timɔtɛ́ɔ, bakɔbɛ ndea Yéso Kiísito, besu bá unge běnosesi sambani!
2 Abhasu Mokonga, na Mɔkɔta Yéso Kiísito, ánophɛ bonjánja na bɔjɛjɛ.
ěmɛmi
3 Bii neónokanisia, néonsega Mokonga. 4 Ne phɔtɔ na maseye bii nɛɔmɛma Mokonga ka nyɔngɔ anu, esa bhui. 5 Nga, bomoengi k'ekuma á ɛmbisa á Nyɔngɔ Anja ndea Kiísito kpanga á bii dóbombeeki Kiísito, na ka kɛkɛ ndee. 6 Neuubha doni gea, bii Mokonga akpangi ekuma anja ndɔ ka měma anu, atutuisande, áɔgɔbɛa k'esa nde Yéso Kiísito ajaeka. 7 Nga, atú anja nékanisiɛ bó ka nyɔngɔ anu bɔbhu. Nga, něnokondi phɛ̂, bii Mokonga ǎsogabhei besu bɔbhu bonjánja nɛkɛ. Eya, a tɔ bó, nanga néba ka mekakɔ, nanga némamea na tetemisa á Nyɔngɔ Anja mosa á ntua á tena a nyɔngɔ. 8 Mokonga auubha doni gea, něnokondi phɛ̂ n'ekondi ndea Kiísito Yéso.
9 Cɔ, nɛɔmɛma Mokonga ka nyɔngɔ anu be: Ekondani nɛnu ábikɛ phɛ̂, búubhaphɛ phɛ̂, bɔ́ɛngɛphɛ anja. 10 Mpɔ, bóodigimisa kema nde a anja phɛ̂, bɔ́bɛ phɔtɔ bakpa ba anja phɛ̂, kanga óyeyɔ k'esa nde Kiísito ajaeka. 11 Nɛmɛmi phɔtɔ gea, bóbɛ batɔa-doni bii Kiísito aónoamba. Mpɔ, Mokonga áoba n'obhebhɔ, na boombia, ka nyɔngɔ anu.
Sɛkɛdisa á Nyɔngɔ Anja nanga bii Pɔ́lɔ a ka mekakɔ
12 Baya, nekondi búubhɛ gea, kema ajede nde amokidianei, a ndiu tɔ ka tutuisa a Nyɔngɔ Anja. 13 Nga, babondigi-endu bɔbhu ndea moamɛ angbóngbó na batɔa ka nji bɔbhu phɔtɔ, báuubha bhase gea, ne ka mekakɔ ka nyɔngɔ á bhɛdaneaga a Kiísito. 14 Ka bondɔ, badhani baKiísito ba ási, bâ yetɔ oba na ntende á tɔ̌miaga á nyɔngɔ á Mokonga, kanga á kɔbɔbɔkɔ.
15 Cɔ, bunɛngbo báɔtɔmiaga nyɔngɔ á Kiísito na měma á nsengo na měma éteba. Bunɛngbo bâ gǎkɛ ɔtɔmiaga na mɔphɛ anja. 16 Bɔ, bámokondi, báuubha gea te, ne ka mekakɔ ka nyɔngɔ á mamea a Nyɔngɔ Anja ndea Kiísito. 17 Batɔa-nsengo ndɔ, báɔtɔmiaga nyɔngɔ á Kiísito na měma édokomisa na maibhe-maibhe. Báokaba tambisaga ani goto ási, bii ne ka mekakɔ.
18 Nndɔ nna na nyɔngɔ. Nanga bába na maibhe-maibhe, nanga bába na mɔphɛ anja, bátɔɔtɔmiaga nyɔngɔ á Kiísito. Ka bondɔ, ne tɔ na maseye.
Eya, nebande phɔtɔ na maseye kau phɛ̂. 19 Nga, neuubha doni gea, sungiaga á tambaga ani, ande boamia nɛmɔ, a ka nyɔngɔ ɛ́mɛmi nɛnu k'eme, na bii Měma á Yéso Kiísito aomoenga. 20 Ande gea te, neosuia phɛ̂, néosebea gea, kékuɛku na soni. Nê ndiu otetemisa gea, néphangiɛ bophombia á Kiísito ka tambea ani bhui, kabɛ kɛkɛ nde, kabɛ esa bhui, kabɛ ka enda, kabɛ ka kukua ani.
21 K'eme, enda a tɔ ka nyɔngɔ á Kiísito. Kukua ande ɛkɔmi. 22 Ne ye oenda, nɛ́ɔtɔtɔkisa ekuma anja. Ka bondɔ, kéuubha sɔmbɔa sɔsɔbɛ a kukua na enda. 23 Ande gea te, mɔphɛ ibɛ aomobotea k'aphe danga-danga. Nesui ga ika na Kiísito, nndɔ ungɔ nekondi phɛ̂. 24 Enda ani a gǎkɛ kema anja ka nyɔngɔ anu.
25 Bii nedigimisi ye nndɔ, néuubha gea, neendande, néoika na benu bɔbhu. Mpɔ, bóoga mosa ka beekea a Kiísito na maseye. 26 Ka bondɔ, k'esa á jua ani goto mɔtɛnu, bombhebhande Kiísito phɛ̂ ka nyɔngɔ ani.
27 Bii a bó, tambeani bíndɔ akeni ka bakpa nde bábeeki Nyɔngɔ Anja ndea Kiísito. Geani tɔ bó, ka gea te, nanga nébhika k'aphe á ɔnjia anu, nanga kébhiki, nɛɔkande nyɔngɔ anu, na tɔ anja. Nga, botetemisi kema bhui na měma mo, nɔbɔbhɛdanigi akpɛ phɛ̂ ka ɛmbisa á Nyɔngɔ Anja ndea Kiísito. 28 Bókǒbangɛmbɛ babibia anu. Ka bɔ, ntende nɛnu abande mphaniɔ á bungaga abɔ. Ka benu, abande mphaniɔ á boamia nɛnu ka měma, nnde Mokonga atɔtɔkisi. 29 Nga, ka bonjánja nɛkɛ, yɛ ǎnophangi aphe á beekea a Kiísito. Nna tɔndɔ bó, a phɔtɔ tambaga k'ina akɛ. 30 Nga, be k'etu bíndɔ dɔ́bɔmɔɔni kau. Eya, bûubha gea te, ne phɔ́tɔ kau.