Tambea ndea baniki na babɔkɔti abɔ
6
1 Benu baniki, ɔ́bɔkani babɔkɔti anu bíndɔ Mɔkɔta akondi. Nndɔ a unge akeni. 2 K'ɛɔphi nkama ndea Mokonga, moti agi be: «Ndokomisa abhakɔ n'amakɔ.» ěɔphi ndɔ ande á mosa-mosa ka ba na mɔkɔ. 3 Mɔkɔ ndɔ ande gea: «Oogea bó, obande na bɔjɛjɛ ka kema bhui, óoenda ka saga ási.» a4 Benu babha-niki, bókǔubɛmbɛ baniki nɛnu. Ɔmɔtisani ndiu na bɔphɛi, na phangiaga, nnde a ka bɔphɛi nde Mɔkɔta abhisi ka bakpa nɛkɛ.
Tambea ndea bakɔbɛ na bakɔta nɛbɔ
5 Benu bakɔbɛ, ɔ́bɔkani bakɔta nɛnu á ka mokonda. Odokomisani na banga abɔ, kanga á maibhe, bíndɔ bɔɔmɔ̌ka Kiísito. 6 Bɔ́kɔbhɛdanɛgɛmbɛ tɔ, mmbe bánobondi. Ubhani ndiu gea, bonde phɔtɔ bakɔbɛ ndea Kiísito. Anokeni tɔtɔkisa á mɔphɛ á Mokonga na měma anu bhui. 7 Ɔbhɛdaneagani phɔtɔ bakɔta nɛnu na měma mo. Ubhani ka měma anu gea te, a tɔ Mɔkɔta Yéso ámbé bɔɔmbhɛdaneaga, nna nkpa.
8 Nanga óba nkɔbɛ, nanga kó nkɔbɛ, ubhani phɔ gea, Mɔkɔta Yéso a ámbé ǎnophendaeka k'ekuma anja nde bɔbhɛdanigi.
9 Benu bakɔta phɔtɔ, ógeeani bakɔbɛ nenu anja. Bákanɔ́bhɛdaneɛgɛmbɛ na kɔbɔbɔkɔ. Ubhani gǎkɛ gea, benu na bakɔbɛ nɛnu, bonde bana-Mɔkɔta, mmbe a na kobha. Nga, yɛ ěkondi bakpa bɔbhu, kanga á sɔmbɔa á nkpa sɔsɔbɛ abɔ.
Bhɛdani nkumba émani ndea Mokonga
10 Cɔ, sungiaga á nyɔngɔ a ungee: Bii bo kimoti na Kiísito, ógbagisagani sasa anu na bukpɛkpɛ nɛkɛ bhui. 11 Ande gea te, ɔlani nkumba émani nde Mokonga ǎnophi. Mpɔ, bɔ́ɔtɔka odhemayɔ ndea Nketi. 12 Nga, emani nɛsu nna á bakpa. Be ndiu omana na baamɛ na bakɔta á baketi, bakɔta á kaiphiɔ, na baketi bɔbhu á ka mpɛna. 13 Bii a bó, bhɛdani nkumba émani bhubhui ndea Mokonga, ka gea, bóphiphiɛ etu k'esa ajede kanga á tea, nobomame akpɛ.
14 Cɔ, mani! Kodoni ábɛ bea angede nɛnu, nanyangi akpɛ.Tambea anja nɛnu ábɛ bea bhɔngɔ á k'egogo nabáconji na ngɔa, nnde aónoamba. 15 Moingi ka tɔ̌mia á Nyɔngɔ Anja, á bɔjɛjɛ, ábɛ bea biato nɛnu. 16 Beekea á Mokonga, ábɛ nguba nɛnu. Mpɔ, bóokegea nsɔa ndea Nketi, nanga nsɔa ndɔ étoboaga. b 17 Boamia ka měma ábɛ bea kekombo á ngɔa, c nnde obhisi ka mɔ.Bɔphɛi ndea Měma á Mokonga ábɛ bea nkoso nɛnu.Roman Soldier, Daily Life in Bible Times (SIL Pub), pageBhɛdani nkumba émani bhui ndea MokongaNear Ephesians 6.4.
18 Geani tɔ bó bii bɔɔmɛma Mokonga gea, ánoengɛ. Eya, mɛmani tɔ bó mbenɔ bhubhui, bii Měma á Mokonga aónophangiaga. Geani phɔtɔ bó na měma á ɛngɛpha n'édhodea.
Cɔ, mɛmani Mokonga ka nyɔngɔ á bakpa nɛkɛ bɔbhu, 19 phɔtɔ k'eme, gea te, Mokonga ámopɛ boabhi nde akeni, bii nɛɔtɔmiaga Nyɔngɔ Anja nɛkɛ, nnde dásɔmi kala. Mɛmani phɔtɔ gea, négeɛ bó na ntende. 20 Nende ntɔnganisi á Nyɔngɔ Anja, nanga bii ne ka mekakɔ. Ka bondɔ, mɛmani Mokonga gea, nɛ́tɔ̌miɛgɛu na ntende bíndɔ amokeni.
Mɔkɔ
21-22 Dhasu ékondi Tukíkɔ, ande mbhɛdanigi anjanja ndea Mɔkɔta. Yɛ a ámbé něnotekisii ka ngodea anu nyɔngɔ nɛmɔ. Mpɔ, bǔubha ekuma nɛmɔ, na buiki nɛsu, bóogbaga ka měma.