Baěphɛ́sɔ 5

1 Bii bonde baniki ékondi ndea Mokonga, akeni tambea anu ákengeanɛ nindekɛ. 2 Ekondani ábɛ cina á tambea anu bíndɔ Kiísito dásokondi mosa-mosa. Aosókuia, áoba bea nyama á phɛa, nnde a na su anja nambɔngɛi Mokonga. 3 Bii bonde batɔa k'ekombo ndea Mokonga, nyɔngɔ ajede, bea íɛbɛ, bɔjɔɔkiɔ, na nsengo, kaɔkɛkanɛ mɔnɔ sɔsɔbɛ anu. 4 Bɔ́kɔyɔngɛgɛ phɔtɔ nyɔngɔ á soni, nyɔngɔ á jǎi-jǎi, nyɔngɔ á tɛbhɛanaga. Nndɔ bhui kánokeni ne, tɔndɔ bhebha á Mokonga k'ɛmɛmi nɛnu. 5 Ubhani gea, ntɔ-íɛbɛ, ntɔa-bɔjɔɔkiɔ, nkukuma, nna na ka bɔ, mmbe a na botukɔ ka koboamɛ ndea Kiísito na Mokonga. Nga, kuma ande etete á boia.

Makaka nna ka ntanga

6 Nkpa kǎnodhemɛmbɛ na nyɔngɔ á jǎi-jǎi. Nga, ka nyɔngɔ á bojede bhubhui ndɔ, esuia ndea Mokonga ěguiande bakpa nde bánye. 7 Ka bondɔ, óbangani badhemigi ndɔɔ. 8 Mosa, dóbotú batɔa- kaiphiɔ, á bojede. Kɛkɛ nde gǎkɛ, ka nyɔngɔ á ɔngana anu na Mɔkɔta, bo yetɔ batɔa-somani. Ka bondɔ, tambeani bea batɔa-somani. 9 Aoba nobootamba somani, dungu nɛnu abande bonjánja, bɔjɛjɛ, na kodoni. 10 Ka bondɔ, digimisani kema sina nde ambɔngɛi Mɔkɔta. 11 Bókophapheanɛ mɔnɔ na batɔa-kaiphiɔ. Nga, ekuma nɛbɔ a tɔ jǎi-jǎi. Ongodani ndiu bakpa ba ajede ndɔ ka ntanga. 12 Nga, kema nde bakpa ndɔ báogea ka bɔsɔmɛa, ande soni ka tɔ̌miagai. 13 Ande gea te, ekuma á ka kaiphiɔ bhubhui, báɔnande bhase somani. 14 Nga, somani a unge auubhisa kema ajede bhubhui. Ka bondɔ, kanisiani phɔ embɔ ndee:

Obɛ ntɔa-tɔ̌ oo, jujuka ee!

Juana sɔsɔbɛ á basí ee!

Kiísito abhɛnyande gu akɔ ee!

15 Cɔ, oengani anja ka tambea anu, bókobɛmbɛ bea babhobho, bani ndiu batɔa-kɔbɔngɛ. 16 Esa kǎnokuiɛmbɛ jǎi-jǎi ka mǒsɔ. Nga, biiki ka matu ajede. 17 Eya, bókobhobhokɛmbɛ. Ubhani ndiu mɔphɛ á Mɔkɔta.

18 Makana kanɔ́bhɛdɛmbɛ, mmbe buujukanande. Měma á Mokonga átumɛ ndiu subi anu.

19 Gbagisanagani ka měma. Embani embɔ á buku á Mokonga, embɔ á bhebha á Mɔkɔta, na embɔ nde Měma á Mokonga ǎnophangi. Eya, němbeani Mɔkɔta na měma anu bhui. 20 Nsegani Abhɛ Mokonga esa bhui ka kema bhubhui. Bosegi kau, ábɛ k'ina Mɔkɔta nɛsu Kiísito.

21 Odokomisanani ngungu anu, bíndɔ boondokomisa Kiísito.

Tambea ndea batɔ-éyamani

22 Nke-á-mbasa ándokomisɛ munyakɛ bíndɔ aongeea Mɔkɔta Kiísito. 23 Nga, moko ande mɔ á nke bíndɔ Kiísito ande mɔ á kanisa.

Kanisa ande bea nyama á Kiísito, ka nyɔngɔ nde, ěamisi batɔa- kanisa ka měma. 24 Eya, bíndɔ batɔa-kanisa báondokomisa Kiísito, akeni bake bédokomisɛ phɔtɔ bamunyabɔ ka kema bhubhui.

25 Cɔ boko, ókondani bake anu bíndɔ Kiísito dákondi kanisa, áokuia. 26 A phɔtɔ osokosa n'ibo á obatisɔ, áɔbɔngisia na bɔphɛi nɛkɛ. 27 Akondi gea, kanisa éphanisiɛ mosa akɛ, na na boombia phɛ̂, kanga á nkiki, kisɛki, na kema ajede. Mpɔ, áɔmbɔngɛa Mokonga. Aoba anja phɛ̂.

28 A phɔtɔ bó ka boko. Békondɛ bake abɔ bíndɔ bákondi nyama abɔ sasa abɔ. Nga, mmbe ankondi nkakɛ, ěkondi phɔtɔ sasa akɛ. 29 Nkpa nnaokangea nyama akɛ sasa akɛ. A ndiu oisa, áoambau, bíndɔ Kiísito aóamba batɔa-kanisa. 30 Nga, bende bea phaeka danga-danga, á nyama akɛ. 31 A tɔ bíndɔ buku á Mokonga agi:

Cɔ, moko andeketande abhakɛ n'amakɛ,

báodakateana na nkakɛ,

báoba bea nkpa mo.

32 Nyɔngɔ ndɔ ande mɛni. K'eme, mɛni ndɔ ande gu á Kiísito na kanisa.

33 Cɔ, a phɔtɔ bó ka benu: Moko bhuakɛ ánkondɛ nkakɛ bíndɔ ěkondi sasa akɛ. Nke ándokomisɛ munyakɛ.