Be kimoti ka měma, béoba na bokambia danga- danga
4
1 Cɔ, eme a ámbé bámomaki ka mekakɔ ka nyɔngɔ á bhɛdaneaga a Mɔkɔta. Bii a bó, něnodengemisigi be: Tambeani bíndɔ akeni mɔphani nɛnu. 2 Ande gea te, akeni bóbɛ batɔ-aphɔngɔ phɛ̂ n'ědhidhisa, batɔa-bɔjɛjɛ na phiphia. Eya, phiphianani k'ekondani. 3 Suiani ika ka měma mo bíndɔ Měma á Mokonga ǎnɔɔnganisi ka bɔjɛjɛ. 4 Nga, bɛɔngani be:Ekombo á baKiísito ande bea nkpa mo,Měma á Mokonga a tɔ mo.Mokonga ǎnɔɔphani ka sebea á kema moti. 5 Mɔkɔta nɛsu a tɔ mo,bebeeki tɔ nyɔngɔ mo,básobatisi k'ina mo.6 Mokonga a tɔ mo nande abha bakpa bɔbhu,ande gu á bakpa bɔbhu,bakpa bɔbhu báɔmbhɛdaneaga,naiki phɔtɔ subi á bakpa bɔbhu.
7 Nanga bii a bó, nkpa bhuakɛ sɔsɔbɛ asu a na bokambia nɛkɛ bíndɔ Kiísito angabhei. 8 Buku á Mokonga adigimisi nyɔngɔ ndɔ be:
Bii atai k'ego,
áoga na babibia akɛ, nědhungi,
áǒgabhea bakpa bokambia. a
9 Cɔ, bii agi: «atai», ande kema sina, nǎna tɔ gea te, Kiísito dádhidhi mosa ka kibha? b 10 Nga, bii Kiísito adhidhi, ye a ámbé atai gu á kobha, ka gea, ábɛ gu á kema bhubhui.
11 Cɔ, yɛ a ámbé ěbhisi buangbo,bábɛ bateki,buangbo baɔtu-nyɔngɔ,buangbo batɔmi-Nyɔngɔ Anja ndea Mokonga,buangbo baambi,buangbo baphangigi.
12 Agi bó ka gbagisa á bakpa nɛkɛ gea te, bámbhɛdaneɛgɛ. Mpɔ, áɔmɔtisaga ekombo ndea Kiísito. 13 Sungiaga á kema ndɔ bhui, ande ɔkana ka beekea a Muna-Mokonga kimoti, na ubha akɛ kimoti. Mpɔ, béoba bea ngbɛga moti, mmbe amɔti anja, nankengi tɔ Kiísito. 14 Ka bondɔ, békébɛku ye bea baniki. Badhemigi bákásobungisɛgɛku ye na bɔphɛi ajede bíndɔ kɛtɛmbɔ na maiphianɔ aophobisaga koko.
15 Békondanɛgɛni ndiu, bɛ́phɛanɛni tɔndɔ nyɔngɔ á Kiísito doni ka gea, bɛ́mɔtɛ phɛ̂, békengeanɛ na Kiísito, mmbe ande mɔ asu. 16 Yɛ a ámbé aɔ́ɔnganisa bakpa nɛkɛ gea, bábɛ kimoti bíndɔ nsisa á nkpa aojukanisa nyama akɛ. Mpɔ, phaeka a nyama danga-danga áɔbhɛda ekuma nɛkɛ ka mɔtisa á nkpa. A tɔndɔ bo ka besu batɔa-kanisia bii bɛɔmɔtaga k'ekondani.
Tambea á kɛkɛ ndea batɔ-ékombo ndea Mokonga
17 Něnogie, nenódengemisigi k'ina á Mɔkɔta be: Bókotambeɛ mɔnɔ ye bea bakpa nde bánaomǔbha Mokonga. Ubhapha abɔ a tɔ jǎi-jǎi. 18 A phɔtɔ bea kaiphiɔ. Bánauubha tambea á kɛkɛ ndea batɔa-Mokonga. Bii bánauubhapha, měma abɔ a akpɛ. 19 Bána ye okua na soni, báotunganaga phɛ̂, báogea etete á bɔjɔɔkiɔ bhubhui, bánaɔɛa ka gea á bojede.
20 Benu gǎkɛ, nna nndɔ unge bánophangigi gu á Kiísito Yéso. 21 Eya, yɛ a ámbé bɔɔki nyɔngɔ nɛkɛ, báonógoisaga kodoni akɛ. 22 Ka bondɔ, deketani tambea anu á kala, nnde dánongisi k'odhemayɔ, áonótukatuka. 23 Akeni ndiu gea, ubhapha á ka měma anu, ábɛ á kɛkɛ. 24 Mpɔ, bóoba bakpa á kɛkɛ, bunde Mokonga ěconji goto, bóoba na bonjánja na kodoni phɛ̂.
25 Ka bondɔ, deketani yɔnga á mbɛa. Yɔngɛanani tɔ doni. Nga, bende bea batɔa k'ekombo moti. 26 Kabɛ nɔbɛi, kongiɛ mɔnɔ ka bojede. O ye gǎkɛ ɔbɛa, mani kaoguiɛmbɛ no phɔ́tɔ na bɛi. 27 Kabɛ nǎna bó, Nketi áɔkɔtɔka.
28 Nkukuba kaubɛmbɛ ye goto. Abhɛdɛ ndiu ekuma anja, nnde aoeaga kau. Mpɔ, áoba n'egabhɔ ka batɔa-buyɛnɛ.
29 Nyɔngɔ ajede kajuanɛ mɔnɔ k'aphe-nɔkɔ anu. Yɔngani ndiu tɔ nnde akeni ka gbagisa a bakpa na gea anja ka bundɔ báɔnɔ́ɔka.
30 Bɔ́kɔbɛisɛmbɛ gǎkɛ Měma á Mokonga. Nga, bii Měma akɛ a ka měma akɔ, ande bea banja nde Mokonga aosaki, áoba mphaniɔ gea, obande nkpa nɛkɛ k'esa nde Mokonga ǎsophuiande ka kukua. 31 Ka bondɔ, tokisani nyɔngɔ á kokae bhui, bɛi, esuia, eongo, mbhóma, na bojede bhubhui nde a ka měma anu. 32 Phangisiani ndiu bonjánja sɔsɔbɛ anu, na měma aphɔngɔ. Boseani nyɔngɔ ajede-jede, nnde a sɔsɔbɛ anu, bíndɔ Mokonga abosei bojede nɛnu, ka nyɔngɔ á Kiísito.