Baobá́ ndea Pɔ́lɔ ka baGaatía
Mɔ á Nyɔngɔ
Animbe dádundu baobá́ nde? Dátú Nteki Pɔ́lɔ.
Dádundu ka saga sina? Dádundu ka saga bea 56, kabɛ 57, mbusa á bɔkɔtɛana á Yéso.
Dádundu ka nyɔngɔ eke? Dádundu ka nyɔngɔ nde, baKiísito baYúdha dábamamisi nyɔngɔ ɛ́ɔphi ndea Mósa, na nyɔngɔ á gua a baIsilɛ́lɛ ganja kɔnyɛ́nya beekea á Kiísito. Ande gea te, baGaatía dábatú okabaga nyɔngɔ danga-danga ka dokomisa nsebeɔ nɛbɔ ka Kiísito.
Bɔphɛi nɛkɛ dátú eke? Beami tɔ ka měma ka nyɔngɔ á beekea a Kiísito. Nna ka nyɔngɔ á amba ɛɔphi ndea Mósa na gea ékuma á ka njaga asu. Yéso a ámbé ǎsotokisi ka kɔkɔbɛ ɛ́ɔphi. Ka bondɔ, béké ye kusi ɛɔphi.
Nsesɔ
1
1-2 Ka kanisa danga-danga ndea Gaatía, sambani.Eme Nteki Pɔ́lɔ a ámbé nedundu baobá́ ndee. Banamasu bɔbhu básambei phɔtɔ.
Cɔ, nende nteki nde ba a Yéso Kiísito na Abhɛ Mokonga, mmbe dánjujukisi Yéso ka kukua. Nna nkpa ámbé amoteki. 3 Abhasu Mokonga, na Mɔkɔta Yéso Kiísito, ánophɛ bɔjɛjɛ na bonjánja nɛkɛ. 4 Yɛ a ámbé dábeeki kuia asu, áosóphuia ka bojede á ka mokonda nde, bíndɔ abhasu Mokonga dáangi. 5 Ka bondɔ, Mokonga ábɛ na boombia ka saga na saga. Abɛ bo.
Cina á boabhi ndea Pɔ́lɔ: Moangɔ ndea Kiísito a tɔ mo
6 Cɔ, neyayami phɛ̂. Nga, bokamisigi deketa á Mokonga nande yɛ ámbé dánɔɔphani ka nyɔngɔ á bonjánja ékondi ndea Kiísito. Bokěti phɔtɔ ka bea á moangɔ nɛngbo, ódhemayɔ. 7 Nga, moangɔ á Kiísito nɛngbo nna bei. Ande gea te, bakpa buangbo báonódhemaga, báokaba tukatuka á moangɔ á Nyɔngɔ Anja ndea Kiísito. 8 Cɔ, ubhani bhase gea, kabɛ nkpa sɔsɔbɛ asu bateki, kabɛ malaeka natoki na kobha, ka bɔ nǎnɔtɔ̌migi nyɔngɔ á moangɔ, nnde atinganigi ninde dɛ́bɛnɔ́tɔ̌migi, cɔ, Mokonga ányɛgɛ saga na saga. 9 Nema ogeae, a tɔ bíndɔ dɛ́bɛyɔngi mosa: Aoba nkpa nǎnɔtɔ̌migi nyɔngɔ á moangɔ, nnde atinganigi ninde dóbobeeki, Mokonga ányɛgɛ saga na saga.
Yéso Kiísito tɔndɔ a ámbé dámphangigi Pɔ́lɔ moangɔ nɛkɛ
10 Ande gea te, neókondisaga na bakpa? Ké gǎkɛ ǒkondisaga na Mokonga? Neókondisaga na bakpa, ámbe ké mbhɛdanigi á doni ndea Kiísito. 11 Baya, nekondi búubhɛ doni gea, Nyɔngɔ Anja nde nɛɔtɔmiaga, kátoki ka bakpa. 12 Bii a bó, nna nkpa ámbé dámopi. Nkpa dákámogoisigi phɔtɔ. Yéso Kiísito a ámbé dámophangigi tɔndɔ.
Pɔ́lɔ dátú moYúdha kanga á ubha a moangɔ ndea Kiísito
13 Nga, dɔ́bɔɔki tambea ani bii dé phɔ́tɔ k'esomba ndea baYúdha, na phɔtɔ bii déǒtambisaga batɔa- kanisa ndea Mokonga, néokaba tukatuka abɔ. 14 Eya, dégoigi phɛ̂ nyɔngɔ ésomba ndea baYúdha. Nɛ́ɔ̌nyɛ́nya baganja ani. Néoba na moingi ka bhɛdaneaga a Mokonga bíndɔ batatɛ dábatú ogea. a
Bii Kiísito dámɔphani Pɔ́lɔ, dákákabigi bɔphɛi ka nkpa
15 Mbusa, Mokonga, mmbe dámɔsɔmbu mosa á bɔkɔtɛana ani, áoba na mɔphɛ á ɔphana ani ka nyɔngɔ á bonjánja ékondi nɛkɛ. 16 Aomophangia gea, anakɛ Kiísito a subi ani. b Bii a bó, dákeni nɛ́tɔ̌miɛgɛ nyɔngɔ nɛkɛ ka bakpa nde bána baYúdha. Ka matu ndɔ, dékékabigi bɔphɛi ka nkpa. 17 Nê ndiu okamisaga ga na kenombe Alabhía. Mbusai, néosikianaga na Dhamasíki. Nga, dékége na Yɛusalɛ́ma k'aphe á ɔna a bateki nde ba a mosa ani.
18 Mpɔ, mbusa á basaga basaɔ, dége na Yɛusalɛ́ma k'aphe á ubhana na Nteki Pɛ́tɛɛ. Nê tɔ oika na yɛ esa nkama moti na bɔku. c 19 Dɛ́kɛ́mɔ̌ni tanda ka bateki ba angbo. Dɛ́mɔ̌ni tɔ Yakɔ́bɔ, mɔtɔ á Mɔkɔta Yéso. d 20 Cɔ, něnongodi doni mosa á Mokonga gea, kema nde něnodundui nna mbɛa.
21 Netoki ye na Yɛusalɛ́ma, néoga danga, nkɛkɛɔ á Sulía na Kilikía.
Obhebhɔ ndea baKiísito baYúdha ka nyɔngɔ á Pɔ́lɔ
22 Ka matu ndɔ, batɔa-kanisa ndea Yéso bɔbhu, bunde ba ka Yudhɛ́a, dábákáomuubha ka keongi. 23 Dába tɔ ɔɔka gea: «Nkpa nde dáosótambisaga mosa, cɔ, kɛkɛ nde, yɛ a ámbé a yetɔ ɔtɔmiaga nyɔngɔ á beekea á Yéso, nndɔ dáo tukatuka.» 24 Babeeki ndɔ bɔbhu bâ gǎkɛ ombhebha Mokonga ka nyɔngɔ ani. e