Baobá́ ndea Pɔ́lɔ ka baěphɛ́sɔ
Mɔ á Nyɔngɔ
Animbe dádundu baobá́ nde? Dátú Nteki Pɔ́lɔ bii dátú ka mekakɔ ka Lɔ́ma. Dábamaki kau ka nyɔngɔ á tɔ̌miaga á bakpa, Nyɔngɔ Anja ndea Kiísito.
Dádundu ka saga sina? Dádundu sɔsɔbɛ a saga 62 na 63, mbusa á bɔkɔtɛana á Yéso.
Dádundu ka nyɔngɔ sina? Dákondi ubhisa á babeeki, nyɔngɔ bhui ndea Kiísito.
Bɔphɛi nɛkɛ dátú eke? Pɔ́lɔ dásuubhisi gea, Mokonga kásɔmbu ekuna. Bii bende baKiísito, be yetɔ batɔ-ékombo moti, nebe na botukɔ ndea Mokonga. Akeni phɔtɔ, bɛ́bhɛdanɛgɛ nebeombanga Mokonga, kanga á pua ngungu asu. Pɔ́lɔ dági phɔtɔ gea, be k'etu na Nketi. Ka bondɔ, Mokonga ǎsoophi nkumba émani nɛkɛ.
Nsesɔ
1
1 Ka babeeki á doni ndea Kiísito Yéso, á ka ěphɛ́sɔ, sambani.Eme Pɔ́lɔ a ámbé něnodundui baobá́ ndee. Nende nteki nde ba a Kiísito Yéso bíndɔ ande mɔphɛ á Mokonga.
2 Abhasu Mokonga na Mɔkɔta Yéso Kiísito, ánophɛ bonjánja na bɔjɛjɛ.
Obhebhɔ ka tɔa á botukɔ nɛsu, ka nyɔngɔ á Kiísito
3 Obhebhɔ ka Mokonga, Abha-Mɔkɔta nɛsu Yéso Kiísito. Yɛ a ámbé ǎsophi bonjánja bhubhui ka měma asu, ka nyɔngɔ nde, bɛɔngani na Kiísito, be yetɔ subi á kɔkɔta nɛkɛ. 4 Nga, mosa-mosa á conja á mokonda, Mokonga dásɔsɔmbu gea, bébɛ bakpa ba anja phɛ̂, kanga á kisɛki mosa akɛ. Eya, dásokondi phɛ̂. 5 Ka bondɔ, dáangi mosa gea, bébɛ banakɛ ka nyɔngɔ á Yéso Kiísito. Nga, moangɔ ndɔ a unge dámbɔngɛi phɛ̂, áoba mɔphɛ akɛ. 6 Ka bondɔ, obhebhɔ, boombia, na bonjánja ábɛ ka yɛ. Nga, ǎsophi bonjánja ndɔ ka bukpɛkpɛ á miki nɛkɛ ékondi.
7 Kiísito a ámbé, dásosodu ka bojede, ka nyɔngɔ á magia akɛ. a Ka bondɔ, Mokonga aobosea bojede nɛsu. Eya, bonjánja nɛkɛ a ángbó phɛ̂, 8 abiki ka besu. Asophi ubhapha na kɔbɔngɛ ási. 9 Asophangisi bhase moangɔ nɛkɛ, nnde dásɔmi kala. Bindɔ dátú mɔphɛ akɛ, dábhisi moangɔ ndɔ ka njaga á Kiísito. 10 Mokonga atɔtɔkisande moangɔ ndɔ, k'esa nde akenande. Nga, adhondanisagande kema bhubhui á ka mokonda ninde á na kobha, áoba kusi a moamɛ mo, Yéso Kiísito.
11 Ka nyɔngɔ á Kiísito, Mokonga dásɔsɔmbu mosa gea, bébɛ subi á moangɔ nɛkɛ. Moangɔ ndɔ bhui, a tɔ mɔphɛ akɛ. 12 Besu baYúdha, débensebei Kiísito mosa-mosa, ka gea te, béndokomisɛ.
13 Benu phɔtɔ, mbenɔ nde dɔ́bɔɔki bɔphɛi á doni, nande Nyɔngɔ Anja á boamia ka měma, dóbombeeki Kiísito, bɔ́ɔɔngana na yɛ. Mpɔ, Mokonga áɔsɔ́ɔkɔa Měma Anja nɛkɛ, áoba mphaniɔ á batɔa k'ekombo nɛkɛ. 14 Měma Anja ndɔ, a phɔtɔ bea moema á botukɔ nɛsu, b bii beobondea tɔa á botukɔ ndɔ bhui. Ka bondɔ, obhebhɔ na boombia ábɛ phɔtɔ ka Mokonga.
ěmɛmi ndea Pɔ́lɔ ka baěphɛ́sɔ
15-16 Ka nyɔngɔ á bonjánja ndɔ bhui, neombhebha Mokonga ka nyɔngɔ anu, kanga á sungiaga. Nga, nɛɔki mbino á beekea nɛnu ka Mɔkɔta Yéso, n'ekondi nɛnu ka batɔa-Mokonga. Ka bondɔ, kéonóbosea mbenɔ nde nɛɔmɛma Mokonga.
17 Mmbe nɛɔmɛma, ande Mokonga, moamɛ ndea Mɔkɔta nɛsu Yéso Kiísito, mɛna-boombia. ěmɛmi nɛmɔ ande gea, Mokonga ánophɛ Měma akɛ, nga, yɛ a ámbé ande mɛna-kɔbɔngɛ. Bii a ka měma anu, áǒphanisa ka benu. Mpɔ, bóomǔbha Mokonga. 18 Akodɛ phɔtɔ měma anu bhase ka gea te, búubhaphɛ. Mpɔ, bǔubha nsebeɔ nɛnu ka mɔphani nɛkɛ. Bô phɔtɔ uubha bongbongbo á boombia akɛ, nande botukɔ nde ěbophi babeeki bɔbhu. 19 Bô phɔtɔ uubha bukpɛkpɛ ángbó phɛ̂, nnde Mokonga abhisi ka besu babeeki.
Okuu á bukpɛkpɛ nɛkɛ 20 a unge dánjujukisi Kiísito ka kukua. Mpɔ, Mokonga áombhisa na kobha ka njaga á muku akɛ. 21 Oa ndɔ, Kiísito a gu á koboamɛ bhui, bophombia bhui, bukpɛkpɛ bhui, kɔkɔta bhui na bamɛna ina á boombia bɔbhu, kabɛ ka mokonda nde, kabɛ ka mokonda, nnde abhikaeka. 22 Eya, Mokonga abhisi kema bhui kusi a Kiísito. c Bii ambhisi ye gu á kema bhubhui, â phɔtɔ ombhisa moamɛ angbongbo á kanisa. 23 Nga, kanisa ande bea nyama á Kiísito. Ande gea te, yɛ aiki subi á batɔa-kanisa bíndɔ Mokonga aiki subi akɛ.