6
1 Baya, aobá́ ka benu nangi ka bojede, ka benu bundɔ bo na Měma á Mokonga subi anu, mphɛani nkpa ndɔ, bómboteɛ k'aphe nde a anja. Geani tɔ bó na měma aphɔngɔ. Benu baphɛi gǎkɛ, óambani gea, bókongiɛ mɔnɔ ka bojede nɛkɛ. 2 Bii a bó, enganani ka nyɔngɔ akpɛ nde bo ne, nnde a ngungu anu. K'aphe ndɔ unge, bɔtɔtɔkisande ɛɔphi ndea Kiísito.3 Mmbe ěbimbikisi ka měma, nǎna gǎkɛ kema k'iso á Mokonga, ědhemi sasa akɛ.
4 Akeni ndiu nkpa áambɛ tambea akɛ sasa akɛ. Mpɔ, áǒbhebha ka nyɔngɔ ékuma nɛkɛ tɔndɔ. Kakengeanisɛmbɛ ninde á badhakɛ. 5 Nga, akeni nkpa ákumbɛ nkumba nɛkɛ sasa akɛ. 6 Ngoigi á nyɔngɔ á Kiísito, ángabheɛ gǎkɛ mphangigi nɛkɛ k'ɛtɔi nɛkɛ.
7 Bókǒdhemisɛmbɛ, nga nkpa nnaɔtɔka nandhemi Mokonga, na tɛbhɛa akɛ. Mɛni nɛkɛ ande gea, nkpa a tɔ odungua mbo nde dákoni. 8 Nga, mmbe akoni mbo ajede ka enda akɛ, adunguande kukua. Mmbe a gǎkɛ okona mbo anja ndea Měma á Mokonga, adunguande enda á mɛyɔ. a 9 Bɛ́kɛɛlɛmbɛ gǎkɛ ka gea anja. Nga, aobá́ nɛbɛ́kɛ́ɛli, bedunguande dungu anja k'esa nde Mokonga abhisi.
10 Eya, bégeeɛni bakpa bɔbhu bonjánja mbenɔ bhui. Abɛ tɔ bó phɛ̂ ka batɔa-k'ekombo ndea Mokonga.
Sungiaga á baobá́: Bakpa nde bábi moangɔ á doni, bánde batɔa-Isilaɛ́li á kɛkɛ
11 Cɔ, ɔnani bii neodundua ángbóngbó na njaga ani sasa ani. b
12 Bakpa buangbo báokaba dhakanisa á baYúdha n'ébhebha ka kema á ka nsɛngɛ. Báonósosea gusa anu ganja nɛbɔ. Báogea bó ka tea a tambaga á ka njaga á baYúdha ndɔ, ka nyɔngɔ á tɔ̌mia á nyɔngɔ á kukua á Kiísito ka mosaaba. 13 Bagu-ganja ndɔ bána gǎkɛ koamba ɛɔphi nɛbɔ bhui. Bâ ndiu okaba gusa anu ganja ka nyɔngɔ édokomisa abɔ mosa á baYúdha ndɔɔ.
14 K'eme gǎkɛ, kédokomisɛku ka kema. Ne tɔ ódokomisa ka nyɔngɔ á kukua á Mɔkɔta Yéso Kiísito ka mosaaba. Ka nyɔngɔ á mosaaba, kema á ka mokonda nna ye kema k'eme. Ké ye kema ka kema á ka mokonda. 15 Gua á ganja na ika á kanga a gua a ganja, nna ye kema k'eme. Nnde ande kema, ande gea, Mokonga ǎsoconji goto, béoba batɔa-kɛkɛ. 16 Cɔ, ka bakpa nde bábeeki moangɔ á doni ndɔ, bɔjɛjɛ na ngomi ndea Mokonga ábɛ gu abɔ. Bánde phɔtɔ batɔa-Isilaɛ́li á kɛkɛ.
17 Eme Pɔ́lɔ, nkpa kámotambisɛgɛ mɔnɔ ye goto. Nga, eepe nde ne ně, ande gea, nende mbhɛdanigi ndea Kiísito doni.
Mɔkɔ
18 Cɔ baya, bonjánja ndea Mɔkɔta nɛsu Yéso Kiísito áikɛ ka měma anu. Abɛ bo.