Bɔphɛi: Gua á ganja ndea baYúdha, ande ya á bonjánja ékondi ndea Mokonga
5
1 Kiísito ǎsotokisi doni ka kɔkɔbɛ ésomba. Ka bondɔ, békesikianɛgɛ mɔnɔ ye goto ka kɔkɔbɛ. Mamani tɔ akpɛ. a2 Nemáogeae! Eme Pɔ́lɔ něnongodi be: Kabɛ nobogu ganja ndea baYúdha, Kiísito kábɛku ye kema ka benu. 3 Nesikii goto yɔnga: Nkpa bhuakɛ, mmbe agu ganja ndea baYúdha, abande kusi ɛɔphi nɛbɔ bhui. 4 Benu bundɔ bookaba édokomisa mosa á Mokonga ka nyɔngɔ á amba ɛɔphi, ubhani gea, bokatani na Kiísito, boye phɔtɔ bonjánja ékondi nɛkɛ.
5 Besu gǎkɛ, ka nyɔngɔ á beekea a Kiísito, besebei ka bukpɛkpɛ á Měma á Mokonga gea, bebande batɔa-doni mosa akɛ. 6 Nga, ka nkpa nde aɔngani na Kiísito Yéso, gua á ganja na ika á kanga a gua a ganja, nndɔ nna na kantiti, tɔndɔ beekea á Kiísito. A unge aosóopha ekondani. 7 Beekea á moangɔ ndea Kiísito, ande bea njoko á ga á mbangɔ. Ka njoko nɛnu, dóbooga anja phɛ̂. Cɔ, animbe ǎnotenisii gea, bókombeekeɛ Mokonga doni? 8 Bakpa nde bá phɔ́tɔ okaba botea anu ka moangɔ á beekea nɛbɔ, cɔ, nndɔ kátoki ka Mokonga, mmbe ǎnɔɔphani. 9 Cɔ, bɔphɛi ajede ande bea cacu abhɔa nde aobimbisa nkɛkɛ á mokati bhui.
10 Nanga ába bo, nesebei gea, bii bɛɔngani na Mɔkɔta, bobeekeande bɔphɛi nɛmɔ. Bókóbeekeɛku ye bɔphɛi ndea nkpa ba angbó. Cɔ, ndhemigi nde aotukatuka ubhapha anu, nanga ába ani, Mɔkɔta atenaeka nyɔngɔ nɛkɛ akpɛ.
11 K'eme gǎkɛ baya, aobá́ nande doni gea, nɛɔtɔmiaga nyɔngɔ á ganja bíndɔ báɔyɔnga, cɔ, báomotambisaga ka bo? Atú oba nande doni abɔ, mmbe nyɔngɔ á kukua á Yéso ka mosaaba, kábɛku ye ephiphi ajede ka bakpa ndɔɔ. b 12 Cɔ, badhemigi nde báokaba gusa anu ganja nɛbɔ, akeni bétongoɛ yetɔ sasa abɔ!
Bɔphɛi: Tambeani bíndɔ Měma á Mokonga akondi
13 Benu baya, Mokonga ǎnɔɔphani ka tokisa anu ka kɔkɔbɛ ɛ́ɔphi. Bii a bó, ebhigɔ nɛnu ajede kanóboteɛ mɔnɔ. Enganani ndiu bea bakɔbɛ k'ekondani. 14 Nga, cina á tɔtɔkisa ɛ́ɔphi bhui ande be: «Nkonda dhakɔ sumbii ǒkondi sasa akɔ.» c 15 Bii bookokanaga na eana ngungu anu bea banyama á k'osaa, óambani, bókomoanɛgɛmbɛ.
16 Něnongodi ndiu be: Tambeani bíndɔ Měma á Mokonga akondi. Mpɔ, bókóbɛku ye na mɔphɛ á bea óbhigɔ nɛnu ajede. 17 Nga, ebhigɔ á nkpa aomana na Měma á Mokonga. Měma á Mokonga a phɔtɔ omana n'ebhigɔ á nkpa. Báopua phɛ̂. A unge bɔ́kɔ́ɔtɔka gea á kema ajede nde bokondi. 18 Bii Měma á Mokonga aónobotea, ɛɔphi nna ye kema ka benu.
19 Cɔ, beuubha bhase ekuma á nkpa nde nnaomǔbha Kiísito: otungɔ, bɔjɔɔkiɔ, komusɔngɔ, 20 boia, eemba, ngini, emani, nsengo, esuia, étondoa, katanaga, bhóma á batɔa-k'ekuna nɛngbo, 21 siki ajede, boita, konda á eaga, na kema nɛngbo nde akengeani ne. Nɛ̌̀nɔphɛi goto bíndɔ dɛ́nɔphɛi mosa gea: Bakpa nde báogea ka kema ajede ndɔ, bákángiɛku ka koboamɛ ndea Mokonga.
22 Kema nde Měma á Mokonga aobikisa subi asu ande bea gɔmba á mbuka anja, nande: ekondani, maseye, bɔjɛjɛ, phiphia, bonjánja, engana, kodoni 23 bɔphɔngɔ, ɛngɛpha. Cɔ, nna n'ɛɔphi nde aoimisia ka kema ndɔɔ. 24 Ande gea te, bakpa ndea Kiísito Yéso, bákɔkɛigi ebhigɔ ajede nɛbɔ á kala ka mosaaba. Bákɔkɛigi phɔtɔ kema ajede nde bátu okonda, ninde bátu okaba.