Digimisa á nyɔngɔ: Bo yetɔ bana-Mokonga kanga á nyɔngɔ ɛ́ɔphi
4
1 Cɔ, negie: Bii mɛna-botukɔ a phɔ́tɔ miki, kátingani na nkɔbɛ, nanga miki ndɔ ába mɛna- nkumba bhubhui, á botukɔ ndɔɔ. 2 Nga, miki ndɔ a phɔ́tɔ kusi a babondigi-tambea akɛ na nkumba nɛkɛ, ka sungiaga a saga nde abhakɛ abhisi gea, ábɛ ngbɛga. 3 Mosa á beekea a Kiísito, débetú bea baniki, bunde bá kusi á babondigi. Débetú phɔtɔ bakɔbɛ ésomba danga-danga á ka mokonda.4 Cɔ, bii saga akpeengeani ye gǎkɛ, Mokonga áonteka anakɛ, nke áɔmbɔkɔta, áoba kusi ɛɔphi 5 ka gea te, éphuiɛ bakpa nde bá kusi ɛɔphi, bábɛ bana-Mokonga.
6 Nga, ka nyɔngɔ nde bonde bana-Mokonga, Mokonga ǎsotekisii Měma á anakɛ subi á měma asu. Mpɔ, bɛ́ɔmɛma ka bukpɛkpɛ nɛkɛ n'ɛsɔ akpɛ: «Oo abhɛ!» 7 Bii a bó, ka benu nna ye nkɔbɛ. Bo ndiu bana-Mokonga. Bo phɔtɔ bamɛna-botukɔ ndea abhanu.
Digimisa á nyɔngɔ: Bii Mokonga aonúubha, eke nde bosikianigi mbusa?
8 Cɔ, bii dóbókóomǔbha Mokonga mosa, dóbotú bakɔbɛ á bakɔta á na kobha, nna k'abɔ nde ande Mokonga. 9 Kɛkɛ nde gǎkɛ, boomǔbha Mokonga. Ande gea te, aónuubha. Cɔ, eke nde bosikianigi ne goto mbusa, ka ngia a k'esomba nde nna na bukpɛkpɛ? Ande gea te, bookaba bóbɛ goto bakɔbɛ nɛbɔ? 10 Nga, bo phɔ́tɔ oamba esa, songe, matu, na saga ésomba. 11 Ka bondɔ, neotambaga ka měma ka nyɔngɔ anu. Neobanga gea, ekuma akpɛ nɛmɔ bhui, á bɔphɛi, nnde dɛ́bhɛdanigi sɔsɔbɛ anu, kakuɛ mɔnɔ etiti.
12 Baya, něnodengemisigi. Ka nyɔngɔ ɛ́ɔphi, bani be'eme. Nga, nedeketi ɛɔphi gea, nébɛ bea benu.
Dóbókómogii gǎkɛ ajede. 13 Nga, bûubha bii dékidi mɔtɛnu mosa-mosa, neneosamba. Bii détú mɔtɛnu, dɛ́nɔtɔ̌migi Nyɔngɔ Anja ndea Kiísito. 14 Nanga bii esambɔ ndɔ dámojenanisi k'iso á bakpa, dóbókómoye. Bô ndiu omosesea bea malaeka ndea Mokonga, bea Yéso Kiísito phɔtɔ. 15 Dóbotú mosa na maseye phɛ̂. Cɔ, eke nde ǎnogii ye? Něnogie, dátú oba natɔtɔkɛani, ámbe dóbophuigi mbuk'iso anu, bóomopa. a 16 Cɔ, sumbii něnongodi doni asu, ande gea te, ne yetɔ mbibia anu?
17 Badhemigi ndɔ básui botea anu k'aphe ésomba nɛbɔ ajede. Bá tɔ okaba katanisa asu na benu gea, bóbeɛ mbangɔ. 18 Atókeni gǎkɛ kabaga á bonjánja esa bhui, nanga ké sɔsɔbɛ anu.
19 Cɔ, baniki amɔ, ne goto otambaga ka nyɔngɔ anu bea nke na ka boae. Boae ndɔ asíande, mmbe bo yetɔ bakpa ndea Kiísito doni.
20 Netókondi nébɛ na benu kɛkɛ nde ka ɔkana. Nga, neónotangaaga phɛ̂.
Digimisa á nyɔngɔ: Bo bea bana-nke á mɔkɔ
21 Omongodeani phɔ, benu bunde bookaba ba á kusi ɛɔphi ndea baYúdha: Bodigimisi ɛɔphi ndɔ? Bɛɛndɔ! 22 Nga, buku á Mokonga asúubhisi gea, Abhalaámu dátú na baganda babɛ. Moti dátú muna-nkɔbɛ, ba angbó, muna-nke á ngɔa. 23 Muna-nkɔbɛ ndɔ dáonjokani bea bakpa bɔbhu. Muna-nke á ngɔa, dáonjokani gǎkɛ ka nyɔngɔ á tɔtɔkisa á mɔkɔ. 24 Nndɔ ande mɛni. Bake ndɔ bánde mphaniɔ á konsamba ibɛ. Nkɔbɛ Agái ande mphaniɔ á konsamba nde dábaɔngi ka mamba Sinái á ka Alabhía. b Bana-nke ndɔ, bánde gǎkɛ bakɔbɛ. 25 Eya, ina ndɔ: «Agái», ande ina mamba ndɔ «Sinái» ka Alabhía.
Agái ande phɔtɔ mphaniɔ á Yɛusalɛ́ma á ka mokonda ndee. Nga, ande nkɔbɛ kimoti na baniki á ka nji ndɔ, bunde bánde baYúdha. 26 Cɔ, Yɛusalɛ́ma, nnde a na kobha, nna ka kɔkɔbɛ, yɛ a ámbé ande amasu. 27 Nga, buku á Mokonga adokomisi nyɔngɔ ndɔ be:
Nke-ngomba nde ca! bá na maseye,
obɛ ambɔ kɔ́bɔkɔti.
Koga na maseye,
obɛ ambɔ kûubha kokae á boae,
ka nyɔngɔ nde, nke á keye, ěonjande baniki ba ási
kɔnyɛ́nya nke ékondi. c
28 Benu gǎkɛ baya, bo bea Isáka, miki á mɔkɔ ndɔɔ.
29 Ka matu ndɔ gǎkɛ, miki ndɔ dáonjokani bea bakpa bɔbhu, dáontambisaga miki ndɔ dábɔkɔtɛani ka bukpɛkpɛ á Měma á Mokonga. Kɛkɛ nde gǎkɛ, tambaga ndɔ, a phɔ́tɔ bei. d
30 Cɔ, buku á Mokonga agi be: «Mbeaga nkɔbɛ na anakɛ. Nga, kákeni, muna-nke á ngɔa ákatisanɛ botukɔ nde abhakɛ andeketei na muna-nkɔbɛ.» e
31 Cɔ, baya, béké bana-nkɔbɛ. Be ndiu bana-nke á doni, mmbe nna nkɔbɛ. f