Baěphɛ́sɔ 2

Bejujuki yetɔ ka kukua, ka nyɔngɔ á Kiísito

1 Benu gǎkɛ, dóboku kala ka nyɔngɔ á bojede na ya ɛ́ɔphi ndea Mokonga. 2 Bóoika subi á bojede ndɔ ka bea á tambea á ka mokonda ndee. Bô tɔ ɔmɔ̌ka moamɛ á bojede, mmbe kɔkɔta nɛkɛ a gu á baketi bɔbhu á ka mokonda. Yɛ a phɔtɔ ɔbhɛdanaga ka měma á bakpa nde bánye Mokonga. 3 Besu bɔbhu, débetú phɔtɔ bo. Béotambea bíndɔ nyama asu dátú ǒsobotea, bê phɔtɔ obea siki á nyama asu, na kanisia asu ajede. Ka nyɔngɔ óbhigɔ nɛsu ajede, esuia ndea Mokonga dátú gu asu bea bakpa bɔbhu.

4 Mokonga â gǎkɛ ǒsokuia ngomi phɛ̂, ka nyɔngɔ á bongbongbo ékondi nɛkɛ ka besu. 5 Ka bondɔ, bii débeku ye ka měma, ka nyɔngɔ á bojede nɛsu, Mokonga áosójujukisa ka kukua ndɔ, ka nyɔngɔ á ɔngana asu na Kiísito. Nga, bonjánja ékondi nɛkɛ, ande cina á boamia nɛnu ka měma. 6 Ka nyɔngɔ á ɔngana asu na Kiísito, Mokonga ǎsojujukisi ka kukua gea te, béɛ nji na yɛ ka koboamɛ nɛkɛ. 7 Agi bondɔ ka phangia á bongbongbo á bonjánja ékondi nɛkɛ ka saga na saga. Bonjánja ndɔ atɔtɔkɛani ka nyɔngɔ á Yéso Kiísito.

8 Eya, bii bombeeki Mokonga, boami yetɔ ka měma ka nyɔngɔ á bonjánja ékondi nɛkɛ. Boamia ndɔ kátɔtɔkɛani ka bukpɛkpɛ nɛnu sasa anu. A ndiu tɔ ka nyɔngɔ égabhɔ ndea Mokonga. 9 Nna ka nyɔngɔ ékuma nɛnu. Ka bondɔ, nkpa kěbhebhɛ mɔnɔ sasa akɛ.

10 Bende ekuma á ka njaga á Mokonga. Ande gea te, dásoconji goto ka bukpɛkpɛ á Kiísito Yéso. Mpɔ, bɛ́ɔtɔtɔkisa ékuma anja. Nga, Mokonga dásophi ekuma ndɔ mosa, ka gea, bɛ́bhɛdanɛgɛu.

Ɔngana asu na Kiísito

11 Cɔ, kanisiani phɔ be: Benu ibundɔ bókó k'ekuna ndea baYúdha, baYúdha báɔnɔ́ɔphana bauo. Bâ gǎkɛ kɔ̌ɔphana sasa abɔ bagu- ganja. Báɔ̌ɔphana bó, ka nyɔngɔ á mphaniɔ á ka nyama abɔ, nnde bátɔtɔkisi k'ekuma á ka njaga abɔ. 12 Mosa, dóbókótú omǔbha Kiísito. Dóbókótú baIsilaɛ́li, bunde Mokonga ɛ̌̀sɔmbu. Bô ndiu oba bakɛni. Dóbókótú subi á konsamba, nande cina á mɔkɔ ndea Mokonga. Bóoba ka mokonda, kanga á nsebeɔ, na kanga á Mokonga. 13 Kɛkɛ nde gǎkɛ, benu bunde dóbotú danga ka měma, bǒbhiimisi na Kiísito Yéso, ka nyɔngɔ á magia akɛ.

14 Be phɔtɔ na bɔjɛjɛ á konsamba ka nyɔngɔ á Kiísito. Nga, ɛ̌̀bhɛdi baYúdha, na bakpa nde bána baYúdha, áǒdhondanisaga, báoba ekuna moti. Dábatú na kema bea bogaɔ, nnde dékatisani. Bogaɔ ndɔ ande mphaniɔ á ngini, nnde dátú sɔsɔbɛ abɔ. Kiísito â gǎkɛ ɔngbɔa bogaɔ ndɔ ka nyɔngɔ á kukua akɛ. 15 Eya, aimi ɛɔphi ndea baYúdha na baniki á nyɔngɔ bhubhui nde dátú kau. Dági bondɔ ka ɔnganisa á baYúdha na bunde bána baYúdha gea, bábɛ bea nkpa moti á kɛkɛ. Mpɔ, áobhisa bɔjɛjɛ sɔsɔbɛ abɔ. 16 Ka nyɔngɔ á kukua á Kiísito ka mosaaba, yɛ aɔnganisi phɔtɔ baYúdha na bakpa nde bána baYúdha, báoba na měma mo. Nga, atokisi ngini nde dátú sɔsɔbɛ abɔ. 17 Ande gea te, Kiísito dákidi ka mokonda, áɔtɔmiaga nyɔngɔ á bɔjɛjɛ ka bakpa nde dábatú danga, na ka bunde dábatú bhîbhí. 18 Ka nyɔngɔ á Kiísito, besu bɔbhu, baYúdha na bunde bána baYúdha, be n'aphe á bhiimisia a Abhɛ Mokonga, ka bukpɛkpɛ á Měma akɛ, mmbe a tɔ mo. 19 Ka bondɔ, benu bá unge bókó baYúdha, bókó ye tanda bakɛni, bo yetɔ batɔa ka nji á Mokonga. Boiki ko, kimoti na babeeki nɛkɛ. Bo phɔtɔ batɔa k'ekombo nɛkɛ.

20 Bo phɔtɔ bea mɔphɛkɔ, nnde bateki na baɔtu-nyɔngɔ bácumi akpɛ. Kiísito sasa akɛ ande bea ngeo á mɔphɛkɔ ndɔ. 21 Nga, ka nyɔngɔ akɛ, mɔphɛkɔ bhui amamigi akpɛ, áoba endu ɛ́mɛmi, nnde Mɔkɔta Mokonga amesi mosa akɛ. 22 Benu gǎkɛ, bii bɔɔngani na yɛ, bonde be'étimo á k'endu ndɔɔ. Nga, bánocumi kimoti, mpɔ, bóoba be'éndu nde Měma á Mokonga aoika subii.