Bateki á mosa dábabeeki moangɔ ndea Kiísito bíndɔ Pɔ́lɔ dátú ɔtɔmiaga
2
1 Cɔ, mbusa á basaga nkama moti na gena, néoja na Yɛusalɛ́ma kimoti na Bhaanábha, nê phɔtɔ onga na Títɔ. 2 Dége ko nga, Mokonga a ámbé dámophangi aphe. Ko, déphangi babeeki Nyɔngɔ Anja nde nɛɔtɔmia sɔsɔbɛ á bunde bána baYúdha. Nê goto ogea bondɔ mɔtɛ a bakɔta á kanisa ka mpɛphɛ. Nga, déobangisa gea, ekuma nɛmɔ á kala ninde á kɛkɛ, kabɛ mɔnɔ etiti. 3 Bɔ, dábákánsosi tanda moGiíki ndɔ Títɔ gea, águɛ ganja. Yɛ a ámbé débetámbi na yɛ kimoti. a4 Oa ndɔ, bamunamasu á mbɛa dáběngisi sɔsɔbɛ asu ka bɔsɔmɛa, báogea bángusɛ Títɔ ganja, báengekisɛ bii bembeeki Kiísito Yéso kanga á banga esomba ndea baYúdha. Bâ ndiu okonda gea, bébɛ bakɔbɛ ésomba nɛbɔ. 5 Dɛ́bɛ́kɛ́bɔki tanda, bê ndiu okonda dokomisa á kodoni á Nyɔngɔ Anja nde bobeeki. b
6 Bakɔta á kanisa dábákádhadu phɔtɔ kema ka bɔphɛi nɛsu. Nanga bii a bó, kɔkɔta nɛbɔ dákátú kema mosa ani ka nyɔngɔ nde, Mokonga nnaɔnsɔmbɔa nkpa ka nyɔngɔ á kɔkɔta nɛkɛ. 7 Dábaɔni ndiu gea, Mokonga amopi ekuma á tɔ̌miaga á Nyɔngɔ Anja ka bakpa nde bána baYúdha. A tɔ bíndɔ dámophi Pɛ́tɛɛ ekuma á tɔ̌miaga á Nyɔngɔ Anja ka baYúdha. 8 Doni, Mokonga amɔphani Pɛ́tɛɛ, ábɛ nteki ka baYúdha, bíndɔ amɔɔphani ka bakpa nde bána baYúdha.
9 Mpɔ, Yakɔ́bɔ, Pɛ́tɛɛ, na Yoáni, bakpa nde bánde bea etimo á kanisa, báosóbeekea, eme na Bhaanábha, bɛ́ɔɔkana na bɔ gea, bégɛ mɔtɛ a bakpa nde bána baYúdha, bɔ, bágɛ mɔtɛ a baYúdha. Nga, dábaubhi bukpɛkpɛ nde Mokonga amopi ka bhɛdanaga mɔtɛ a bakpa nde bána baYúdha. 10 Dábasɔ́mɛmi tɔ gea, békanisiɛ bakusi ndea kanisa nɛbɔ. Nndɔ ungɔ détú na moingi ka tɔtɔkisai. c
Moangɔ ndea Kiísito, nnaoengeana n'ɛɔphi ndea baYúdha
11 Esa nɛngbo, eme na Pɛ́tɛɛ, béodhondana ka Antiɔkía, néonkea mosa á bakpa bɔbhu ka nyɔngɔ nde, dági ajede.
12 Nga, Pɛ́tɛɛ dáɛmbani na eaga kimoti na bakpa nde bána baYúdha. d Esa nɛngbo, bakpa nde Yakɔ́bɔ ěteki, báokidia. Mpɔ, Pɛ́tɛɛ áodoa eaga, áokatana na badhasu baKiísito, bunde bána baYúdha. Nga, dáǒbanga bateki ndɔ bundɔ dábabeeki ɛɔphi ndea baYúdha. 13 Mpɔ, badhakɛ na Pɛ́tɛɛ, báombea k'aphe á maibhe ndɔɔ. Bhaanábha â phɔtɔ ǒngisa ka maibhe kau.
14 Cɔ, bii nɛɔni ye tambea á Pɛ́tɛɛ na badhakɛ, nakáengemeani na kodoni á Nyɔngɔ Anja ndea Mokonga, néonkea Pɛ́tɛɛ mosa á bakpa bɔbhu: «Obɛ, onde moYúdha. O gǎkɛ otambea bea nkpa nǎna moYúdha, notógi anja. Cɔ, nyɔngɔ sina nde oósosea bakpa nde bána baYúdha gea, bátambeɛ bea baYúdha?»
Cina á baobá́ ndee: ěɔphi ndea baYúdha nna na bukpɛkpɛ gu á baKiísito
15 Ka bɔkɔtɛana, besu baKiísito baYúdha bende baYúdha doni, bɛyɔngi gea, bakpa nde bána baYúdha bákáambi ɛɔphi nɛsu. 16 Be gǎkɛ uubha gea, Mokonga nnaombeekea nkpa ka nyɔngɔ á amba ɛɔphi ndea baYúdha. A tɔ ka nyɔngɔ á beekea a Kiísito Yéso. Besu phɔtɔ, bembeeki Kiísito Yéso ka gea te, bébɛ batɔa-doni mosa á Mokonga. Békébɛku batɔa-doni mosa akɛ ka nyɔngɔ á amba ɛɔphi. Nga, nna na nkpa nde Mokonga ambeekeande gea te, ande ntɔa-doni, ka nyɔngɔ á amba ɛɔphi.
17 Besu baKiísito baYúdha, beokaba gea, Mokonga ásobeekeɛ ka nyɔngɔ á Kiísito. Bakpa nde bájigi k'esomba ndea baYúdha, bâ gǎkɛ ǒsogea te, bende batɔa-bojede ka nyɔngɔ á deketa ɛ́ɔphi nɛsu. Cɔ, bii báogea bó, ande gea te, Kiísito a ámbé aóbotea bakpa k'aphe á bojede? Aoboboa. 18 Nga, aobá́ nenesiki mbusa k'ɛɔphi nde dédeketi, ande gea te, něngisi goto sasa ani ka bojede. 19 Cɔ, neku yetɔ ka nyɔngɔ ɛ́ɔphi ndea baYúdha. Ka bondɔ, ɛɔphi ndɔ nna ye na kantiti k'eme. Bii a bó, ne yetɔ oenda ka nyɔngɔ á Mokonga.Eya, neku kimoti na Kiísito ka mosaaba. 20 Ka bondɔ, nna ye eme ámbé neoenda. Kiísito a ámbé a yetɔ oenda subi ani.Bii nembeeki muna-Mokonga, a unge neogea kema bhubhui ka nyɔngɔ akɛ. Nga, yɛ a ámbé dámokondi, áomokuia.
21 Kédoɛku bonjánja ékondi ndea Mokonga. Nga, aobá́ Mokonga namobeeki ka nyɔngɔ á amba ɛɔphi ndea baYúdha, cɔ, kukua á Kiísito a tɔ etiti.