Tambeani bea Kiísito, na měma édhidhisa
2
1 Cɔ, bii bo kimoti na Kiísito, nndɔ ǎnophi ntende? Ekondi nɛkɛ ka benu, ǎnoophi bɔjɛjɛ? Bo kimoti na Měma á Mokonga? Bɔ̌yɔki bonjánja na ngomi ndea Mokonga? 2 Bii a bó, ómotumisani pɛ na maseye. Ɔkanani, kondanani na měma mo, bani na moangɔ moti ka komunaměma. 3 Bókogeɛ mɔnɔ kema na měma éteba, bókokabɛ mɔnɔ boombia á jǎi-jǎi. Bani ndiu na měma édhidhisa. Kanisiani phɔtɔ gea, bakpa bɔbhu bánde baphomi anu. 4 Nkpa kakabɛ mɔnɔ édokomisa sasa akɛ. Akabɛ ndiu dokomisa á bakpa buangbo. 5 Bani phɔtɔ na mɔphɛ bíndɔ Kiísito Yéso dátú ne. 6 Dátú tɔ n'ebhigɔ bhui nde Mokonga a ne,dákátú gǎkɛ na nsengo ékengeanisa na Mokonga. 7 A ndiu ǒphuia kau,áǒbhisana bea nkɔbɛ,áokengeana na bakpa,áoba bea bɔ. 8 A phɔtɔ ǒdhidhisa sasa akɛ,áɔmɔ̌ka Mokonga,na ka bii age okua,kukua á mosaaba. 9 Ka bondɔ, Mokonga áontaisa phɛ̂,áonsua ina nde anyɛ́nyi ina bhubhui ka boombia, 10 ka gea te, bakpa bɔbhu bágbukɛ muanku, ka nyɔngɔ ína akɛ,nanga bába na kobha, nanga bába ka mokonda, nanga bába ka nkanda. 11 Mpɔ, nkpa bhuakɛ aɔyɔnga bhase gea, Yéso Kiísito ande Mɔkɔta.Ka bondɔ, Abhɛ Mokonga abande na boombia bhui.Bhɛnyani bea oanga á nsa ka keiphe
12 Baya, ka bondɔ, bii dɔ́bɔmɔɔki mosa, nene sɔsɔbɛ anu, ɔ́mɔɔkani phɔtɔ phɛ̂ bii ne danga. Nga, bii Mokonga ǎnoamisi ka měma, tɔtɔkisani boamia ndɔ na měma á banga phɛ̂. 13 Ande gea te, Mokonga a ámbé aɔbhɛdanaga ka měma anu, naónopha mɔphɛ na bukpɛkpɛ á tɔtɔkisa á moangɔ nɛkɛ. 14 Ka bondɔ, tɔtɔkisani kema bhubhui, kanga á ngɔngɔnaga na sani. 15-16 Mpɔ, bóoba kanga á bojede na kisɛki, bô phɔtɔ oba bana-Mokonga, kanga á nkiki ka měma, nanga bii bo sɔsɔbɛ a badhemigi, na batɔ-ajede ɛ́bɔkɔti ndee.
Ka bondɔ, mbenɔ nde bɔɔ́tɔmiaga bakpa Nyɔngɔ Anja, bóoba bea oanga á nsa naɔbhɛnya ka keiphe. Boogea bó, néoba na maseye ka nyɔngɔ anu k'esa á ja a Kiísito. Ka bondɔ unge, neubhande gea, ekuma na tambaga nɛmɔ bhui ka nyɔngɔ anu, dákátú jǎi. 17 Kabɛ nabámomoe, nebande na maseye. Nga, magia ani abande bea makana á phɛa ndea baYúdha, a nnde neduuki gu á phɛa nɛnu. Phɛ́a ndɔ, ande ekuma nde bɔbhɛdi ka nyɔngɔ nde, bombeeki Kiísito. Mpɔ, béoba na maseye phɛ̂ kimoti na benu, 18 bô phɔtɔ oba na maseye phɛ̂ kimoti n'eme.
Teka á Timɔtɛ́ɔ na ěpaphɔɔdhítɔ
19 Aoba Mɔkɔta Yéso nakondi, nesebei tekisia anu Timɔtɛ́ɔ kɛkɛ ndee. Ka ja akɛ, amongodeande nyɔngɔ anu, áɔmɔphɔngisa měma. 20 Nga, ké na nkpa bea yɛ, mmbé a na mɔphɛ be'eme, mmbé a phɔtɔ ǒnokanisia doni. 21 Bakpa buangbo bɔbhu bá tɔ oamba nyɔngɔ nɛbɔ sasa abɔ, bána gǎkɛ oamba nyɔngɔ ndea Yéso Kiísito. 22 Timɔtɛ́ɔ gǎkɛ, bo ye uubha tambea akɛ, bii amoengi bea miki na abhakɛ. Nga, bɛbhɛdanigi kimoti, ekuma á Nyɔngɔ Anja ndea Kiísito. 23 Cɔ, ne ye odigimisa nyɔngɔ nɛmɔ, néonteka. 24 Neubhi gea, aobá́ Mɔkɔta nakondi juanisa ani ka mekakɔ, negande phɔtɔ kɛkɛ nde k'aphe á ɔnana na benu.
25 Cɔ, neubhi gea, ande anja jisia anu nteki nɛnu ěpaphɔɔdítɔ, nande dhani k'ekuma, na k'etu. Yɛ a ámbé amotingisi nkɔkɔ. 26 Nekondi jisa akɛ, ka nyɔngɔ nde, akondi phɛ̂ ɔnana na benu bɔbhu. Nga, dátú osamba. Nanga bii aami, aubhi gea te, bɔɔki nyɔngɔ ésambɔ nɛkɛ. Ka bondɔ, aoianaga phɛ̂. 27 Eya, dátú tɔ osudukanaga. Mokonga â gǎkɛ onkuia ngomi, nna tɔndɔ yɛ, eme phɔtɔ bó. Nga, aami yetɔ. Ka bondɔ, oiɔ ángbó kámɔbhɛdɛku ye. 28 Cɔ, neokamisaga teka akɛ mɔtɛnu, ka gea, bóbɛ na maseye ka ɔna akɛ goto. Mpɔ, měma ani áɔphɔnga. 29 Cɔ, nseseani na maseye phɛ̂ k'ina á Mɔkɔta. Odokomisani bakpa nde bá bea yɛ, 30 ka nyɔngɔ nde, dásóosudukana ka nyɔngɔ á bhɛdaneaga a Kiísito. A gǎkɛ ǒoka ka kukua bii amoengi k'ɔma nɛnu.