Cina á nsebeɔ, ande Kiísito
3
1 Cɔ, baya, bani na maseye ka nyɔngɔ á ɔngana anu na Mɔkɔta.Nna kema k'eme aobá́ nenesikiigi bɔphɛi á mosa, nnde aónoamba anja.
2 Oambani na baphangigi ba ajede. Nga, bánde bambɔa. Báotetemisa gusa á ganja á mbɛa. a 3 Besu, be ndiu bagu-ganja á doni, á ka měma. Nga, bɛɔmbhɛdaneaga Mokonga ka bukpɛkpɛ á Měma akɛ. Béǒdokomisa mosa á bakpa ka nyɔngɔ á ɔngana asu na Kiísito. Nna tanda ka nyɔngɔ ésomba [ndea] bakpa, 4 nanga bii ne na bukpɛkpɛ édokomisa ka nyɔngɔ ésomba ndɔɔ.
Aoba nkpa nauubha te, a na bukpɛkpɛ ka nyɔngɔ ésomba nɛkɛ, eme, nɛnyɛ́nyi. 5 Nga, k'esa á ko 8 mbusa á bɔkɔtɛana ani, dégu ganja á baIsilaɛ́li. Eya, nende moIsilaɛ́li ka bɔkɔtɛana, ka ketoto á Bɛnjamína, nende phɔtɔ moěbhulanía doni. bKabɛ ka amba ɛɔphi, nende moPhaisáiɔ. c 6 Kabɛ ka moingi, nětambisigi batɔa-kanisa.Kabɛ k'otaɔ ɛ́ɔphi ndea Mósa, ké na kisɛki.
7 Nanga bii kema ndɔ bhubhui dátú ɛtɔi ka měma ani, a yetɔ k'eme kema á jǎi-jǎi, ka nyɔngɔ á Kiísito.
8 Eya, kema bhubhui a tɔ jǎi-jǎi. Bii nemǔbhi yetɔ Kiísito, Mɔkɔta nɛmɔ, nndɔ ande ɛtɔi á doni, á ka měma. Ka nyɔngɔ akɛ, nedeketi kema nɛmɔ bhubhui, áoba bea tǔ, ka gea te, nɛ́mɔ̌nɛ Kiísito, 9 nébɛ kimoti na yɛ doni. Nga, kéokaba ba á ntɔa-bonjánja mosa á Mokonga, ka nyɔngɔ á amba ɛɔphi ndea baYúdha. A ndiu tɔ ka nyɔngɔ á beekea a Kiísito. Eya, Mokonga amobhisi gea, nébɛ ntɔa- bonjánja mosa akɛ, bii nebi aphe á beekea a Kiísito. 10 Kema moti, nnde nekondi tɔ, ande ubha á Kiísito, na bukpɛkpɛ á jujuka akɛ, nébɛ kekua á tambaga akɛ, nékuɛ phɔtɔ bea yɛ. 11 Mpɔ, néosebea jujuka sɔsɔbɛ a basí.
12 Nna gea te, nɛtɔtɔkisi nndɔ bhui, néoba na bonjánja bhui. Ne ndiu bea ntɔa-njoko á ga á mbangɔ bii aotetemisa dhunga á bokambia. Nga, Kiísito amɔɔphani. 13 Baya, kéogea, nɛtɔtɔkisi bokambia ndɔɔ. Ne tɔ ogea kema moti bea ntɔa ga á mbangɔ ndɔɔ: Nedeketi kema ndea mbusa, néosuia kaba á nnde á mosa. 14 Neoga mbangɔ dhɛ! néjuɛ ka sungiaga a aphe á njoko ndɔɔ. Mpɔ, bokambia ndɔ, á na kobha, áomokena bíndɔ Mokonga amɔɔphanei, ka nyɔngɔ nde, nɛɔngani ye na Kiísito Yéso. 15 Ka bondɔ, besu ibundɔ bɛmɔti ka měma, bégeɛ tɔ bó. Kabɛ ka benu ubhapha akɛ na nganga, Mokonga amphangiagande bhase. 16 Nanga ába bó, akeni bétutuisɛ tamba k'aphe nde be kau.
17 Cɔ, baya, kengeagani tambea ani, ninde á bakpa nde báogea be'eme. Nga, bɔɔni mphaniɔ nɛsu. 18 Ne gǎkɛ ogama bii bakpa ba ási báotambea bea babibia á Kiísito, mmbé dáku ka mosaaba. Dénongodi bo mɔngɔ ási. Cɔ, nesikii goto. 19 Sungiaga abɔ ande bungaga. Nga, sɔphɔ ande mɔkɔta nɛbɔ á na kobha. d Boombia nɛbɔ ande soni. e Bábhisi tɔ měma abɔ ka kema á ka mokonda. 20 Besu gǎkɛ, bende baniki á nji ndea Mokonga, nnde a na kobha. Be phɔtɔ obondea kidia á Namisi nɛsu, Mɔkɔta Yéso Kiísito, mmbé atokande na kobha. 21 Yɛ, aketiande nyama asu á odo, áokengeana ninde á boombia nɛkɛ. Atɔtɔkisande nndɔ ka bukpɛkpɛ nɛkɛ, ka nyɔngɔ nde, abhisi kema bhubhui kusi akɛ.