4
1 Baya, ne na siki á ɔna anu goto phɛ̂. Ne na maseye ka nyɔngɔ anu. Nga, bonde bea kekombo á boombia nɛmɔ. Badhani ékondi, bii a bó, mamani akpɛ bii bo kimoti na Mɔkɔta.Bɔphɛi danga-danga
2 Cɔ, benu ěɔdhía na Sitíkɛ, něnodengemisigi: Bii bɔɔngani na Mɔkɔta, ɔnganani sɔsɔbɛ anu. 3 Eya, dhani á doni Sujúgɛ, nɛɔmɛmi, óenga bake ndɔɔ. Nga, bátambigi kimoti n'eme k'ekuma á Nyɔngɔ Anja ndea Kiísito. Dábatú phɔtɔ na Kɛɛmá, na badhani babhɛdanigi buangbo. Mokonga adundu gǎkɛ ina abɔ subi á buku á enda á mɛyɔ.
4 Cɔ, bani na maseye mbenɔ bhubhui, ka nyɔngɔ á ɔngana anu na Mɔkɔta. Nesikii goto: Bani na maseye.
5 Akeni bakpa bɔbhu báubhɛ bɔphɔngɔ anu. Nga, Mɔkɔta asóobhika. 6 Bókomakɛgɛmbɛ měma anu ka kema. Ngodeani ndiu Mokonga, kema nde bokondi k'ɛmɛmi nɛnu. Nsegani phɔtɔ subi ɛ́mɛmi ndɔɔ. 7 Mpɔ, Mokonga áonóamba, áobhisa bɔjɛjɛ ka měma anu, bɔjɛjɛ ndɔ nanyɛ́nyi ubhapha bhui. Aɔnɔ́phɔngisa ka nyɔngɔ nde, bɔɔngani na Kiísito Yéso.
8 Cɔ, baya, ka sungiaga:nyɔngɔ nde ande doni,nyɔngɔ nde akeni dokomisai,nyɔngɔ nde ande anja ka tɔtɔkisa,nyɔngɔ nde nna na kisɛki,nyɔngɔ nde aɔ́bɔngɛa bakpa,nyɔngɔ nde báobhebha.
Aoba kema na anja nakeni obhebhɔ, cɔ, bhisani phɔ nyɔngɔ ndɔ ka měma anu. 9 Kanisiani kema nde dénogoisigi ka bɔphɛi nɛmɔ. Kema nde bɔɔki na ɔna ka tambea ani, geani tɔ bo. Mpɔ, Mokonga, mɛna-bɔjɛjɛ, abande kimoti na benu.
Bosegi
10 Ne na maseye phɛ̂, nnde atoki ka Mɔkɔta. Nga, bomokanisi goto. Eya, dóboomokanisia mosa. Aphe á tekisia ani nkumba gǎkɛ, dákátú bei. 11 Kɛ́yɔngi bo ka gea, ne na siki á kema. Nga, nanga bii negoigi buiki bhubhui, ne na bɔjɛjɛ kau. 12 Ne phɔtɔ uubha buiki á buyɛnɛ, ninde á tɔa. Eya, negoigi phiphia á buiki danga- danga, k'ɔma bhubhui, kabɛ k'ekuta, kabɛ ka nja, kabɛ k'ɛtɔi, kabɛ ka buyɛnɛ. 13 Nɛtɔki tɔ bhui nga Kiísito a ámbé amogbagisi. 14 Nanga ába bó, bomogii phɔtɔ anja, ka nyɔngɔ nde, bomoengi ka tambaga.
15 Benu baPhilípɔ, buubhi bii dékpangi tɔ̌miaga á Nyɔngɔ Anja ka toka ani na Makɛdhɔnía. Ka kanisa bhubhui, benu tɔndɔ bá unge dóbomoengi, bóomotekisia nkumba á bhɛdaneaga, néonósikisia nkumba á ka měma. 16 Eya, bii détú na Tɛsalɔníka, dóbomoengi mɔngɔ ási, na kema nde détú na sikii. 17 Nna gea te, neokaba bokambia nɛnu, ne ndiu tɔ okaba bikisa á bokambia nɛnu á ka měma. 18 Nga, bokambia nɛnu amɔgɔbi, â phɔtɔ ɔmɔnyɛ́nyɛa. Bii ěpaphɔɔdhítɔ amopi nkɛbɛa nɛnu, ne yetɔ na kema bhui. Nga, bokambia nɛnu ande bea nyama á phɛa, nnde a na su anja. Ka bondɔ, Mokonga áobeekea, ka nyɔngɔ nde, ambɔngɛi. 19 Eya, mɔkɔta nɛmɔ Mokonga atɔtɔkisande kema bhui, nnde bo na sikii, bii ande mɛna-kema anjanja. Ageande bó, ka nyɔngɔ á ɔngana anu na Yéso Kiísito. 20 Cɔ, Abhɛ Mokonga, ábɛ na boombia ka saga na saga. Abɛ bo.
Mɔkɔ
21 Oseseani bakpa bɔbhu bunde báɔngani na Yéso Kiísito. Badhani nde ne kimoti na bɔ, bánosesi. 22 BaKiísito bɔbhu bánosesi phɔtɔ. Bunde a k'ekombo ndea moamɛ angbóngbó Kaisáia, bánosesi phɛ̂.
23 Cɔ, bonjánja ékondi ndea Mɔkɔta Yéso Kiísito, ábɛ ka měma anu.