Baoba á ko imoti ndea Pɔ́lɔ ka Timɔtɛ́ɔ
Nsesɔ
1
1 Eme Pɔ́lɔ nteki nde ba a Yéso Kiísito, ka kɔkɔta ndea Mokonga Namisi nɛsu n'inde á Yéso Kiísito mmbe bensebei, 2 eme ámbé nekodundui obɛ Timɔtɛ́ɔa miki nɛmɔ á doni subi á beekea. Ambe Abhɛ Mokonga na Mɔkɔta nɛsu Yéso Kiísito ákophɛ bonjanja ékondi, áokuiɛ ngomi na ákophɛ bɔjɛjɛ.Bókóbeekeɛmbɛ bɔphɛi á mbɛa
3 Nekondi gea, óikɛ ka Ɛphɛ́sɔ bíndɔ dékongondi bii détúoga na Makɛdhɔnía. Kó óimisiɛ bakpa nde báɔphɛa bɔphɛi á mbea. 4 Óngodeɛ phɔtɔ gea, bákábhisɛmbɛ kanisia abɔ ka nyɔngɔ á egani á jǎi-jǎi n'inde á cɔcɔa cina á batatabɔb . Nndɔ aikii tɔ kampápa étiti. Nn'aoenga ka tutuisa moangɔ á boamia nnde atoki ka Mokonga nnde aúbhikani ka nyɔngɔ á beekea.
5 Cɔ, cina á bɔphɛi ndɔ ande bhikisa ékondi nde aotoka subi á měma anja, úbhapha anja na beekea nde nna na maibhe.
6 Bakpa bunɛngbo bádu gǎkɛ aphe ndɔ báobungaga ka bea bɔphɛi á jǎi-jǎi. 7 Báokonda gea, bábɛ bea bagoisigi-ɛɔphi ndea Mósa. Báná gǎkɛ oúbha nnde báɔyɔnga kabɛ nnde báogoisaga na bukpɛkpɛ.
8 Beoúbha gea, ɛɔphi ndea Mósa aánja, aobá na bɛbhɛdi bíndɔ akeni. 9 Bê phɔtɔ oúbha gea, ɛɔphi ndɔ nna ka batɔa-doni, andiu tɔ ka bakpa nde báogea bojede, bunde báobuna ɛɔphi, bunde bákáom'banga Mokonga, batɔa-bojede na bunde báɔjɔɔkisa kema anja nɛkɛ. Ɛɔphi ndɔ a phɔtɔ ka bunde báǒma babhabɔ, bamabɔ na batɔa-kaiso, 10 batɔ-íɛbɛ boko bunde báoda na badhabɔ boko, basombisigi bakɔbɛ, batɔa-mbɛa, na bakpa nde báɔɔpha ka mbhɛa na bunde bákáobeekea bɔphɛi á kanga bojede.
11 Bɔphɛi ndɔ a subi á Mbino Anja nnde dámopi n'atoki ka Mokonga mɛnɛ á boombia na bonjanja.
Pɔ́lɔ ansegi Mokonga
12 Nembhebhi gǎkɛ Yéso Kiísito Mɔkɔta nɛsu, bii amopi bukpɛkpɛ á bhɛdanaga ekuma nɛkɛ. Aúbhi gea, nende ntɔa-doni ka nyɔngɔ nde, amobhisi k'ekuma nɛkɛ. 13 Nanga mosá détu ombhóma Mokonga, néontambisaga, néoba ntɔa-kampápa mosá akɛ, kindɔ bhui â gǎkɛ tɔ omokuia ngomi nga, débhobhoki ka kanga á beekea akɛ. 14 Eya, Mɔkɔta nɛsu abikisi phɛɛ bonjanja ékondi nɛkɛ k'eme. Amopi beekea na ekondi nnde atoki ka ɔngana ani na Kiísito.
15 Nyɔngɔ nde akeni na beekea í. Ambe bakpa bɔbhu bábeekeɛ phɔtɔ doni gea, Kiísito Yéso dábhiki ka mokonda k'aphe á amisa á batɔa-bojede. Eme nende ntɔa-bojede á ka mosá sɔsɔbɛ abɔ. 16 Ka bondɔ unge Mokonga dámokui gǎkɛ ngomi. Cɔ, Kiísito Yéso dámophiphii phɛɛ eme ntɔa-bojede á ka mosá sɔsɔbɛ á batɔa-bojede. Ndɔ ande mphangiɔ ka bunde bám'beekeande na bunde báendande mɛyɔ kimoci na Mokonga. 17 Cɔ, ka Mɔkɔta á mɛyɔ, mmbe nn'aokua, mmbe bákáɔmɔɔna Mokonga ímbe nna na dhakɛ bɛa yɛ, ambe ábɛ n'obhebhɔ na boombia ka saga na saga! Abɛ bó.
18 Cɔ, Timɔtɛ́ɔ, mukuamɔ ba ka měma, nekobhisii bɔphɛi ndɔ bíndɔ baɔtu-nyɔngɔ dábaɔtu mosá ka phɔakɔ. Ambe nyɔngɔ nde dábáɔtu unge ábɛ bukpɛkpɛ nɛkɔ subi á emani ánjá nde oka u, 19 ka amba beekea na úbapha ánjá. Bakpa bunɛngbo báyé úbhapha nɛbɔ bâ gǎkɛ obungisa beekea nɛbɔ. 20 Imɛnɛ́ɔ na Alɛkisándɛɛ bá sɔsɔbɛ abɔ. Ka bondɔ, débhisi bakpa ndɔ ka njaga á Sɛtánic ka gea báɛphɛɛ́ te, bákambhomɛmbɛ yé Mokonga.