Baobá á ko ibɛ ndea Pɔ́lɔ ka Timɔtɛ́ɔ
Nsesɔ
1
1-2 Ka Timɔtɛ́ɔa, miki nɛmɔ ba ka měma.Eme Pɔ́lɔ áambé, nteki nde ba a Kiísito Yéso, k'ekondi ndea Mokonga. Amopi ekuma á ubhisa a mɔkɔ á enda, nnde a ka moangɔ ndea Kiísito Yéso.
Bonjánja, ngomi, na bɔjɛjɛ ábɛ n'obɛ k'ina Abhasu Mokonga, na Mɔkɔta nɛsu Kiísito Yéso.
Pɔ́lɔ ansegi Mokonga na phɛa á Timɔtɛ́ɔ
3 Neonsega Mokonga, mmbe nɛɔmbhɛdaneaga na měma anja bíndɔ batatɛ dábatu ne ka yɛb. Ne phɔtɔ onsega mbenɔ nde neokokanisia k'ɛmɛmi nɛmɔ keiphe n'esa kanga sungiaga.
4 Ne phɔ́tɔ okanisia ngamɔ akɔc, ka bondɔ unge nenasiki á ɔna akɔ phɛ̂ ka gea, netumɛ na maseye. 5 Ne phɔtɔ okanisa beekea nɛkɔ á kanga á maibhɛ bíndɔ tatakɔ Luísi n'amakɔ Ɛɔníkɛ, dábatu ne mosá. Ka bondɔ, neúbhi doni gea, beekea ndɔ a phɔtɔ subi akɔ. 6 ka nyɔngɔ índɔ unge nekokanisii gea, olisa obhigɔ nde Mokonga dákophi, mbenɔ nde dékobhisii njaga. 7 Nga, Mokonga dákásophi měma á kɔbɔbɔkɔ, asóphi ndiu Měma á bukpɛkpɛ, ékondi na éamba.
8 Cɔ, kokuɛmbɛ na soni kadigimisa á nyɔngɔ ndea Mɔkɔta nɛsu. Kokuɛmbɛ phɔtɔ na soni ka phɔani ímbe neka mekakɔ ka nyɔngɔ akɛ. Tambaga ndi na eme kimoci ka nyɔngɔ á Mbino Anja nga, Mokonga aámbe akophi bukpɛkpɛ. 9 Yɛ, dásoamisi ka měma, áɔsɔ́ɔphana gea, bébɛ bakpa nɛkɛ, nna ka nyɔngɔ á ekuma nɛsu, andiu tɔ ka nyɔngɔ á moangɔ nɛkɛ sasakɛ na bonjanja á ekondi nɛkɛ. Nndɔ bhui, dásophi kimoci na Kiísito Yéso, mosá á conja á mokonda. 10 Kɛ̌kɛ nde moangɔ ndɔ aúbhikani bhase ka kidia Namisi nɛsu Kiísito Yéso. Yɛ aámbé agɔbi bukpɛkpɛ á kukua, áosóphangia bhase enda á mɛyɔ ka Mbino Anja nɛkɛ.
11 Ka nyɔngɔ á Mbino Anja nɛkɛ ndɔ unge, Mokonga dámobhisi, nébɛ ntɔnganisi mbino, nteki na mphangigi, 12 ka nyɔngɔ índɔ unge neotambaga kau. Ké gǎkɛ na soni i nga, neomuubha mmbe nem'beeki. Neengekisi gea, yɛ aámbé ana bukpɛkpɛ á amba kema nde dámopi na ka bii ajaeka.
13 Cɔ, amba á nyɔngɔ á doni nde dékongodi abɛ mphangiɔ k'obɛ. Amba u ka beekea n'ekondi nde bene subi á Kiísito Yéso. 14 Ka bukpɛkpɛ á Měma á Mokonga nnde aiki subi akɔ, amba anja nyɔngɔ nde dábakophi.
15 Cɔ, abíndɔ uúbha, bakpa bɔbhu á ka nji á Asia bámomakei ngɔngɔ. Sɔsɔbɛ abɔ ande Phigɛ́lɔ na Ɛɛmɔgɛ́nɛ. 16 Ambe Mɔkɔta ékiɛ ekombo ndea Ɔnɛsiphɔ́ɔ gomi nga, dáomokpagisaga měma mɔngɔ asi, kanga á kua na soni bii ne ka mekakɔ. 17 Bii Ɔnɛsiphɔ́ɔ dáju gǎkɛ na Lɔ́ma, dámokabi na moingi phɛ̂ na ka bii dámodhondi. 18 Ambe Mɔkɔta ánkuiɛ ngomi mosá á Mokonga k'esa nde abhikaeka. O phɔtɔ uúbha anja phɛ̂ gea dámoengi bii détu ka Ɛphɛ́sɔ.