Bɔphɛi ka ba ntɔa-emani anjanja ndea Yéso Kiísito
2
1 Cɔ, obɛ miki nɛmɔ, ba na bukpɛkpɛ ka bonjanja ékondi nde Kiísito Yéso aokopha. 2 Bɔphɛi nɛmɔ nnde dɔ́ɔki mosá á bakpa básii, ɔ́phɛá babeeki íbnde bákeni ka gea, bábɛ na bukpɛkpɛ á phɛa á bakpa buangbo.3 Tambaga bea ntɔa-emani anjanja ndea Kiísito Yéso bindɔ ne kau. 4 Nna na ntɔa-emani nde aoga k'aphe á emani n'abhisi měma akɛ ka enda nde atingani na moangɔ á emani, andiu tɔ okaba gea, mɔkɔta nɛkɛ ánkondɛ. 5 Nna phɔtɔ na ntɔa-njoko nde bánphendande ka tɔka akɛ ka njoko ndɔ, akoba na bǐ moangɔ á njoko ndɔa. 6 Ngubhi ande akeni phɔ na ntɔa á dngu ka mosá-mosá, aambɔ abhɛdanigi akpɛ. 7 Ianaga phɔ nyɔngɔ nde nɛɔyɔnga nga, Mɔkɔta akophande bukpɛkpɛ á engekisa i bhui.
8 Cɔ, nkanisia Yéso Kiísito, mosuko á Moamɛ Dhaúdhi, mmbɔ dájujuki ka kukwa bindɔ Mbino Anja nde nɛɔphɛa ayɔngi. 9 Nyɔngɔ Mbino Anja ndɔ unge neotambaga kau na ka bii bámoboege na ngoi á ngɔa bea ntɔa-bojede. Nanga bámoboaga bó, bákáboege gǎkɛ nyɔngɔ á Mokonga. 10 Ka bundɔ unge, nephiphii tambaga bhui ka nyɔngɔ á bakpa nde Mokonga ɛ̌sɔmbu ka gea, Yéso Kiísito eamisɛ phɔtɔ bɔ ka měma na tɔa á boombia á mɛyɔ. 11 Cɔ, nyɔngɔ nde akeni beekea i:
«Akoba na beku kimoci na Kiísito, beendande phɔtɔ kimoci na yɛ.
12 Akoba na beophiphia tambaga kimoci na Kiísito, beeande nji bhui kimoci na yɛ.
Kabɛ na ben'ye Kiísito, yɛ phɔtɔ, asóyande.
13 Kabɛ na békébatɔa-doni, yɛ aikande ntɔa-doni
nga, nnaɔtɔka n'angani nyɔngɔ nɛkɛ sasakɛb.»
Ba mbhɛdanigi anjanja
14 Ókanisia bakpa nyɔngɔ ndɔ bhui, ɔphɛ̂ bhase mosá á Mokonga gea, bákasanɛ mɔnɔ ka nyɔngɔ á kampapa nga, sani nna na kantíti, andiu ǒbungisaga bunde báɔɔka. 15 Cɔ, ɔbɛ ókakamisa kagea óbɛ mbhɛdanigi mmbe akeni mosá á Mokonga, mmbe kákuɛku tanda na soni, mmbe nna na soni kaphɔa ekuma nɛkɛ. Bá ndiu mbhɛdanigi nde aɔphɛa ka kodoni nyɔngɔ á doni ndea Mokonga. 16 Téa yɔngaga á jai-jai, nnde atingani na moangɔ á beekea nga, bakpa nde báobea nndɔ, báǒdangamisa na Mokonga pɛ̂. 17 Nyɔngɔ nɛbɔ abea ímbodo nde aɔdɛna ka nyama á nkpa bhui. Sɔsɔbɛ abɔ ande Imɛnɛ́ɔ na Philɛ́tɔ. 18 Bɔ, básagi bɔphɛi á doni, báɔyɔnga te, moangɔ á Jujuka á basi ka kukwa ye tɔtɔkɛani. Kabondɔ, báobotea beekea á bakpa básii k'odhemayɔ.
19 Cɔ, etimo nde Mokonga acumi akpɛ aunge aosimbia. Nyɔngɔ nde bádundu gǔ i aunge: «Mɔkɔta aǒbúbha bakpa nɛkɛc.» Goto: «Nkpa bhuakɛ mmbé aoyɔnga gea, ande nkpa nde ba á Mɔkɔta, ádeketɛ bojede.»
20 Eya, subi á endu ángbó, nna tɔndɔ na nkumba á ɔ́lɔ na ngɔa, a gǎkɛ phɔtɔ na nnde á me na toko. Nnde á ɔ́lɔ na ngɔa, báɔbhɛdaneaga ka jái, nnde á me na toko bá gǎkɛ ɔbhɛdaneaga u tiititi. 21 Aoba nkpa n'ěsokosei katokisa á bojede bhui á ka měma akɛ, ábande bea nkumba nde báɔbhɛdanaga ne ka á jái, nnde mɛn-endu abhisi ka mpɛphɛ, n'abɔngisi k'ekuma anja bhui.
22 Tea mɔphɛ á koganda, kaba ndiu bonjanja, beekea, ekondi, bɔjɛjɛ kimoci na bunde bá na měma anja, na báokumia ina á Mɔkɔta. 23 Ya kampapa á kobhobho n'índe nna na kantíti kanyɔngɔ nde uúbha gea nndɔ aobhikisa sani. 24 Cɔ, kákeni mbhɛdanigi ndea Mɔkɔta ásanɛ. Akeni ndiu ábɛ ntɔ-aphɔngɔ ka bakpa bɔbhu, mmbe aɔtɔa phangiga na phiphia á tambaga. 25 Mmbe aɔɔphɛa bakpa nde báopua na yɛ ne měma aphɔngɔ, batɔa ka kampapa, kǎsi Mokonga ěbophande měma á ketia á tambea abɔ ajede, báoúbha doni, 26 báǒsodoa ka mɛkɔ ndea Nketi, mmbe dékodi ka gea, bátɔtɔkisɛ mɔphɛ nɛkɛ.