Mɛmani kaphɔa asu
3
1 Cɔ, baya, ka sungiaga, mɛmani Mokonga kaphɔa asu ka gea, nyɔngɔ ndea Mɔkɔta ákamisɛgɛ ndanda, na bádokomisɛ phɔtɔ u bíndɔ boodokomisa mɔtɛ anu. 2 Mɛmani phɔtɔ Mokonga gea, ásotokisɛ ka njaga á bakpa bajede na bakae. Nga, bakpa bɔbhu báná na beekea. 3 Mɔkɔta ande gǎkɛ ntɔa-doni. Anógbagisande ka měma, anóambande na Nketia. 4 Bebeeki doni, Mɔkɔta asóphi nsebeɔ ka nyɔngɔ anu gea, bɔɔtɔtɔkisa na bootutuisa tɔtɔkisa kema nde beonososea.5 Ambe Mɔkɔta ánɔsɔndɔɛ ka měma k'ekondi ndea Mokonga na ka phiphia nde Kiísito aosopha.
Ambe nkpa bhuakɛ abhɛdanɛgɛ ekuma
6 Cɔ, baya, benososi k'ina á Mɔkɔta nɛsu Yéso Kiísito gea, katanani na banamanu bɔbhu íbundɔ bakusi na bundɔ báyé bɔphɛi nde dɛ́bɛ̌phɛi. 7 Nga, boyéoúbha sasanu bii akeni bea á mphagiɔ nɛsu. Kanyɔngɔ nde débékétú bakusi mɔtɛnu, 8 ka ea, eea ndea nkpa etiti. Bê ndiu ɔbhɛdanaga keiphe n'esa, béotambaga, béɔɛa ka kanga bhisa bodoko asu ka nkpa moci sɔsɔbɛ anub. 9 Débegi bo, nna gea débékétú na kɔkɔta ka gea bósoengɛ. Débekondi ndiu, deketea anu mphagiɔ ka bea tambea asu. 10 Eya, débenongodigi mɛni nde bii débetú mɔtɛnu gea: «Mmbe ayé bhɛdanaga, káɛgɛ mɔnɔc.»
11 Bɛyɔngi bo nga, básongodi gea, bakpa buangbo sɔsɔbɛ anu, bánde bakusi kanga bhɛdanaga, báikii tɔ engisa ka nyɔngɔ ndea badhabɔ. 12 Cɔ, běsosi bakpa ndɔ, bɛ́ɔ̌phɛa k'ina á Mɔkɔta Yéso Kiísito gea: Bábhɛdanɛgɛ ka bɔjɛjɛ, bátɔɛ eea nɛbɔ sasa abɔ.
13 Baya, benu gǎkɛ, bɔ́kɔɛɛ mɔnɔ ka gea bonjánja. 14 A gǎkɛ oba nkpa n'ayé bɔphɛi nɛsu nnde bedundu subi á baobá nde, mɔnjɛani nkpa ndɔ anja, bókóbɛmbɛ na yɛ kimoci, ka gea ákuɛ na soni. 15 Bókókanisiɛmbɛ gea, yɛ ande m'bibia. Mphɛani ndiu bea munamanu.
Pɔ́lɔ aɔɔkɔa
16 Ambe Mɔkɔta mɛna-bɔjɛjɛ, yɛ sasakɛ ánophɛ bɔjɛjɛ esa bhui na ka kema bhui. Abɛ na benu bɔbhu.
17 Eme Pɔ́lɔ nedundu mɔkɔ nde na njaga ani sasani nnde ande dundua nde neodunduaga ka baoba nɛmɔ bhui na bhisa á njaga ani.
18 Ambe bonjánja ékondi ndea Mɔkɔta nɛsu Yéso Kiísito, ábɛ na benu bɔbhu.