Ntɔa-motukɔ-tukɔ
2
1 Baya, ka nyɔngɔ á ja á Mɔkɔta nɛsu Yéso Kiísito na dhondanaga asu na yɛ, bekondi kaphɔa anu bea: 2 měma anu kadengɛmbɛ ka mbangɔ mbangɔ na banga aoba nkpa n'anongodi gea, esa á ja á Mɔkɔta aju. Bókǒbeekɛmbɛ, nanga báɔtɔa nyɔngɔ, nanga báphɛa, nanga bébheba sasa abɔ gea, bá na baoba nde atoki mɔtɛmɔ. 3 Ka nkpa kanódhemɛ mɔnɔ k'aphe bhubhui. Ka nyɔngɔ nde esa ndɔ kájuɛku na ka bii mbenɔ nde bakpa bán'yande Mokonga, na ntɔa-motukɔ-tukɔ aɔsɛnɛka, mmbe sungiaga akɛ ande bungaga. 4 Yɛ, ětaisande sasakɛ gǔ á kema bhui nde bakpa báobhebha na dokomisa i bea bakɔta bea bunde á na kobha, áɔtɔngana subi á endu ndea Mokonga, áǒgea sasakɛ ande Mokongab.5 Ande gea, bo bosei ye nyɔngɔ nde dénongodi bii détú phɔtɔ na benu? 6 Cɔ, kɛ̌kɛnde, bo gǎkɛ oúbha kema nde aoimisia kidia akɛ ka gea, ábɛ tɔ ka mbenɔ nde akeni. 7 Nga, Ntɔa-motukɔ-tukɔ a ye tɔ ɔbhɛdanaga ka bɔsɔmɛa. A gǎkɛ oba kema nde aonimisia kɛ̌kɛnde na ka ye bei, mpɔ áɔbhɛdanaga bhase. 8 Mpɔ, ntɔa-motukɔ-tukɔ áɔɔnɛkana bhase. Mɔkɔta Yéso amoande na ɛphɛu á k'aphɛnɔkɔ akɛ, na agobande bukpɛkpɛ akɛ ka mbenɔ nde abhikande kauc. 9 Bhika á ntɔa-motukɔ-tukɔ abande ka bukpɛkpɛ á Sɛtáni, aɔtɔtɔkisa etete bhubhui á ketangaɔ na mphangiɔ bhui, á odhemayɔd. 10 Ageande bojede ódhemayɔ bhubhui ka dhema á bakpa bunde bákeni na bungaga nga, dábákábeeki na konda kodoni nde dáɔtɔka amisa abɔ ka měma. 11 Ka nyɔngɔ índɔ unge, Mokonga ětekisii bukpɛkpe á odhemayɔ kagea, bábeekeɛ nyɔngɔ á mbɛa. 12 Ka bondɔ, Mokonga átenɛ nyɔngɔ á bakpa bɔbhu bunde bákábeeki doni, bâ ndiu okonda bojede.
Mokonga asɔ́sɔmbu ka amisa asu ka měma
13 Baya, akeni gǎkɛ besu bémbhebhɛ Mokonga esa bhui ka nyɔngɔ anu, benu íbunde Mɔkɔta anókondi. Ande gea, Mokonga dákpangi sɔmbɔa anu ka gea, bóamɛ ka měma ka bukpɛkpɛ á Měma á Mokonga nnde aonobotea ka enda anja, phɔtɔ ka nyɔngɔ nde bobeeki doni. 14 Mokonga dánɔɔphani ka boamia ndɔ k'aphe á Mbino Anja nde dɛ́bɛnɔ́phɛi, kagea, bóbɛ na boombia ndea Mɔkɔta nɛsu Yéso Kiísito.