Ambe bakiísito bámɛmɛ Mokonga ka phɔa bakpa bɔbhu
2
1 Mosá á kema bhubhui, nɛnɔphɛi gea, bómɛmɛ ka phɔa á bakpa bɔbhu. Mɛmani Mokonga ka gea áéengɛ, ábhisɛ njaga akɛ gǔ abɔ na bónsɛgɛ Mokonga ka phɔabɔ. 2 Baamɛ na bakɔta bɔbhu á nji ka geate, béikɛ ka bɔjɛjɛ, phio! Bébɛ tɔ batɔa-bonjánja na banga á Mokonga. 3 Nndɔ unge aánja n'ambɔngɛi Mokonga, namisi nɛsu. 4 Nga, yɛ akondi bakpa bɔbhu báamɛ ka měmaa, báúbhɛ kodoni.5 Mokonga a tɔ mo. Mɔnganisi á bakpa na Mokonga a tɔ mo, n'ande nkpa, Kiísito Yéso, 6 mmbe dábhisi enda akɛ sasakɛ ka phɛ́a ka nyɔngɔ á amisa á bakpa bɔbhub. Nndɔ unge adigimisi ka mbenɔ nde Mokonga dábhisi gea akondi amisa á bakpa bɔbhu.
7 Ka nyɔngɔ índɔ unge Mokonga dámobhisi ntɔmi-mbinɔ na ntekic, ka phangiga á bunde báná baYúdha nyɔngɔ á beekea na doni. Kɛ́ɔyɔnga mbɛa, ne tɔ ɔyɔnga doni.
Tambea nde akeni ka bǒko na bake ka kanisa
8 Cɔ, nekondi phɔ́ gea, bǒko bámɛmɛ k'ɔma bhu na bámɛsi njaga. Akeni bágeɛ bó na měma ánjá kanga á bɛi na sanid.
9 Nekondi goto gea, bake báɔlɛ ngɔmbɛ bindɔ akeni. Kábɛmbɛ ngɔmbɛ nde aobotea iso á bakpa, bákáɛtɔndɛmbɛ na kema nde bábɔngisigi na ɔlɔ n'inde a n'esombi akpɛ, bákáɔlɛ phɔtɔ ngɔmbɛ nde an'esombi akpɛe. 10 Bɛ́tɔndɛ ndiu na tambea anja nnde akeni ka bake bunde báokaba bhebha á Mokonga.
11 Akeni bake báɔkɛ bɔphɛi na bákɔbi, phio! 12 Kékondi gea, bake bɛ́phɛ̂ boko. Bákabɛ mɔnɔ na bukpɛkpɛ gu abɔ. Bádhakanɛ ndiu, phio!
13 Nga, Mokonga dánconji Adhámu mosa, mpɔ Aɔa. 14 Nga, Ndhemigi dákándhemi Adamu, tɔndɔ Aɔa, áoba ntɔa-bojede.
15 Cɔ, bake bábande na bɔjɛjɛ ka nyɔngɔ ɛ́bɔkɔti. Mokonga ěamande, aobá́ nabátutuisi beekea á Mokonga, ekondani, na měma á bonjánja.