Moangɔ á enga á babeeki danga-danga
5
1 Konkeɛgɛmbɛ ngbɛga, ntɔ̌mia ndiu nyɔngɔ bea abhakɔa. Ɔ́tɔ̌mia phɔtɔ baganda nyɔngɔ bea bamunamakɔ, 2 bagbɛga á bake bea bamakɔ, na basɛka bea baoakɔ kanga ba na kanisia ajedi kaphɔa bɔ.Moangɔ á enga Bake á kekusa
3 Ódokomia bake á kekusa, íbundɔ bána na bakpa doni k'ekombo ka enga abɔ. 4 A gǎkɛ oba nke á kekusa n'ana baniki na basuko, akeni batɔa-k'ekombo nɛkɛ bágoɛgɛ tɔtɔkisa á ekuma nɛbɔ kaphɔa batɔa k'ekombo nɛbɔ sasabɔ bindɔ moangɔ á Monga asosi, na béjisiɛ babɔkɔti abɔ na batatabɔ bonjanja nde dábégǐne nga, nndɔ unge am'bɔngɛi Mokonga. 5 Nke á kekusa ímbɔ nna na nkpa doni k'ekombo ka enga akɛ, ansebei mɔɔ tɔ nɛkɛ Mokonga. Ye, aɔmmɛma Mokonga ka enga akɛ keiphe n'esa kanga deketa. 6 Nke á kekusa ímbe gǎkɛ oenda ka tambea ajede, nanga a phɔ́tɔ koenda, a ye ku. 7 Nndɔ unge óngodea goto bake á kekusa ka gea, nkpa kɛ̌yɛyɛmbɛ mɔnɔ. 8 Aoba nkpa na káǒamba bakpa nɛkɛ na amba phɛ̂ batɔa k'ekombo nɛkɛ, mmbɔ aye beekea nɛkɛ na yɛ aajede phɛ̂ kɔnyɛnya mmbé kábeeki.
9 Ka mɔɔmba á bake á kekusa, dundua tɔ ina á mmbé ajusi basaga nkama njia á njaga (60). Akeni phɔtɔ mmbé dáɔmani tɔ na mǒko mocib. 10 Ambe bakpa bádigimisɛ gea ékuma nɛkɛ dátú anja, mmbé dɛ́mɔtisi banakɛ anja, dáǒsesea bakeni, dáosokosa ecinji á babeekic, dáǒenga bunde dábáotambaga na gea ekuma anjanja bhui ka enda akɛbhui.
11 Kodunduɛmbɛ gǎkɛ ina á bake á kekusa íbunde bá phɔ́tɔ baseka nga, siki éyamani aɔɔbhɛda, báodeketa bhɛdaneaga á Kiísito na 12 doa mɔkɔ nɛbɔ á mosá na Kiísito, báoba na bojede ka měma. 13 Goto, báoutua, báoga na báɔkɔba k'endu danga danga na báɔdɛgia na ngiaga ka nyɔngɔ bhi, báɔyɔngaga nyɔngɔ nde bákakeni yɔnga i. 14 Cɔ, nekondi gǎkɛ bake á kekusa íbunde bá phɔ́tɔ baseka, báɔmanɛ, bɛ́bɔkɔtɛ baniki, báambɛ endu nɛbɔ kagea, babibia asu bákabɛmbɛ n'aphe moci nde básobhomande kau. 15 Negi bo nga, ana bake á kekusa bangbo bunde bábungigi ka bea á Sɛtáni. 16 Aoba nke m'beeki n'agǎkɛ na bake á kekusa k'ekombo nɛkɛ, ambe éambɛ ka gea, kanisa kakumbɛmbɛ bodoko abɔ. Aoge bó, kansia akumbande ye tɔ bodoko á bake á kekusa íbunde báká duni na bakpa k'ekombo ka amba abɔ.
Enda á bagbɛga á kanisa
17 Ambe bédokomisɛ bagbɛga íbunde báoamba kanisa anja mɔngɔ ibɛd, a goto phɛ̂ ka bunde báɔphɛa na phangiaga. 18 Cɔ, buku á Mokonga anyɔngi be: «Kodakɛ mɔnɔ aphɛnɔkɔ á ngɔmbɛ, mmbe aobotaga me á dhoa á mponga.» Goto: «Mbhɛdanigi akeni ophendɔ nɛkɛe.»
19 Kóbeekeɛmbɛ kɛtɔngi á ngbɛga akoba bakpa babɛ kabɛ basaɔ na bakadigimisif. 20 Bunde báogea bojede, ngodani bojede nɛbɔ mosá á bakpa ka gea, bunɛngbo bábɛ phɔtɔ na kɔbɔbɔkɔ. 21 Nekososi bhase mosá á Mokonga na mosá á Kiísito Yéso, na bamalaeka á kanga bojede gea, amba bɔphɛi nde kanga obayɔ, phɔtɔ kanga egami mbenɔ nde ɔɔbhɛdanaga. 22 Kokamisɛgɛmbɛ bhisia á nkpa njaga, kongamɛmbɛ nkpa ka bojede nɛkɛ. Obɛ sasa akɔ, óamba kanga bojede. 23 Konoɛmbɛ tɔ ibo, noa ndiu makana anjɛ abhɔa ka nyɔngɔ á kukua á ka sɔphɔ akɔ na ɛlanga á nyama akɔ.