Tetemisa ékuma ndea Pɔ́lɔ: Bateki á mbɛa na bateki á doni
11
1 Cɔ, beekeani phɔ ɛsɔ ani nanga bii neóbhebha sasa ani bea mbhobho.Nesebei gǎkɛ gea, bomobeekeande. 2 Nga, něnokondi phɛ̂, ne na nsengo ndea Mokonga ka nyɔngɔ anu. Dɛ́nɔɔku bea abha-nseka namɔku munyanakɛ moti tɔndɔ. Munya-nseka ndɔ, ande Kiísito. Netókondi gea, nseka ndɔ ábɛ nseka á doni phɛ̂ k'esa éyamani. 3 Ne gǎkɛ obanga gea, bateki á mbɛa bákanódhemɛgɛmbɛ, bóodeketa aphe anja á beekea a Kiísito, bíndɔ Nketi dángi subi á njɔka, áondhemaga Aoa na maibhe nɛkɛ. 4 Nga, aobá́ nkpa nǎnodhondi ka phɛa anu, bóombeekea mbangɔ. Boogea bó nanga bɔphɛi nɛkɛ gu á Yéso átinganaga, nanga měma akɛ átingana ninde a yetɔ subi anu, nanga nyɔngɔ nɛkɛ átingana na Nyɔngɔ Anja ndea Mokonga, nnde bobeekima mosa, bii bɛ̌̀nɔtɔ̌migi.
5 Cɔ, bûubha te, bakpa ndɔ bánde bateki ba angbóngbo. Bákamɔnyɛ́nyi gǎkɛ. 6 Nanga bii kéuubha yɔnga anja, ne ndiu na ubhapha bíndɔ bûubha bhase k'ekuma nɛmɔ bhui. 7 Mbenɔ nde dɛ́nɔtɔ̌migi Nyɔngɔ Anja ndea Mokonga, néoba nkpa á jǎi, ka gea te, bóbɛ kema k'iso á Mokonga. Nga, dɛ́kɛ́nɔmɛmi bangɔa. Cɔ, dégi ajede?
8 Nga, déphusi kanisa nɛngbo bii dɛ́ɔnɔ́bhɛdaneaga. 9 Bii détú mɔtɛnu, nna na nkpa nde dátú omogabhea kema nde détú na sikii ka buiki ani. Badhani babeeki á ka Makɛdhɔnía bá unge dábamobhikii na nkumba bhui. Ka bondɔ, dékénodokomanei gǎkɛ. Cɔ, nɛsɛkɛdisande gea á bo ka benu. 10 Bii kodoni á Kiísito a subi ani, nɛyɔngi be: Něbhebhande ka nyɔngɔ nde, nɛɔbhɛdanaga kanga óphendɔ ka Akáia bhui. a 11 Cɔ, ama bo? Nesagi ophendɔ ka nyɔngɔ nde kénokondi? Bɛɛndɔ, Mokonga auubha.
12 Nga, kema nde neogea, netutuisande gea te, bakpa nde báokaba édokomisa k'ekuma nɛbɔ bea besu, bákabɛku ye na bukpɛkpɛi. b
13 Nga, bateki á mbɛa ndɔ, bánde phɔtɔ badhemigi k'ekuma nɛbɔ, báǒkengeanisaga ka maibhe gea, bánde bateki ndea Kiísito. 14 Bókotangaɛgɛmbɛ nndɔ. Nga, Sɛtáni aógaia sasa akɛ, áoba malaeka nde ba a Mokonga. 15 Bii a bó, bókotangaɛgɛmbɛ sumbii babhɛdanigi ndea Nketi báǒgaia, báoba babhɛdanigi ndea Mokonga, nande mbɛa abɔ. Cɔ, sungiaga abɔ abande ajede ka beana na kema ajede nde báogea.
Tetemisa ékuma ndea Pɔ́lɔ: Dokomisa ékuma ndea Pɔ́lɔ ka tambaga akɛ
16 Nesikii goto yɔnga: Bókuubhɛmbɛ te, nende mbhobho. A gǎkɛ oba noboogea bó, ómobeekeani tɔ bíndɔ boombeekea mbhobho ka gea, nébhebhɛ abhɔa. 17 Nanga bii neódokomisa doni, nna tambea á Mɔkɔta Yéso, a tɔ tambea á mbhobho. 18 Bakpa ba ási bâ gǎkɛ ǒdokomisa na kema nde báogea, cɔ, nědokomisande phɔtɔ sasa ani bó.
19 Boogea te, bûubhapha. Cɔ, bǒphiphia babhobho ka bo? 20 Nga, bǒphiphia bateki á mbɛa bunde báɔnɔ́kɔ́bisa bea bakɔbɛ. Báoea nkumba nɛnu, báonódhema, báǒbhisa gu anu, báɔnɔ́bɛta ka keongi. 21 Cɔ, eme Pɔ́lɔ, neutu phɛ̂! Nga, kégi bea bɔ. Ande soni k'eme!
Oo! nɛɔyɔnga bea mbhobho. Nga, nekondi édokomisa bíndɔ bakpa buangbo báosuia. 22 Báogea te, bánde baěbhulanía. Cɔ, eme phɔtɔ bó. Bâ phɔtɔ ogea bánde baIsilaɛ́li. Eme phɔtɔ bó. Basuko á Abhalaámu? Cɔ, eme phɔtɔ bó. 23 Babhɛdanigi ndea Kiísito? Eme phɔtɔ bó.
Cɔ, ké phɔ ama-nyai bii nɛɔyɔnga bende? Nɛ̌̀nyɛ́nyi bakpa ndɔ phɛ̂: kabɛ k'ekuma akpɛ, makea ani ka mekakɔ mɔngɔ ási, binda ani ási, néoba bhíbhí á kukua mɔngɔ ási. 24 BaYúdha dábamobindi mɔngɔ 39 na ngoi. Dábamogii bo mɔngɔ bɔku. 25 BaLɔ́ma dábamobindi gbutu mɔngɔ isaɔ. Esa nɛngbo, BaYúdha bâ phɔtɔ omomakea ɛtɛ ka kusa ani.
Déini na koko mɔngɔ isaɔ ka nyɔngɔ á kɛtɛmbɔ, koko áomodeketa subi íbo. K'esa ndɔ imoti, néoika k'ibo somani na keiphe, néosombia á nkaa.Mex(ico) BD, black and white, place caption below pictureKoko áomodeketa subi ibo.near 2 Corinthians 11.25
26 Ka tamba nɛmɔ, détambigi ási phɛ̂. Déotambaga ka nyɔngɔ á kampongo, bayoyombi, batɔa-k'ekuna nɛmɔ ajede, batɔa-k'ekuna nɛngbo ajede, nyɔngɔ á ka nji, nyɔngɔ á k'osaa, nyɔngɔ á k'Obenge. Mbusa, badhani baKiísito á mbɛa báomoya. 27 Détambigi k'ekuma ási, nɛ́ɔphɛa tɔ̌, néoba na nja n'ɛnɔta, néosaga eaga ka nyɔngɔ ékuma. Néoba na phiɔ, néoba ndumbu.
28 Kanga á kanisia goto nyɔngɔ á ka nsɛngɛ, neoianaga phɛ̂ esa bhui nyɔngɔ á amba a kanisa bhubhui. 29 Aoba nkpa nǎna akpɛkpɛ ka beekea, nê phɔtɔ ɔ̌yɔka bó. Nkpa aogua ka bojede, nyɔngɔ ndɔ áomokaea phɛ̂.
30 Nga, kabɛ ne na siki édokomisa, ábɛ tɔ ka nyɔngɔ á utua ani. c 31 Mokonga, abha-Mɔkɔta Yéso, mmbɔ obhebhɔ nɛkɛ ande mɛyɔ, auubha gea, kɛ́ɔyɔnga mbɛa.
32 Bii dékpangi bhɛda ékuma ndea bateki ka Dhamasíki, ka saga á moamɛ Aɛ́ta, mɛna á nji áǒbhisa babondigi ka ngba a nji gea, bámodhungɛ. 33 Ka bondɔ, badhani báɔmɔbhɛda, báomomakea ka jɔ, mpɔ, báomophodisa ka boenga nde dátú ka bogaɔ ángbó á ngba a nji, báomodhidhisa ka nsinɔ, néotea.DCC Acts 72. Place caption below pictureBáomomaka ka jɔ, báomophodisa ka boenga nde dátú ka bogaɔ á ngba a nji, báomodhidhisa ka nsinɔ.near 2 Corinthians 11.33