Tetemisa ékuma ndea Pɔ́lɔ: Ekuma nɛkɛ ande be'etu
10
1 Eme Pɔ́lɔ, něnodengemisigi.Bakpa báomogea te, ne aphɔngɔ mbenɔ nde ne sɔsɔbɛ anu. Ne gǎkɛ nkae mbenɔ nde ne danga. Nekondi ndiu nébɛ tɔ aphɔngɔ, nébɛ phɔtɔ nkpa anjanja bea Kiísito.
2 Něnodengemisigi gǎkɛ be: Mbenɔ nde nejuande, kékondi nébɛ nkae na mbhɛdɛi-nyɔngɔ. Neuubha gea á bó ka bakpa nde báogea, nɛɔbhɛdanaga ka kaba ɛtɔi bea bakpa bɔbhu. 3 Cɔ, nanga béba batɔa ka mokonda, békéomana bea bɔ. 4 Nga, nkumba émani nɛsu nna á ka mokonda nde, a ndiu otoka ka Mokonga, na na bukpɛkpɛ á uja etubu á babibia nɛkɛ. Beotukatuka ubhapha abɔ ajede. 5 Beogusa kema bhubhui nde aoimisia gea, bakpa bám‹bhɛ Mokonga. Ubhapha ajede áoba bea ntɔ-émani, mmbe bándhungi, báomakea ka mekakɔ geae, ámɔ̌kɛ tɔ Kiísito. 6 Bii bakpa ba ási sɔsɔbɛ anu bá ye osóbeekea, bebande bhíbhí ka tena a nyɔngɔ akpɛ, á bakpa nde básoye.
Tetemisa ékuma ndea Pɔ́lɔ: Dundua nɛkɛ na tambea akɛ, a tɔ kimoti
7 Bo tɔ ɔɔna kema á ka nsɛngɛ. Aoba nkpa nauubha te, ande nkpa ndea Kiísito, áubhɛ gea, besu, be phɔtɔ bó. 8 Cɔ, ké na soni nga, kɔkɔta nde neóbhebha ne abhɔa, Mɔkɔta a ámbé ǎsophi gea, bénomamisɛ. Békéokaba gusa anu.
9 Ké phɔtɔ okaba bangisa anu ka baobá́ nɛmɔ. 10 Nga, báogea te: «Baobá́ nɛmɔ adoko, na akpɛ. Mbenɔ nde neoba sɔsɔbɛ anu, néoba aɔlɔ, nyɔngɔ nɛmɔ â tɔ oba jǎi-jǎi.» 11 Cɔ, aobá́ na ka bakpa naɔyɔnga bó, áubhɛ gea, dundua nɛsu na tambea asu, a tɔ kimoti, nanga béba danga, nanga béba sɔsɔbɛ anu.
Tetemisa ékuma ndea Pɔ́lɔ: Kaba tɔ obhebhɔ ndea Mɔkɔta
12 Doni, béké tanda okaba ékengeanisa na batɔa-maca, bii báǒdokomisa sasa abɔ. Bá ndiu babhobho nga, báokaba ékengeanisa sasa abɔ. a 13 Besu gǎkɛ, békéǒdokomisa ka tinga ekuma nde Mokonga ǎsoophi. Ekuma ndɔ bɛ̌̀nɔgɛndɛi ne.
14 Bii débeju ye mɔtɛnu, débékétingi ekuma nde Mokonga dásophi. Bê ndiu oba batɔa mosa-mosa ka tɔ̌mia anu nyɔngɔ anja ndea Kiísito. 15 Cɔ, békéǒdokomisa k'ekuma ndea bakpa buangbo, nnde nna nyɔngɔ nɛsu. Besebei ndiu gea, bɔmɔtande ka beekea nɛnu. Mpɔ, ekuma nɛsu â phɔtɔ ondanda 16 ka mokonda á kɛkɛ, bii bɛɔɛmbisa Nyɔngɔ Anja ndea Kiísito.
Nga, békékondi édokomisa k'ekuma nde bakpa buangbo dábabhɛdanigi. 17 Be gǎkɛ obea nyɔngɔ nde a subi á buku á Mokonga: «Nkpa nde aódokomisa, édokomisɛ tɔndɔ ka kema nde Mɔkɔta agi ka yɛ.» b 18 Nga, nkpa nde aódokomisa sasa akɛ, nna ámbé Mɔkɔta ambeeki. A ndiu nkpa nde Mɔkɔta andokomisi sasa akɛ.