2 Bakɔlítɔ 9

Dhondanisa á bangɔa ka batɔa ka Yudhɛ́a: Phuia tɔ na maseye

1 Baya, kákeni goto nénodunduiɛ nyɔngɔ á bangɔa nde bětekisiande bakpa ndea Mokonga. 2 Neubhi ye mɔphɛ anja anu. Ka bondɔ, něbhebhi ka nyɔngɔ anu, mosa á batɔa ka Makɛdhɔnía. Néǒgea, benu baɔa ka Akáia, botúma bhíbhí ka saga nde anyɛ́nyima ka dhondanisa á bangɔa. Bii něngodi bo, bakpa ba ási sɔsɔbɛ abɔ báǒyamea ka enga a bakpa ndɔɔ. 3 Kɛkɛ nde gǎkɛ, něnotekisii badhasu ndɔ ka gea, bɔ́bɔngisiɛgɛ bangɔa mosa á kidia ani, bíndɔ dénongodi. Nga, débhebhi ka nyɔngɔ anu mosa á batɔa ka Makɛdhɔnía. Cɔ, obhebhɔ nɛmɔ mosa abɔ kabɛmbɛ jǎi. 4 Nga, aobá́ nenekidi ye na batɔa ka Makɛdhɔnía ndɔ, nobókódhondanisimbɛ ka kema, ámbe bekuande na soni, na benu phɔtɔ, ka nyɔngɔ nde, běnosebei. 5 Ka bondɔ, nɛtɔ́ɔni a anja, ɔphana badhasu ndɔ, bámɔmɛɛ mosa ka ga á mɔtɛnu. Bá ye okidia, bábhisande moangɔ égabhɔ ékondi nɛnu bíndɔ dɔ́bɔɔku mosa, áoba egabhɔ á měma anja, kanga á sosea anu.

6 Cɔ, kanisiani phɔ mɛni ndee: «Ookona abhɔa, óodungua abhɔa. Ookona ási, óodungua asi.» 7 Akeni nkpa áphuiɛ bangɔa bíndɔ měma akɛ akondi. Kaphuiɛ mɔnɔ na měma á bɛi, phɔtɔ ka nyɔngɔ á sosea akɛ. Nga, Mokonga ankondi nkpa nde aophuia na maseye.

Dhondanisa á bangɔa: Obhebhɔ ndea bakpa nde bábhɛdande egabhɔ

8 Mokonga a na bukpɛkpɛ á opha anu kema ási kɔnyɛ́nya nnde bo na sikii ka gea, bóbɛ na nkumba ási ka tɔtɔkisa á kema anja bhubhui. 9 Nga, buku á Mokonga adigimisi nyɔngɔ ndɔ bende: «Agabhi nkumba ási ka bauki. Bonjánja nɛkɛ ande á mɛyɔ.» 10 Ande gea te, Mokonga aomopha ngubhi, eea k'ekuma na mbo ka konai. K'aphe ndɔ unge, Mokonga ǎnoophande phɔtɔ nnde akeni ka mɔtisa na bikisa á bonjánja nɛnu mosa akɛ. 11 Ka bondɔ, ǎnɔtɔisande ási ka gea, bóbɛ na bukpɛkpɛ á gabhea á bakpa mbenɔ bhui, bii bo na měma anja. Mpɔ, báombhebha Mokonga ka nyɔngɔ égabhɔ nɛnu.

12 Nga, ekuma ndɔ bɔɔbhɛdanaga, nna tɔ ka enga a bakpa ndea Mokonga. Bakpa ndɔ bámbhebhande phɔtɔ Mokonga. 13 K'ekuma ndɔ bobeeki, bǒphangiande bakpa bhase bii bobeeki moangɔ nde aotámba kimoti na nyɔngɔ anja ndea Kiísito, nnde bɔɔ́tɔmiaga bakpa. Abande phɔtɔ mphaniɔ á komunaměma nɛnu ka bakpa nde bǒbophande egabhɔ nɛnu. Eya, a tɔ bíndɔ boógabhea bakpa bɔbhu. Abande phɔtɔ obhebhɔ ka Mokonga. 14 Bakpa ndɔ bámɛmande Mokonga ka benu, bii báɛmbani na benu k'ekondani, ka nyɔngɔ á bonjánja ángbó nde Mokonga abhisi ka měma anu. 15 Cɔ, obhebhɔ ábɛ ka Mokonga ka nyɔngɔ á égabhɔ nɛkɛ ángbó phɛ̂.