Moangɔ á dhondanisa á bangɔa ka bunde báosía na nja na Yudhɛ́a
8
1 Baya, bekondi búubhɛ bii Mokonga agi anja phɛ̂ ka kanisa bhubhui á ka Makɛdhɔnía. 2 Nanga bátambaga ási, báoba na maseye phɛ̂. Nanga báuka phɛ̂, báogabha ási. 3 Nɛɔni bii báphui bangɔa na bukpɛkpɛ nɛbɔ bhui. Mbusa, bâ goto ophuia ási phɛ̂ kanga á sosea abɔ. 4 Dábasódengemisigi phɛ̂ mosa gea, bángiɛ ka nyɔngɔ égabhɔ á bangɔa ka baKiísito bunde bá ka Yudhɛ́a. 5 Báosóenga kɔnyɛ́nya nsebeɔ nɛsu. Nga, dáběbhisi ka njaga a Mɔkɔta sasa abɔ. Mpɔ, báobeekea nyɔngɔ nɛsu bhui bíndɔ Mokonga dákondi k'abɔ.Dhondanisa á bangɔa: BaKɔlítɔ básɛkisiɛ moangɔ
6 Ka bondɔ unge bɛmɔphani Títɔ, ágɛ mɔtɛnu nga, dánodhondi mosa. Bekondi gea, ásɛkisiɛ mɔtɛnu nyɔngɔ á dhausana á bangɔa.
7 Cɔ, benu, bo na kema bhubhui, kabɛ beekea, bɔphɛi, ubhapha, moingi kanga á sungiaga. Bo phɔtɔ n'ekondi ási ka besu. Cɔ, bani phɔtɔ bó k'ekuma á dhausana á bangɔa.
8 Kénososi gǎkɛ. Ne ndiu okaba kengeanisa á moingi ékondi nɛnu nindɔ á badhanu. 9 Nga, bo ye uubha bonjánja ékondi ndea Mɔkɔta nɛsu Yéso Kiísito ka benu: Dátú ntɔi, áǒketia muki sasa akɛ ka gea, benu bauki, bóbɛ batɔi ka měma.
10 Cɔ, bɔphɛi nɛmɔ a gǎkɛ be: A anja bɔ́sɛkisiɛ ekuma ndɔ á dhausana á bangɔa, nndɔ bokpangima ka saga á nama. Nga, benu bá unge dóbokabi ekuma ndɔ mosa-mosa ka saga nde anyɛ́nyima, bô phɔtɔ ogea. 11 Cɔ, kɛkɛ nde, kpeengeanisani ekuma kau gea te, moingi anja nɛnu á mosa-mosa, átɔtɔkɛanɛ bíndɔ bo na bukpɛkpɛi.
12 Nga, aobá́ nobo na mɔphɛ anja, Mokonga abeekeande egabhɔ nɛnu sumbii bɔɔtɔa, nna gǎkɛ kindɔ bókó ne. 13 Nga, kákeni bóbɛ bauki ka nyɔngɔ nde, bǒengi badhanu. Akeni ndiu gea, bókodhemanɛ mɔnɔ.
14 Kɛkɛ nde gǎkɛ, gabhani ɛtɔi nɛnu, bii a ási, ka bakpa nde bá na sikii gea te, esa nɛngbo, bánogabheande ɛtɔi nɛbɔ. K'aphe ndɔ unge, bókódhemanɛku, 15 bóodokomisa nyɔngɔ nde dábadundu ka buku á Mokonga: «Mmbe dákɔngu ási, dákájigi na kema ási phɛ̂. Mmbe akɔngu abhɔa, dákáuki ka kema.» a
Dhondanisa á bangɔa: Teka á basɔndɔi na Kɔlítɔ
16 Obhebhɔ ka Mokonga, mmbe amophi Títɔ moingi ka enga anu be'eme. 17 Nga, abeeki mɔphani nɛsu na maseye, áokonda ga á mɔtɛnu kanga á sosea akɛ. 18 Cɔ, benteki Títɔ na dhasu moti, mmbe kanisa bhui ambhebhi ka nyɔngɔ á bɔphɛi nɛkɛ anja, á nyɔngɔ á Mokonga. 19 Kanisa bhui ansɔmbu gea, bégɛ na bɔ k'aphe á dhondanisa á bangɔa. Ekuma ndɔ, bɛɔbhɛdanaga ka dokomisa á Mɔkɔta. K'aphe ndɔ unge, bephangi mɔphɛ asu anja.
20 Bekondi amba á bangɔa ndɔ anja, bii a ási. Nga, beobanga gea, bakpa buangbo básoyeyande. 21 Be phɔtɔ okaba gea anja, nna tɔndɔ mosa á Mɔkɔta, a ndiu mosa á bakpa.
22 Cɔ, běteki bakpa ndɔ na dhasu ba angbo, mmbe bɛɔni tambea akɛ mɔngɔ ási na na moingi phɛ̂. Kɛkɛ nde gǎkɛ, yɛ asui phɛ̂ ga mɔtɛnu. Nga, ǎnosebei.