7
1 Cɔ, baya, mɔkɔ ndɔ ande asu. Ka bondɔ, béambɛ nyama asu na měma asu gea te, kajenanɛ mɔnɔ. Bii bɛɔmɔ̌ka Mokonga, békabɛ phɔtɔ bonjánja na měma asu bhui.Bɛi nde atoki k'ekondi ndea Mokonga, aóamisa bakpa
2 Osokodeani měma anu. Nga, békéngii nkpa ajede, békémuji nkpa, békéndhemi nkpa. 3 Kégi bó ka kea anu. Dékénongodi gea, boiki subi á měma asu? Eya, be tɔ kimoti, nanga békua, nanga béenda. 4 Něnosebei phɛ̂, ne phɔtɔ na bosegi ka benu. Nanga bétambaga, měma ani atumi na bɔjɛjɛ na maseye.
5 Nga, mbenɔ nde débeju ka Makɛdhɔnía mosa, débékéumbi, béoba n'eongo na kɔbɔbɔkɔ. 6 Cɔ, Mokonga, mmbe aɔ́kɔ́bisa batɔ- óiɔ, dásɔkɔ́bisi phɔtɔ ka kidia á Títɔ. 7 Nna tɔ ka kidia akɛ unge dásɔkɔ́bisi ne. A ndiu nyɔngɔ nɛnu nde abhiki ne na bii dóbotú na ngomi akɛ. Dásongodi gea, bo na siki ani, boomogameaga, bo phɔtɔ omomamea na moingi. Bii dɛ́ɔki nyɔngɔ ndɔ, maseye nɛmɔ áoba ángbó phɛ̂.
8 Nga, aobá́ baobá́ nɛmɔ á mosa nadánɔbɛisi, ké phɔ otangaaga. Neuubha gea, dánɔbɛisi. Dátú tɔ ka mbenɔ abhɔa. 9 Cɔ, kɛkɛ nde gǎkɛ, ne na maseye. Nna gǎkɛ ka nyɔngɔ á bɛi ndɔ. A ndiu ka nyɔngɔ nde bɛi ndɔ akěti tambea anu. Bɛi ndɔ dánɔbhɛdi phɔtɔ ka nyɔngɔ ékondi ndea Mokonga. Ka bondɔ, békénogii ajede. 10 Nga, boamia ka měma ande sungiaga á bɛi nde Mokonga dánobhisii. Ka bondɔ, měma asu aphɔngi. Bɛi á batɔa ka mokonda a gǎkɛ ógesa sasa abɔ ka kukua. 11 Cɔ, ɔnani phɔ kema bhubhui nde Mokonga atɔtɔkisi ka nyɔngɔ á bɛi nɛnu ndɔɔ:Boosuia gea á kema anja,bokangei bojede,bɔbɛi ka nyɔngɔ á bojede ndɔ dóbogi,boobanga sungiaga á bojede ndɔɔ.Bookaba ɔkana goto n'eme.
Eya, bo na moingi á kea á nkpa nde aogea ajede ka ɔlɔ anu. Ka bondɔ, bɔɔnisi gea, bókó ye subi á nyɔngɔ ndɔɔ. 12 Bii dénodundui, nna tɔndɔ ka nyɔngɔ á nkpa ndɔ angii dhakɛ ajede, kabɛ mmbɔ dhakɛ angii ajede. Baobá́ ndɔ dá ndiu ka benu gea te, bɔ́ɔnɛ sasa anu mosa á Mokonga bii bǒsogii anja phɛ̂. 13 Ka bondɔ, be na bɔjɛjɛ ka nyɔngɔ anu.
Be phɔtɔ na maseye phɛ̂ ka ɔna bii dóbobeeki benu bɔbhu boabhi nɛmɔ, áɔmbɔngɛa Títɔ phɛ̂ mbusa a ngodea anu boabhi ndɔɔ. Eya, be na bɔjɛjɛ. 14 Nga, mosa á ga á Títɔ mɔtɛnu, dénobhebhi mosa akɛ. Mpɔ, bóodokomisa obhebhɔ ndɔ ka kidia akɛ mɔtɛnu.
Nga, débetú tɔ ǒnongodea nyɔngɔ á doni. Mbusa, obhebhɔ nɛsu ka benu mosa á Títɔ â phɔtɔ oba doni.