<<    <     2 Bakɔlítɔ     6     >    >> 
6
1 Cɔ, besu íbundɔ bɛɔbhɛdanaga kimoti na Mokonga, běnodengemisigi gea, bókotukatukɛmbɛ bonjánja nde ǎnoophi. 2 Nga, Mokonga agi subi á buku nɛkɛ,
Bii esa anja ase ye, dɛ́kɔɔki. Esa á boamia ka měma aju ye, dékoengi. a
Cɔ, mbenɔ anja ndɔ aju. Esa á boamia ndɔ aju.
3 Békékondi bɛtisa á nkpa n'ephiphi. Nga, beobanga bakpa sɛkaga ékuma nɛsu. 4 Be ndiu okaba gea, bakpa básɔɔnɛ bea babhɛdanigi ndea Mokonga esa bhui. Ka bondɔ unge, beophiphia:tambaga,bojede,ea á minyɔ, 5 binda,mekakɔ,eongo,bɔɛu,phɛa á tɔ̌,nja.
6 Be phɔtɔ otambea:kanga á kisɛki.Be na ubhapha.Bɛɔkɔ́ba.Tambea asu a anja.Be kimoti na Měma á Mokonga.Běkondi bakpa bɔbhu, kanga á maibhe. 7 Be tɔ ɔyɔnga nyɔngɔ á doni.Bɛɔbhɛdanaga na bukpɛkpɛ á Mokonga.Ekonga na nguba nɛsu ande kodoni ndea Mokonga.
8 Bɛɔsɛkɛdisa ekuma nɛsu:nanga béba na boombia, nanga básotondia,nanga básobhebha, nanga básobhóma.Buangbo báogea te, bende badhemigi, nanga béba batɔa- doni. 9 Báɔsɔ́ɔna bea bakɛni, nanga béubhukana.Báogea te, besí, nebe phɔ́tɔ oenda.Báosóbinda akpɛ, bákasómoɛ. 10 Báɔsɔ́bɛisa, bê ndiu oba na maseye.Bende bauki, nebe ndiu ɔ̌tɔisa bakpa ka měma.Báogea, béké na ka kema, nebe ndiu na kema bhubhui.
11 Cɔ, baya baKɔlítɔ, bɛ̌̀nɔyɔngɛ bhase, běnokodei měma asu. 12 Doni, békénodakei měma asu, benu bá unge bǒsodakei měma anu. 13 Něnongodi bó bea abha-niki naɔ́phɛa banakɛ. Benu phɔtɔ, ósokodeani měma anu, bea baniki nabánkondi abhabɔ ka měma abɔ.
Bókodhaduɛ mɔnɔ bonjánja na bojede
14 Bókophapheanɛ mɔnɔ ka měma na bakpa nde bákámbeeki Kiísito. Ntɔa-doni na ntɔa-mbɛa, báɔɔkana? Mani na keiphe, bá kimoti? 15 Kiísito na Nketi, báɔtɔka nabáɔkani? Cɔ, mbeeki na nkpa nde kámbeeki Yéso Kiísito, báɔɔkana? 16 Endu ndea Mokonga n'endu ésomba, a kimoti? Aoboboa. Nga, bende endu ndea Mokonga Mɛyɔ. A bíndɔ Mokonga ayɔngi subi á buku nɛkɛ,
Neikande sɔsɔbɛ abɔ, netambande kimoti na bɔ.
Nebande Mokonga ka bɔ, báoba bakpa nɛmɔ. b
17 Mɔkɔta agi phɔtɔ,
Tokani ka ɔlɔ abɔ, bókatanɛ na bɔ.
Bókodhungɛ mɔnɔ bisɔ́ɔ. Mpɔ, néonósesea. c
18 
Nebande abhanu, bobande baseka na baganda nɛmɔ.
Mmbe ayɔngi nndɔ, ande Mokonga Mɛna-Bukpɛkpɛ. d