2 Bakɔlítɔ 12

Tetemisa ékuma ndea Pɔ́lɔ: BaKɔlítɔ bábeekeɛ baobá́ nɛkɛ

1 Netutuisi édokomisa nanga bii nna na kantiti. +12.1 Oani, Pɔ́lɔ aódokomisa ka nyɔngɔ á maca nde bateki á mbɛa báonca ne. Kɛkɛ nde, nekondi nɛ́nɔtɔ̌miɛgɛ mphaniɔ na kema á bɔsɔmɛa, nnde Mokonga amophangi.

2 Cɔ, dái tɔ basaga nkama moti na gena, neom‹bha moKiísito moti, mmbe Mokonga dándhungi kpa! áontaisa na kobha mɔtɛkɛ. A gǎkɛ oba Mokonga nadántaisi na kobha na nyama akɛ, aobá́ nadántaisi tɔ ka měma, kéuubha. Mokonga sasa akɛ a ámbé auubha. 3-4 Eya, neuubha gea, Mokonga dántaisi na Paadhísɔ, nnde a na kobha. Kabɛ ka nyama, kabɛ ka měma, kéuubha. Mokonga sasa akɛ a ámbé auubha. Cɔ, nkpa ndɔ áɔɔka nyɔngɔ, nnde nnauubha sikisiai ka yɔnga á bakpa. Mokonga aimisi phɔtɔ gea, nkpa katɔ̌miɛgɛmbɛ nyɔngɔ ndɔɔ.

5 Cɔ, nědokomisande ka nyɔngɔ á nkpa ndɔɔ. K'eme sasa ani, nědokomisande tɔ ka nyɔngɔ á utua ani. 6 Atú gǎkɛ oba nenekondi édokomisa, kétóbɛku mbhobho. Nga, ne tɔ ɔyɔnga doni. Cɔ, ké gǎkɛ ogea bó ka nyɔngɔ nde, kékondi bakpa bámodokomisɛ phɛ̂ kɔnyɛ́nya kema nde báɔni, na báɔki k'eme.

7 Mokonga dámɔbɛti na kenkumbɔ ka gea te, kěbhebhɛ mɔnɔ sasa ani, ka nyɔngɔ á mphaniɔ ángbó ndɔɔ. +12.7 «Kenkumbɔ» ande esambɔ ésa asi. Kenkumbɔ ndɔ dátú bea mphaniɔ ndea nteki nde ba a Sɛtáni. 8 Dɛ́mɛmi Mokonga mɔngɔ isaɔ gea, ámoamisɛ ka kenkumbɔ ndɔɔ. 9 Mpɔ, Mokonga áomosikisia gea: «Angɛ phɔ oa bii o na bonjánja ékondi nɛmɔ. Bukpɛkpɛ nɛmɔ angodokani ka nyɔngɔ á bɔɔlɔ nɛkɔ.» Ka bondɔ, eme Pɔ́lɔ, nekondi phɛ̂, nédokomisɛ ka nyɔngɔ á bɔɔlɔ nɛmɔ gea te, bukpɛkpɛ ndea Kiísito ámogbukumiɛ k'iso á bakpa. 10 Ka bondɔ unge, ne na maseye ka nyɔngɔ á bɔɔlɔ bhui, kabɛ mbhóma, buyɛnɛ, tambaga, kokae ésambɔ k'ina á Kiísito. Nga, bɔɔlɔ ndɔ unge, aomogbagisa.

11 Nɛyɔngi tɔ nyɔngɔ bhui ndɔ bea mbhobho. Benu baKɔlítɔ, tambea anu unge amososi tɔ, nɛ́yɔngɛ bó. Atókeni bómomameɛ. Nanga bateki ba angbóngbó nɛnu bágea, ké na kantiti mosa abɔ, ké gǎkɛ kusi abɔ. 12 Nga, kema nde negi mɔtɛnu mɔngɔ ási, bii nephiphi nyɔngɔ ási, angodokani bhase gea, nende nteki á doni. Mokonga atɔtɔkisi phɔtɔ mɔtɛnu mphaniɔ, na ketangaɔ akpɛ phɛ̂ k'ekuma nɛmɔ ndɔɔ. 13 Cɔ, kema sina nde buuki, nnde neophi kanisa nɛngbo, kěnophɛ? Ande gea te, dénodokomanei ka isa ani? Aoboboa Aoba na bó, boseani bojede nɛmɔ ndɔɔ!

14 Nesɔ́ɔmɛa ka ga á mɔtɛnu ka mɔngɔ á ko isaɔ. Kénodokomaneɛku ye. Nga, kéokaba nkumba nɛnu, tɔndɔ benu sasa anu. Cɔ, ké abhanu? Nga, nna baniki bá unge báǒisa babɔkɔti abɔ. Babɔkɔti bá unge bá ndiu ǒisa banabɔ. 15 Nanga négabha nkumba nɛmɔ bhubhui sɔsɔbɛ anu, nénodeketea nyama ani, ka amisa á měma anu, nebande tɔ na maseye. Bii něnokondi phɛ̂, bókómokondɛku tanda abhɔa?

16 A tɔ bó. Kénodokomanei. Bakpa buangbo sɔsɔbɛ anu gǎkɛ, báogea te: «Pɔ́lɔ ande ntɔa-maibhe, ǎsodhemigi.» 17 Ande gea te, bakpa nde něnotekisii, dábanuubii? 18 Nga, bii nendengemisigi Títɔ, ágɛ mɔtɛnu kimoti na dhasu moti, dánuuti mɔnɔ kema? Ande gea te, Títɔ n'eme, tambea asu nna kimoti? Měma asu nna kimoti?

19 Ande gea te, be mɔ́ɔ tɔ ɔ́yɔngɛa mosa anu? Nna bo. Badhani ékondi, be tɔ ɔyɔnga mosa á Mokonga, bii be kimoti na Kiísito, ka nyɔngɔ á mɔtisaga anu.

20 Nga, neobanga gea, aobá́ nɔbɔ́kɔ́mɔtigi ka měma, tambea anu kámɔbɔngɛɛku tanda ka jua ani. Mbusa, ninɛmɔ kánɔbɔngɛɛku phɔtɔ. Nga, neobanga gea, bobande phɔ́tɔ na sani, nsengo, esuia, katanaga, tɔngana, maca, étondoa, eongo. 21 Ne phɔtɔ obanga gea, bii nejuande goto mɔtɛnu, Mokonga kamokusɛmbɛ na soni. Nga, něgameande bakpa ba ási nde bákádeketimbɛ bojede nɛbɔ á kala, bea komusɔngɔ, iɛbɛ, yomba.