3
1 Ande gea te, be goto ódokomisa sasa asu? Nga, bakpa buangbo bá na siki a phangia anu baobá́ édokomisa. Buangbo báɔmɛma baobá́ ndɔ mɔtɛnu. Besu gǎkɛ, be phɔtɔ na sikii? 2 Baobá́ nɛsu nna phɔ benu sasa anu? Nga, Kiísito adundu baobá́ ndɔ ka měma asu. Bakpa bɔbhu báotanga, báoengekisa. 3 Eya, ande bhase gea, Kiísito a ámbé adundu baobá́ ndɔ bii Mokonga ǎsotekisi ne. Kiísito kádundu gǎkɛ na pɛnjɛa. Adundu ndiu na Měma á Mokonga, mmbe mɛyɔ. Kádundu gu ɛ́tɛ. a Adundu ndiu ka měma á bakpa.4 Eya, beogea bó ka nyɔngɔ nde, Kiísito ǎsoophi nsebeɔ mosa á Mokonga. 5 Beuubha gea, béké na bukpɛkpɛ á tɔtɔkisa ekuma nɛsu sasa asu. Bukpɛkpɛ ndɔ a tɔ otoka ka Mokonga. 6 Yɛ a ámbé ǎsobhisi baɔnganisi á konsamba á kɛkɛ. Nna konsamba ɛ́ɔphi nde dábadundu ka buku á kala. A ndiu konsamba á Měma á Mokonga. Nga, konsamba ɛ́ɔphi nde dábadundu, aóbotea bakpa ka kukua. Konsamba á Měma á Mokonga a unge aósoendisa.
Boombia á konsamba á kɛkɛ ndea Mɔkɔta, anyɛ́nyɛi
7 Cɔ, Mokonga dádundu ɛɔphi ndea Mósa k'ɛtɛ. Bii Mósa déphangisi baIsilɛ́lɛ ɛɔphi ndɔ, bákaphiphiɛ enga á keongi akɛ bii dáophenuaga na boombia á Mokonga. ěɔphi ndɔ â gǎkɛ óbota bakpa ka kukua. Phenuaga ndɔ kaiphiɛ. Nanga bii boombia ndɔ dátú ángbó, 8 boombia á konsamba á kɛkɛ ndea Měma á Mokonga anyɛ́nyɛi. 9 Nga, konsamba ɛ́ɔphi aɔ́bhɛda bakpa, Mokonga áotena nyɔngɔ abɔ ajede. Nanga ába bó, aósophangia boombia á Mokonga. Be ye ɔngana na Mokonga ka konsamba á kɛkɛ, béoba batɔa-doni mosa akɛ. Ka bondɔ, konsamba á Měma á Mokonga kányɛ́nyi phɔ konsamba ɛ́ɔphi ka boombia? Eya.
10 Cɔ, boombia á konsamba á kɛkɛ adaki boombia á konsamba ɛ́ɔphi. 11 Doni, konsamba ɛ́ɔphi nnaoiphia. Nanga ába bó, dátú na boombia. Konsamba á kɛkɛ a gǎkɛ oiphia kanga á sungia. Ka bondɔ, boombiai anyɛ́nyɛi.
12 Bɛɔyɔnga bhase ka nyɔngɔ á nsebeɔ á kɛkɛ. 13 Béké bea Mósa, mmbɔ dábumbi keongi akɛ na bhɔngɔ ka imisia á baIsilaɛ́li gea, bákaɔnɛ mɔnɔ boombia ndɔ bii aoimika. 14 Cɔ, ka baIsilaɛ́li á kɛkɛ, ande gea te, kema bea bhɔngɔ ndea Mósa adaki phɔ́tɔ iso abɔ bii báotanga ɛɔphi nɛbɔ. Mɔ abɔ áoba akpɛ. Kiísito a ámbé a na bukpɛkpɛ á phuia a bhɔngɔ ndɔɔ. 15 Cɔ, nanga ába bó, bii baIsilaɛ́li báotanga subi á buku ndea Mósa, bhɔngɔ ndɔ agbagisi phɔ́tɔ mɔ abɔ.
16 Cɔ, nkpa a gǎkɛ ɔmɔnjia Mɔkɔta: «Mɔkɔta áophuia bhɔngɔ ndɔ atódaki iso akɛ.» b 17 Cɔ, Mɔkɔta ndɔ ande Měma á Mokonga. Bii Měma á Mɔkɔta abei, béké ye bakɔbɛ ɛ́ɔphi. 18 Besu bɔbhu béké ye na bhɔngɔ ndɔ aodaka keongi asu. Nga, boombia á Mɔkɔta aophenuaga kau. Boombia á phenuaga ndɔ aobika esa bhui ka nyɔngɔ á bukpɛkpɛ á Měma á Mɔkɔta.