2
1 Ka bondɔ, dénegi geae, kéjuɛku ye mɔtɛnu. Nga, kétókondi bɛisa anu. 2 Aoba nɛnɛnɔ́bɛisi, animbe amɔtɛbhisande goto? Nna phɔ bunde nɛ̌̀bɛisi? 3 Ka bondɔ unge, dénodundui nyɔngɔ ka baobá́ nɛmɔ á mosa. a Détú obhika mbenɔ ndɔ, ámbe dɔ́bɔmɔbɛisi. Doni, něnosebei tɔ benu bɔbhu nga, neuubha gea, kema nde aomopa maseye a phɔtɔ bó ka benu. 4 Nga, dénodundui baobá́ ndɔ neneogama, měma ani nasidi phɛ̂. Kétókondi bɛisa anu. Nê ndiu ǒnodunduia ka phangiaga anu ekondi ángbó nde nene ka benu.Nyɔngɔ á bosea a bojede ndea nkpa, mmbe dákěti tambea akɛ
5 Aoba nkpa nadɛ́bɛisi bakpa, nna eme ámbé dámɔbɛisi tɔndɔ. A phɔtɔ benu bɔbhu. Bókobikisɛ mɔnɔ gǎkɛ nyɔngɔ. b 6 Bii bakpa ba ási bánkeigi, nndɔ akeni. 7 Ka bondɔ, boseani bojede nɛkɛ, bɔ́kɔbisɛ ndiu měma akɛ. Kabɛ nǎna bó, mmbe bɛi nɛkɛ kásiɛku. 8 Cɔ, něnodengemisigi phɔ, nkondani gea, áubhɛ geae, bonkondi goto. 9 Nga, dénodundui ka geae, bónkeɛ nkpa ndɔ, mpɔ néodigimisa, aobá́ nobomobeekeande ka nyɔngɔ nɛmɔ bhui.
10 Ande gea te, aobá́ nobobosei bojede ndea nkpa, nê phɔtɔ obosea. Bii nebosei, nebosei mosa á Kiísito ka nyɔngɔ anu. Nna gea te, bojede dátú bei ka bosea. 11 Negi bondɔ ka gea, Sɛtáni kǎsodhemɛgɛmbɛ. Nga, beuubha maibhe nɛkɛ.
Pɔ́lɔ dákáge na Kɔlítɔ, dáge ndiu na Tɔáda ka nyɔngɔ sina?
12 Cɔ, dége na Tɔáda ka tɔ̌miaga á nyɔngɔ anja ndea Kiísito. Dɛ́ɔni gea, Mɔkɔta Yéso dámokodei aphe ka bhɛdanaga ko. 13 Měma ani dákátú gǎkɛ na bɔjɛjɛ nga, dékéndhondi munamasu Títɔ. Ka bondɔ unge dɛ́ɔku batɔa ka Tɔáda, néoga na Makɛdhɔnía.
Ekuma ndea bateki
14 Cɔ, bémbhebhɛni Mokonga nga, ǎsobhisi bea batɔ-émani bunde báotámba mosa á mɔkɔta nɛbɔ. Kiísito ande mɔkɔta ndɔɔ. Aɔ́sɔtɔkisa emani esa bhui. Aósoenga ka ɛmbisa á nyɔngɔ nɛkɛ ka nji bhubhui. Nyɔngɔ ndɔ a bea nkoki á su anja, nnde beondandisa ɔma bhui. 15 Eya, be bea nkoki ndɔ, á su anja ndea Kiísito mosa á Mokonga.