Baobá́ á ko ibɛ ndea Pɔ́lɔ ka baKɔlítɔ
Nsesɔ
1
1 Ka batɔa-kanisa ndea Mokonga, bunde bá ka Kɔlítɔ, na ka babeeki bɔbhu á ka Akáia, sambani. aEme Nteki Pɔ́lɔ a ámbé nedundu baobá́ ndee. Nende nteki nde ba a Kiísito Yéso ka nyɔngɔ á mɔphɛ á Mokonga.
Munamasu Timɔtɛ́ɔ ǎnosesi phɔtɔ.
2 Cɔ, Mokonga abhasu, na Mɔkɔta Yéso Kiísito, ánophɛ bonjánja na bɔjɛjɛ nɛkɛ.
Tambaga, ande cina á bukpɛkpɛ nɛsu
3 Obhebhɔ ka Mokonga, abha-mɔkɔta nɛsu Yéso Kiísito, mɛna-bonjánja bhui na nkɔbisi- měma asu. 4 Nga, aɔsɔ́kɔbisa měma ka tambaga asu bhui, ka gea, bɛ́kɔbisɛ phɔtɔ badhasu měma. Eya, besu bá unge Mokonga ǎsɔkɔbisi mosa-mosa. 5 Nga, bii beotambaga ási bíndɔ Yéso dátambigi, ǎsotumisi na bukpɛkpɛ á kɔbisa a badhasu.
6 Kabɛ besu bateki nebeotambaga, ande ka gea te, bóbɛ na boamia na bukpɛkpɛ ka měma. Bii Mokonga ǎsɔkɔbisi měma, ande phɔtɔ ka kɔbisa a měma anu. Mpɔ, bôphiphia tambaga nde be yetɔ kau. 7 Ka bondɔ, be na nsebeɔ ási ka benu. Nga, bii beotambaga kimoti, bûubha gea, Mokonga aɔkɔbisa měma asu, besu bɔbhu.
8 Baya, bekondi búubhɛ bhase gea, bii débetambigi phɛ̂ ka kenombe á Asía, bodokoi dásɔnyɛ́nyɛi, béuubha te, besíande. 9 Débetú bea batɔa-mekakɔ nebeuubha te, básomande. Kema ndɔ dágeani ka gea, békesebeɛ mɔnɔ bukpɛkpɛ asu sasa asu. Bénsebeɛ ndiu Mokonga, mmbe aójujukisa basí. 10 Yɛ, dásǒokisi ka kukua akpɛ. Ka bondɔ, beuubha gea, ǎsǒokisande goto. Eya, bembhisii nsebeɔ nɛsu nga, kádeketɛku amisa asu. 11 Nga, beuubha gea te, bǒsoengande k'ɛmɛmi ka Mokonga. Yɛ a ámbé abeekeande ɛmɛmi ndɔ. Mpɔ, áosóopha bonjánja ékondi nɛkɛ. Mbusa, bakpa ba ási báombhebha Mokonga ka nyɔngɔ asu.
Pɔ́lɔ dákáju goto na Kɔlítɔ ka bo?
12 Kema nde aósodokomisa ka měma asu ande gea, tambea asu mosa á bakpa na mosa anu, ande doni, kanga á maibhe, natoki ka bonjánja ndea Mokonga. Nga, bonjánja ndea Mokonga á unge aósotámbisa ka mokonda. Nna gǎkɛ kɔbɔngɛ ndea bakpa unge aósotámbisa. 13 Ka bondɔ, subi á baobá́ nɛsu, běnodundui bhase ka geae, bótangɛ, búubhɛ. Nesebei phɔtɔ geae, 14 bii bodigimisi nyɔngɔ nɛmɔ abhɔa, buubhande bhui subi á baobá́ ndee. Ka bondɔ unge, esa nde Mɔkɔta nɛsu Yéso abhikaeka, bobande na bosegi ka besu, bíndɔ bebande ne ka benu.
15 Cɔ, bii a bó, déangi jua ani mɔtɛnu goto ka gea te, bóbɛ na maseye á dhondana ani na benu mɔngɔ ibɛ. 16 Ande gea te, dénesui dhonda anu mosa á ga ani na Makɛdhɔnía. Mbusa, nê goto ǒnodhonda ka gea, bómopɛ aphe á ga na Yudhɛ́a. Dékége ye gǎkɛ.
17 Bii dénongodi bo, dékékpangi ianaga? Ande gea te, moangɔ nde neobhisa, ande á kokpa? Neobeekea na ya á nyɔngɔ mɔngɔ mbangɔ bea bakpa bunɛngbo? 18 Cɔ, Mokonga, mɛna-kodoni, auubha gea, bɔphɛi nɛsu nna beekea á nyɔngɔ na yai mbangɔ. 19 Nga, muna-Mokonga Yéso Kiísito nnaogea bondɔ. A tɔ ɔyɔnga nyɔngɔ á doni. Eme Pɔ́lɔ, Timɔtɛ́ɔ na Síla, besu bá unge dɛ́bɛnɔ́tɔ̌mi nyɔngɔ nɛkɛ. 20 Nga, Yéso atɔtɔkisi mɔkɔ bhui ndea Mokonga. Ka yɛ Yéso, beobeekea: «Abɛ bo.» ka dokomisa á Mokonga.
21 Mokonga sasa akɛ a ámbé ǎsonyangisigi ka njaga á Kiísito, mmbe dásɔsɔmbu. 22 Asobhisii epe nɛkɛ nande Měma Anja ndea Mokonga, nnde aiki ka měma asu. Aósophangia bundɔ gea, ǎsoophande phɔtɔ kema nɛngbo.