2 Bakɔlítɔ 4

1 Mokonga ǎsoophi ekuma nɛsu ka nyɔngɔ á bonjánja nɛkɛ. Ka bondɔ, bɛ́kɛ́ɔɛa kau. 2 Beye bɔphɛi ódhemayɔ. Bɛ́kɛ́ɔsɔmɛa nyɔngɔ moti. Békéokaba dhema á bakpa. Békéodhadoa nyɔngɔ á Mokonga na mbɛa. Be ndiu ɔyɔnga doni na bhase, k'ina á Mokonga. Eya, bekondi ubhisa á bakpa gea, bende batɔa-doni.

3 Bakpa buangbo bánaoengekisa Nyɔngɔ Anja ndea Mokonga. Bá bea bakpa nabáboe iso abɔ na bhɔngɔ. A tɔ bó ka bakpa nde báobungaga, 4 ka nyɔngɔ nde, bánaobeekea Mokonga. Nga, Nketi moamɛ á ka mokonda nde auji ubhapha abɔ. Ka bondɔ, bánaoengekisa boombia á Nyɔngɔ Anja á Yéso Kiísito, mmbe ande keongi á Mokonga. 5 Ka bondɔ, bɛ́kɛ́ɔtɔmiaga nyɔngɔ nɛsu sasa asu. Be ndiu ɔphɛa gea, Yéso Kiísito ande Mɔkɔta. Besu gǎkɛ, bende bakɔbɛ nɛnu ka nyɔngɔ akɛ.

6 Bii Mokonga dáconji mokonda, dáyɔngi: «Oanga ábhɛnyɛ ka keiphe.» Yɛ a ámbé abhɛnyisi phɔtɔ oanga ndɔ subi á měma asu. Oanga ndɔ ungɔ aósophangia boombia akɛ bii aophenuaga ka keongi á Kiísito. Nyɔngɔ ndɔ a unge beokaba ubhisa á bakpa, nande nyɔngɔ á boombia á Mokonga.

ětɔi, subi á mbeka á toko

7 Besu bateki be ba agɛbɛ bea mbeka á toko. Be ndiu n'ɛtɔi subii. Mokonga dági bondɔ ka ubhisa a bakpa gea, bukpɛkpɛ nɛkɛ, bii a ángbó, nna nɛsu. 8 Bakpa báosókpatikisaga, cɔ, béké gǎkɛ odoa nsebeɔ.Báosóphusiaga na nyɔngɔ, bána gǎkɛ ɔ̌sɔtɔka. 9 Báosótambisaga, Mokonga nna gǎkɛ ǒsodeketa.Báosótenea na odo, béké gǎkɛ uujukana.

10 Báokaba ma asu, besu bateki, esa bhui bíndɔ dábamoe Yéso. Be phɔ gǎkɛ tɔ oenda ka phangia á bakpa gea, Yéso a phɔ́tɔ oenda. 11 Doni, be phɔ́tɔ oenda, nanga bii be bhíbhí á kukua, esa bhui ka nyɔngɔ á Yéso. Nanga bii nyama asu a agɛbɛ, kakumbɛ gǎkɛ. Eya, nndɔ aóphangia bakpa gea, Yéso a phɔ́tɔ oenda. 12 Ka bondɔ, kukua aósobondea besu bateki ka nyɔngɔ á bhɛdaneaga a Kiísito, boamia a gǎkɛ ǒnobondea benu baKɔlítɔ ka nyɔngɔ á beekea akɛ.

13 Bádundu subi á buku á Mokonga gea: «Nɛɔtɔmiaga kema nde nebeeki.» Cɔ, besu bateki, bembeeki Kiísito. Ka bondɔ unge, bɛɔtɔmiaga nyɔngɔ akɛ. 14 Nga, beuubha gea, bii Mokonga dánjujukisi Mɔkɔta Yéso ka kukua, ǎsojujukisaeka phɔtɔ. Béoika kimoti na yɛ. Asogaeka ne na benu bɔbhu mosa á Mokonga. 15 Ka bondɔ, tambaga asu bhui a tɔ ka nyɔngɔ anu. Bii bonjánja ndea Mokonga aobika esa bhui, benu babeeki, bobikande phɔtɔ ka sega akɛ phɛ̂ na ka emba obhebhɔ á boombia akɛ kimoti.

16 Ka bondɔ, bɛ́kɛ́ɔɛa k'ekuma nɛsu. Nanga nyama asu ádhɔbɔka bokɛ-bokɛ, měma asu aɔmɔtɛanaga esa bhui. 17 Tambaga asu káiphiɛku. A ndiu osógbagisa ka měma, gea te, bébɛ na boombia á mɛyɔ. Ka bondɔ, tambaga ndɔ, â yetɔ ophoomana. 18 Nga, betumi iso ka kema nde bánaɔɔna, nna gǎkɛ ka kema nde báɔɔna. Ande gea te, kema nde báɔɔna nnaoenda, kema nde bánaɔɔna aoenda mɛyɔ.