1 Bakɔlítɔ 15

Bii Kiísito ajujuki ka kukua, bejujukande phɔtɔ

1 Baya, nekondi gea, nénokanisiɛ goto oani nyɔngɔ anja ndea Mokonga, nnde dɛ́nɔtɔ̌migi kala, bóobeekea ka měma anu, nande cina á beekea ndɔɔ. 2 Ande phɔtɔ aphe á boamia anu, aobá́ nabodhungi anja ka měma. Kabɛ nǎna bó, ámbe beekea nɛnu a tɔ jǎi.

3 Cina á bɔphɛi nɛmɔ ande nyɔngɔ nde Yéso Kiísito amopi ka phɛai: Ande gea te, Kiísito dáku ka nyɔngɔ á bojede nɛsu bíndɔ dábaɔtu subi á buku á Mokonga. 4 Dábamǔmbi. Esa a kɔ isaɔ mbusa á kukua, Mokonga áonjujukisa ka kukua bíndɔ dábaɔtu subi á buku á Mokonga. 5 Bii ajujuki ye ka kukua, áǒkidianea Pɛ́tɛɛ, mpɔ bagoigi buangbo. 6 A goto ǒkidianea badhasu kɔ̌nyɛ́nya bakpa mia bɔku. Bakpa ba ási sɔsɔbɛ abɔ bá phɔ́tɔ bei. Buangbo básí gǎkɛ. 7 Mbusa, Kiísito â goto ǒkidianea Yakɔ́bɔ na bateki bɔbhu.

8 Ka sungiaga, Kiísito â goto omokidianea eme Pɔ́lɔ, nanga bii détú bea miki nakɔdɔki, nakámɔtimbɛ. 9 Nga, nende miki sɔsɔbɛ a bateki bɔbhu. Kétókeni tanda, bámɔɔphanɛ nteki ka nyɔngɔ nde détambisigi phɛ̂ batɔa-kanisa ndea Mokonga. 10 Ka nyɔngɔ á ngomi ndea Mokonga, ne tɔ nkpa bíndɔ bɔɔmɔɔna k'esa ndee. Ngomi ndɔ dámokui, dákátú jǎi. Nga, nɛbhɛdanigi phɛ̂ kɔ̌nyɛ́nya bateki bɔbhu. Kɛ́bhɛdanigi gǎkɛ na bukpɛkpɛ ani, a ndiu ka bukpɛkpɛ á Mokonga, nnde a subi ani. 11 Ka bondɔ, kabɛ nɛnɛyɔngi nyɔngɔ anja ndɔ, kabɛ bateki buangbo bá unge báyɔngi, nndɔ ande nyɔngɔ nde bɛphɛi, bóobeekea.

12 Bɛɔtɔmiaga gea te, Kiísito ajujuki ka kukua. Cɔ, nyɔngɔ sina nde bakpa moti-moti sɔsɔbɛ anu báɔyɔnga gea te, basí bánaojujuka ka kukua? 13 Kabɛ basí nabákájujukɛku ka kukua, ámbe Kiísito kájujuki ka kukua. 14 Kabɛ Kiísito nakájujuki, bɔphɛi nɛsu nna ye kema. Beekea nɛnu a tɔ jǎi.

15 Aoba Kiísito nakájujuki, ámbe bemamei nyɔngɔ á Mokonga ka mbɛa. Nga, débemamei gea te, Mokonga anjujukisi Kiísito ka kukua. A gǎkɛ oba basí nabánaojujuka ka kukua, ámbe Mokonga dákánjujukisi Kiísito.

16 Nga, aobá́ basí nabánaojujuka ka kukua, Kiísito kájujuki phɔtɔ ka kukua. 17 Kabɛ Kiísito nakájujuki ka kukua, beekea nɛnu a tɔ jǎi, ambé bo phɔ́tɔ batɔa-bojede. 18 Nna tɔ bo, babeeki, bunde básí, bábungigi phɔtɔ. 19 Kabɛ nebensebei Kiísito ka nyɔngɔ á enda nɛsu a kɛkɛ nde tɔndɔ, akeni gea, bakpa básokuiɛ ngomi phɛ̂ kɔ̌nyɛ́nya bakpa bɔbhu.

20 Nna gǎkɛ bó. Kiísito ajujuki doni ka basí. Nga, ande ange á bajujuki ka kukua. 21 Ka nyɔngɔ á nkpa moti, beokua. Ka nyɔngɔ á nkpa ba angbó, beojujuka ka kukua. 22 Nga, ka nyɔngɔ nde, be k'ekombo á Adhámu, beokua. Ka nyɔngɔ nde, be k'ekombo á Kiísito, beojujuka ka kukua. 23 Cɔ, beojujuka moti-moti. Kiísito ande ange á bunde bájujuki.

Esa á ja akɛ, Mokonga ějujukisande bakpa nɛkɛ. 24 Mbus'indɔ, áoba sungiaga á mokonda. Kiísito angbɔande koboamɛ bhubhui, na bakɔta bɔbhu, na bukpɛkpɛ á bansombo bɔbhu. Mpɔ, áonsikisia abhakɛ Mokonga koboamɛ nɛkɛ. 25 Nga, akeni Kiísito áeɛ nji bhubhui na ka bii Mokonga ěbhisande babibia nɛkɛ bɔbhu kusi ecinji akɛ. 26 Mbibia á ka phiphia, ka tukatuka akɛ, ande kukua. 27 Nyɔngɔ ndɔ atɔtɔkisi buku á Mokonga bii agi: «Mokonga abhisi kema bhubhui kusi ecinji akɛ.» Bii buku á Mokonga agi: «kema bhui a kusi ecinji akɛ», ande bhase gea, Mokonga nna kusi a anakɛ. Mokonga abhisi ndiu kema bhui ka njaga á Kiísito. 28 Mbusa bii Mokonga atɔtɔkisi nndɔ, Kiísito ɛ̌̀bhisande gǎkɛ kusi a Abhakɛ, mmbe dámophi Kiísito kema ndɔ bhubhui. Mpɔ, Mokonga abande moamɛ gu á kema bhubhui.

29 Cɔ, aobá́ basí nabákájujukɛku ka kukua, ka nyɔngɔ eke, báǒbatisa bakpa buangbo sɔsɔbɛ anu ka nyɔngɔ á basí nɛbɔ ka bo? A na kantiti sina?

30 Cɔ, besu bateki, nyɔngɔ sina nde beómakea ka kukua esa bhui, aobá́ nebéké na nsebeɔ á jujuka ka kukua? 31 Eya, neómakea ka kukua esa bhui. Ké gǎkɛ odeketa, nga něnosebei k'ina á Kiísito Yéso Mɔkɔta nɛsu. 32 Nga, němaki ka kukua mbenɔ nde démani na bakpa ba akpɛkpɛ bea banyama akae ka ěphɛ́sɔ. Aoba nenegi bondɔ ka nyɔngɔ á kokpa, cɔ, nɛtɔi bokambia sina? Kabɛ basí nabákájujukɛku ka kukua, a tɔ bíndɔ mɛni agi: «Cɔ, béɛgɛ, bénoɛ. Nga, mama, besíande.»

33 Bókedhemisɛmbɛ sasa anu. Nga, tambea á nkpa ajede aonketia dhakɛ. 34 Cɔ, ubhaphani phɔ, bódeketɛ bojede ndɔɔ. Bakpa buangbo sɔsɔbɛ anu bánaomǔbha Mokonga doni. Nɛyɔngi bo ka kusa anu na soni.

Basi bájujukande bo?

35 Cɔ, batɔa-ngaka báusianande: «Basí bájujukande bo? Nyama abɔ abande bo?» 36 Babhobho nde ca! Bii ookona mbo, nnaɔtɔka natɛi nakáingi ophoa. 37 Kema nde ookona, a tɔ mbo, kabɛ mponga, kabɛ mbo sina. Kóokona gbugbu akɛ. 38 Cɔ, mbusa, Mokonga áɔtɛisa kasa akɛ bíndɔ aangi. Mbo bhubhui, bii a ye ɔmɔta, áoba na kasa akɛ sasa akɛ.

39 Kema bhubhui nde a ka mokonda, atinganigi. Bakpa bá na nyama inɛbɔ, banyama bá ninɛbɔ, bambu ninɛbɔ, basu ninɛbɔ. 40 Kema danga-danga a n'ego, na ka mokonda. Boombia á kema á n'ego, ninde á ka mokonda, atinganigi. 41 Mani a na boombia akɛ sasa akɛ. Songe a ninɛkɛ. Basɛɛngɔa bá ninɛbɔ. Sɔsɔbɛ a basɛɛngɔa, boombia abɔ atinganigi phɔtɔ.

42 Abaeka tɔ bondɔ bii basí bájujukaeka. Nkpa nde aokua, báomǔmba, monda akɛ áophoa. A ye gǎkɛ ojujuka, káphoɛku ye. 43 Monda akɛ ande á soni. A ye ojujuka, áoba na boombia. Báomǔmba nkpa ka bɔɔlɔ, áojujuka na bukpɛkpɛ. 44 Báomǔmba na na nyama á ka mokonda, áojujuka na na nyama ndea na kobha.

Bii be na nyama á ka mokonda, bebaeka phɔtɔ na nyama á kɛkɛ, á na kobha. 45 Cɔ, bádundu ka buku á Mokonga be: «Nkpa á mosa-mosa, inakɛ Adhámu, Mokonga dámophi enda.» \f+ 15.45 Kpangeɔ 2.7. \f* Kiísito ande gǎkɛ Adhámu nde ba a mbusa. Měma akɛ ǎsoophaeka enda á kɛkɛ. 46 Nyama ndea na kobha nna mosa. Beokpanga na nyama á ka mokonda, mpɔ, béoba na nyama á na kobha.

47 Nga, Mokonga dánconji nkpa ba ka mosa- mosa na nsɔdɔ. Nkpa ba a mbusa, Kiísito, atoki na kobha. 48 Batɔa ka mokonda bákengeani na mmbɔ Mokonga dánconji na nsɔdɔ. Batɔa na kobha, bákengeani na mmbɔ atoki na kobha. 49 Aoba nebekengeani na mmbɔ Mokonga dánconji na nsɔdɔ, bekengeanande phɔtɔ na mmbɔ atoki na kobha.

50 Baya, negie, bunde bá na nyama na magia bánaɔtɔka nabángi ka koboamɛ ndea Mokonga. Nga, kema nde aophoa, nnaɔtɔka naendi kanga á sungiaga.

51 Ɔkani phɔ, nénuubhisɛ nyɔngɔ á bɔsɔmɛa bhase. Békésiɛku besu bɔbhu, nyama asu ěketiande ndiu mɔngɔ moti, 52 bea gbedua bii malaeka asuande mbengu á sungiaga. Nga, bɛɔkande ɛsɔ á mbengu, basí bɔbhu bájujukande, báoba na nyama, nnde kákuɛku. Besu bɔbhu běgaiande, béoba na nyama á kɛkɛ. 53 Nga, nkpa nde a na nyama, nnde aphoande, akeni ábɛ na nyama, nnde káphoɛku. Mmbe aokua, akeni áendɛ mɛyɔ.

54 Bii bakpa nde bá na nyama nde aophoa, bá ye na nyama á kɛkɛ, na bunde báokua bá ye na enda á mɛyɔ, oa ndɔ, nyɔngɔ á buku á Mokonga atɔtɔkɛanande bíndɔ ayɔngi: «Kukua así, Mokonga atɔki. 55 Kukua, bukpɛkpɛ akɔ a oa? Kukua, kokae akɔ a oa?»

56 Nga, kokae á kukua ande bojede. Bojede a na bukpɛkpɛ gu asu ka nyɔngɔ ɛ́ɔphi ndea Mósa. 57 Cɔ, bosegi ka Mokonga nga, ǎsoophi bukpɛkpɛ á tɔka á kukua k'ina á Mɔkɔta nɛsu Yéso Kiísito.

58 Ka bondɔ, badhani ékondi, mamani na bukpɛkpɛ, bósimbiɛ. Tutuisani ekuma ndea Mɔkɔta esa bhui. Ubhani phɔtɔ gea te, ekuma nɛnu ka Mɔkɔta nna jǎi.