<<    <     1 Bakɔlítɔ     16     >    >> 
Oengande badhasu á ka Yɛusalɛ́ma
16
1 Cɔ, ka nyɔngɔ á bangɔa nde boengande badhasu babeeki á ka Yɛusalɛ́ma ne, geani tɔ bíndɔ dénengodi kanisa á ka Gaatía. 2 Esa á yenga bhubhui, nkpa bhuakɛ ábhisɛ phaeka a bangɔa nɛkɛ ka mpɛphɛ mɔtɛkɛ, ka beana n'ɛtɔi nɛkɛ. Geani tɔ bó ka gea, bókokabɛgɛ mɔnɔ ye bangɔa mbenɔ nde nekidiande. 3 Mbenɔ nde neokidia, nětekande bakpa nde bɔ̌sɔmbu n'egabhɔ nɛnu. Něophande baobá́ nde bedundui ka tamba ne. Bágande ne na Yɛusalɛ́ma. 4 Aoba natɔtɔkɛani, negande na bɔ kimoti.
Boabhi á ka sungiaga a baobá́
5 Nejuande mɔtɛnu, mbusa á toka ani na Makɛdhɔnía. 6 Aoba Mokonga nakondi, nedande na benu oa esa ási ka bɛjɔ. Mpɔ, bóomoenga ka tutuisa a tamba nɛmɔ ɔma bhui nde negande. 7 Kékondi gǎkɛ nyɛ́nya anu mpongo. Nekondi ndiu nédɛ na benu oa esa ási aobá́ Mokonga nakondi.
8 Kɛkɛ nde gǎkɛ, niikande ka ěphɛ́sɔ ka sungia esa á Pɛtɛkɔ́tɛ. a 9 Nga, Mokonga amokodei aphe ka bhɛdanaga ekuma ángbó nanga babibia bábika.
10 Aoba Timɔtɛ́ɔ nǎnodhondi, nseseagani anja phɛ̂. Nga, a phɔtɔ ɔmbhɛdaneaga Mɔkɔta be'eme. 11 Ka benu moti kambɛnjiɛgɛ mɔnɔ. Ka tamba nɛkɛ, mɔkɔani ndiu ka bonjánja, ka gea, ámodhondɛ goto. Nga, neombondeaga kimoti na badhani.
12 Ka nyɔngɔ á dhasu Apɔ́lɔ, déndengemisigi mɔngɔ ási phɛ̂ gea, ágɛ mɔtɛnu kimoti na badhasu buangbo. Nna gǎkɛ na siki á ga kɛkɛ ndee. Agande gǎkɛ mbenɔ nde akondande.
13 ěngɛphani. Osimbiani ka beekea nɛnu. Bani boko. Bóbɛ na bukpɛkpɛ. 14 Geani kema bhubhui k'ekondani.
15 Baya, něnodengemisigi. Boomǔbha Sɛtɛphánɔ n'ekombo nɛkɛ, bíndɔ dámbeeki Kiísito mosa-mosa ka kenombe ndea Akáia. b Báɔ̌bhɛdaneaga bakpa ndea Mokonga anja phɛ̂. 16 Ɔbɔkani bakpa bea bundɔ. Obeani phɔtɔ bakpa bɔbhu bunde báosuia bhɛdaneaga á Mɔkɔta bea bɔ.
17 Ne na maseye ka kidia á Sɛtɛphánɔ, Phɔɔtunátɔ na Akaíkɔ. Nga, bánɔpɛni bii bókó bei. 18 Nga, báphɔngisi měma ani sumbii dábaphɔngisi měma anu. Osebeani bakpa bea bundɔ.
19 Batɔa ka kanisa á ka kenombe ndea Asía bánosesi. Akúa na Pisíla na babeeki buangbo bunde báodhondanaga mɔtɛbɔ, bánosesi. 20 Badhani bɔbhu bánosesi phɔtɔ.
Seseanagani k'ina Mɔkɔta, bókotoanɛgɛ ngungu anu bea batɔa-komunaměma.
21 Eme Pɔ́lɔ a ámbé nedundu moyo nde na njaga ani sasa ani: 22 Aoba nkpa nakánkondi Mɔkɔta, ábɛ ka nsɛngɛ á koboamɛ ndea Mokonga, c bii Mɔkɔta nɛsu aobhika.
23 Bonjánja ndea Mɔkɔta Yéso ábɛ na benu.
24 Něnokondi benu bɔbhu k'ina a Kiísito Yéso.