Ɔtɔa á nyɔngɔ á Mokonga anyɛ́nyi yɔnga nde nnauubhukana
14
1 Kabagani phɔ ekondi. Kondani phɔ bukpɛkpɛ danga-danga á Měma á Mokonga, bókondɛ phɛ̂ bukpɛkpɛ á ɔtɔa a nyɔngɔ. 2 Nga, mmbe aombhebha Mokonga ka yɔnga nde nnauubhukana, a tɔ ɔnyɔngɛa Mokonga, nna bakpa. Nna na nkpa nde aodigimisa nyɔngɔ nde aɔyɔnga. A tɔ ɔyɔnga kema á bɔsɔmɛa ka bukpɛkpɛ á Měma á Mokonga. 3 Nkpa nde a ndiu ɔɔtɔa nyɔngɔ ka bukpɛkpɛ á Měma á Mokonga, aóngodea bakpa nyɔngɔ ka mɔtisaga abɔ, gbagisaga á měma abɔ, na phiphisa á měma abɔ. 4 Nkpa nde aɔyɔnga ka yɔnga nde nnauubhukana, aɔmɔtisaga beekea nɛkɛ sasa akɛ. Mmbɔ aɔɔtɔa nyɔngɔ ka bukpɛkpɛ á Měma á Mokonga, aɔ́mɔtisaga batɔa-kanisa bɔbhu.5 Netókondi gea, benu bɔbhu bómbhebhɛ Mokonga ka yɔnga nde nnauubhukana. Nekondi gǎkɛ phɛ̂ gea, bɔ́ɔtɔɛ nyɔngɔ ka bukpɛkpɛ á Měma á Mokonga. Aoba nkpa naombhebha Mokonga ka yɔnga nde nnauubhukana, akeni nkpa ba angbo ákětiɛ nyɔngɔ nɛkɛ ka yɔnga nde báuubha. Kětia nyɔngɔ ndɔ ɛ̌̀mɔtisagande bakpa ndea Mokonga. Kabɛ nǎna bó, nkpa nde aɔɔtɔa nyɔngɔ anyɛ́nyi mmbɔ aombhebha Mokonga ka yɔnga nde nnauubhukana.
6 Cɔ, baya, aobá́ neneju mɔtɛnu, nɛnɛɔyɔngaga ka yɔnga nde nnauubhukana, kema sina nde bɔtɔande k'eme? Tanda phɔ. Atókeni nébhikɛ nɛ́nɔtɔ̌miɛgɛ kema á bɔsɔmɛa ndea Mokonga, kabɛ nyɔngɔ á ubhapha, ɔtɔa á nyɔngɔ, na bɔphɛi. 7 Aoba nkpa naɔ́bɛta baphii, naosua mbengu, naonjokoa ne bea miki, cɔ, bedigimisande embɔ kau bó? 8 Aoba nkpa nasu mbengu émani, ɛsɔ kau nakáubhukani bhase, animbe abondeande emani 9 Benu gǎkɛ, bádigimisande boabhi nɛnu bó, aobá́ nɔbɔ̌tɔmiaga bakpa ka yɔnga nde nnauubhukana? Boogea bó, bo tɔ ɔyɔngaga jǎi.
10 Yɔnga á k'ekuna danga-danga abiki ka mokonda. Yɔnga bhubhui ndɔ, bakpa danga-danga báɔɔka. 11 A gǎkɛ oba nkpa naɔmɔyɔngɛa nekéodigimisa yɔnga akɛ, abande mɔkɛni k'eme, nê phɔtɔ oba mɔkɛni ka yɛ. 12 Ka bondɔ, bii bokondi phɛ̂ nyɔngɔ á bukpɛkpɛ danga- danga, nnde Měma á Mokonga aógabhea bakpa, kabani phɔ phɛ̂ bukpɛkpɛ ndɔ aɔ́mɔtisa batɔa ka kanisa. 13 Nkpa nde akondi ye gǎkɛ bhebha á Mokonga ka yɔnga nde nnauubhukana, ámɛmɛ Mokonga geae, yɛ ámophɛ nkpa ndɔ bukpɛkpɛ á kětia á nyɔngɔ ndɔ ayɔngi.
14 Aoba nɛnɛɔmɛma Mokonga na yɔnga nde nnauubhukana, měma ani unge a tɔ ɔyɔnga. Ké gǎkɛ odigimisa. 15 Cɔ, négeɛ bó? Negeande be: Nɛmɛmande ka měma, nê phɔtɔ ɔmɛma na ubhapha ani. Neembande ka měma, nê phɔtɔ oemba na ubhapha ani. 16 Obɛ gǎkɛ, aobá́ no tɔ ombhebha Mokonga ka měma, badhakɔ bábande bea babhobho. Bákáubhɛku beekea ɛ́mɛmi nɛkɔ. Nga, bákádigimisɛku yɔnga nɛkɔ. 17 Nanga obhebhɔ ndɔ ába anja, kátɔkɛku nɛ̌̀mɔtisigi badhakɔ ka beekea a Mokonga.
18 Eme gǎkɛ, nembhebhi Mokonga nga, amopi bukpɛkpɛ á bhebha akɛ kɔ̌nɔnyɛ́nya ka yɔnga nde nnauubhukana. 19 Cɔ, bii bedhondanigi gǎkɛ na babeeki subi á kanisa, nekondi tɔ nɛ́yɔngɛ nyɔngɔ bɔku, nnde bakpa báuubha, mpɔ báuubhapha, kɔnyɛ́nya bikisa á nyɔngɔ nde nnauubhukana.
20 Baya, deketani ubhapha á koniki. a Bani phɔ bea baniki ba abhɔbhɔa, bunde bánauubha gea á bojede. Bani ndiu bagbɛga ka ubhapha anu. 21 ěɔphi ndea Mokonga adokomisi bɔphɛi ndɔ be:
Mɔkɔta agi te, nɛ̌̀phɛande baIsilaɛ́li ka yɔnga ndea bakɛni.
Nɛ̌̀yɔngɛande k'ɛsɔ abɔ. Nanga ába bó, bákámɔɔkɛku. b
22 Nga, bhebha ka yɔnga nde nnauubhukana, ande mphaniɔ nde aóbangisa bundɔ bákámbeeki Mokonga. Nna bondɔ ka babeeki. Ɔtɔa á nyɔngɔ a ndiu mphaniɔ ka babeeki, nna ka bundɔ bákábeeki.
23 Aoba babeeki bɔbhu nabádhondanigi, nabáɔyɔnga ka yɔnga nde nnauubhukana, cɔ, bakpa nde bánaomǔbha Mokonga nabákámbeekimbɛ, nabábei, bákágeɛku te, bonde baama-nyai? 24 Cɔ, kabɛ bakpa bɔbhu nabáɔɔtɔa nyɔngɔ á Mokonga, nkpa nde nnaomǔbha Mokonga na kámbeekimbɛ, aubhande bojede nɛkɛ anja phɛ̂ ka nyɔngɔ ndɔ aɔɔka. Nga, nyɔngɔ nɛnu angɔnande. 25 Kema nde asɔ̌mi ka měma akɛ, aubhukanande bhase, áotena na odo, áombhebha Mokonga, áotobea: «Mokonga a sɔsɔbɛ anu doni.»
Geani nyɔngɔ bhui ka bonjánja na bɔjɛjɛ
26 Cɔ, baya. Bégeɛ bó? Bii boodhondanaga, nkpa moti aoemba, moti aɔphɛa, moti aɔɔtɔa kema á bɔsɔmɛa ndea Mokonga, moti aombhebha Mokonga ka yɔnga nde nnauubhukana, moti naoketia obhebhɔ ndɔɔ. Nndɔ bhui ágeanɛ ka mɔtisaga á batɔa ka kanisa. 27 Aoba bakpa nabá n'obhebhɔ ka yɔnga nde nnauubhukana, akeni bábɛ bakpa babɛ, kanyɛ́nyɛ mɔnɔ gǎkɛ bakpa basaɔ. Báyɔngɛ moti-moti. Nkpa moti ákětiɛ nndɔ báɔyɔnga. 28 Aoba nketi-nyɔngɔ nǎnabei, bakpa ndɔ bádhakanɛ. Nkpa áyɔngɛ tɔ sasa akɛ ka měma, Mokonga amɔ̌kande.
29 Aoba baɔtu-nyɔngɔ nabá na bɔphɛi, akeni bábɛ bakpa babɛ, kabɛ bakpa basaɔ. Báyɔngɛ moti-moti. Buangbo báɔkaneɛ ka engekisa, aobá́ nyɔngɔ nɛbɔ nande nyɔngɔ á Mokonga doni. 30 A gǎkɛ oba Mokonga nangodi nkpa ba angbó, nyɔngɔ á bɔsɔmɛa, mmbɔ aɔyɔnga ádhakanɛ. 31 Ɔtɔani nyɔngɔ moti-moti gea te, bakpa bɔbhu bámɔtɛ ka kɔbɔngɛ, bágbagɛ ka měma. 32 Akeni gǎkɛ mɔtu-nyɔngɔ éambɛ ka bukpɛkpɛ ndɔ Měma á Mokonga amophi. 33 Nga, Mokonga nna ntɔ-éongo. A ndiu ntɔa-bɔjɛjɛ. A tɔ bo ka kanisa bhubhui ndea babeeki.
34 Akeni bake bádhakanɛ subi á kanisa. Bánaɔtɔka nabákodi aphe-nɔkɔ abɔ. Báikɛ kusi a kanisa bíndɔ ɛɔphi ndea Mokonga ayɔngi. 35 Bá ye oba na muisiɔ, béusiɛ bamunyabɔ mɔtɛbɔ. Nga, ande soni mbenɔ nde nke aɔyɔnga subi á kanisa. \f+ 14.34-35 Kengeanisa phɔ nyɔngɔ nde na 1 BaKɔlítɔ 11.5, bii agi, bake báɔtɔka nabáyɔngi na mɛma subi á kanisa. Baubhaphi buangbo báogea te, 14.34-35 ande muisiɔ ndea baKɔlítɔ. \f*
36 Cɔ, ande gea te, nyɔngɔ á Mokonga dátoki tɔndɔ mɔtɛnu? Dáju tɔndɔ mɔtɛnu? 37 Aoba nkpa nauubha te, ande mɔtu-nyɔngɔ, na na bukpɛkpɛ ndea Měma á Mokonga, cɔ, ábeekeɛ bhase gea te, moangɔ ndɔ něnodundui ande ɛɔphi ndea Mɔkɔta. 38 Aoba nakábeeki, bɔ́kɔmɔ̌kɛ mɔnɔ.