13
1 Nanga nɛ́yɔnga n'ɛsɔ á k'ekuna danga-danga ndea bakpa, ninde á bamalaeka, neké gǎkɛ n'ekondi, ne bea ɛsɔ áyomɛ n'ɔkɔtɔ. a 2 Nanga néba mɔtu-nyɔngɔ á Mokonga, nanga néubha nyɔngɔ bhui nde ɛ̌̀sɔ̌mɛani, nanga néba na kɔbɔngɛ bhui, nanga néba na beekea ángbó nde aɔtɔka toisa á mamba, neké gǎkɛ n'ekondi, ne tɔ jǎi. 3 Nanga négabha nkumba nɛmɔ bhui ka batɔa-buyɛnɛ, nanga nétambisaga nyama ani k'édokomisa ani mosa á bakpa ka nyɔngɔ á Mokonga, b neké gǎkɛ n'ekondi, nnaomogea na kema mosa á Mokonga.4 Ntɔ-ékondi aophiphia kema bhui, aógeea bakpa anja, nna na nsengo, nnaódokomisa, nnaótondoa, 5 nnaogea kema á soni, nnaokaba bokambia nɛkɛ sasa akɛ, nnaɔbɛa, nnaokanisia bojede nde bángii ne, 6 nna na jaí ka nyɔngɔ á bojede, a ndiu na maseye ka nyɔngɔ á kodoni. 7 Ntɔ-ékondi aodakaga nyɔngɔ bhui, beekea nɛkɛ, na nsebeɔ nɛkɛ ka Mokonga a tɔ esa bhui, aokinia nyɔngɔ bhui.
8 Ekondi nnaosía. Ɔtɔa á nyɔngɔ á Mokonga asíande gǎkɛ. Bhebha á Mokonga ka yɔnga nde nnauubhukana, asíande phɔtɔ. Ubhapha nde Měma á Mokonga aóbopha bakpa, asíande. 9 Cɔ, kɛkɛ nde, békéuubha nyɔngɔ bhui, béké na bukpɛkpɛ á ɔtɔa a nyɔngɔ bhui á Mokonga. 10 Bii Mokonga asúubhisaeka kema bhubhui, kema á ka matu nde kábɛku ye kema.
11 Bii détú phɔ́tɔ miki, dɛ́ɔyɔnga bea miki, déuubhapha bea miki, dɛ́ɔkɔkɔa nyɔngɔ bea miki. Cɔ, kɛkɛ nde gǎkɛ bii nɛmɔti ye, nedeketi nyɔngɔ á koniki bhui. 12 Kɛkɛ nde, bɛɔmɔ̌na Mokonga bea iii subi á kiyɔɔ. c Mbusa, bɛmɔ̌naeka iso k'iso. Kɛkɛ nde, neomǔbha Mokonga abhɔa. Mbusa nemǔbhaeka bhase bíndɔ yɛ aomuubha.
13 Ka matu nde, kema isaɔ ángbóngbo a ungee: beekea, nsebeɔ, ekondi. Nnde anyɛ́nyi gǎkɛ bhui ande ekondi.