Měma á Mokonga a tɔ mo, bukpɛkpɛ nde aógabhea bakpa, a danga-danga
12
1 Baya, béabhɛ phɔ nyɔngɔ á Měma á Mokonga. Nekondi bódigimisɛ nyɔngɔ ndɔ anja. 2 Bûubha gea te, mbenɔ nde dóbókómǔbhimbɛ Mokonga, nkumba ésomba ajede dánoboti phɛ̂ k'aphe ajede, nanga bii nkumba ndɔ nnaɔyɔnga. 3 Ka bondɔ unge, nekondi búubhɛ bhase gea, mmbe aɔyɔnga na bukpɛkpɛ á Měma á Mokonga nnaonsɛmɛa Yéso gea: «Ambe Yéso aku phɔ.» a Nna na nkpa nde aɔtɔka nagi: «Yéso ande Mɔkɔta», Měma á Mokonga nakámphangigi.4 Cɔ, Měma á Mokonga a tɔ mo. Egabhei bakpa nɛkɛ bukpɛkpɛ á gea ékuma danga-danga. 5 Mɔkɔta a tɔ mo. Eophi bakpa bukpɛkpɛ á gea ékuma danga-danga subi á kanisa. 6 Mokonga a tɔ mo. Eophi bakpa bukpɛkpɛ á tɔtɔkisa á moangɔ nɛkɛ bhui ka bakpa bɔbhu. 7 Měma á Mokonga ěgabhei bakpa nɛkɛ moti-moti bukpɛkpɛ á gea ékuma danga-danga. K'aphe ndɔ unge auubhisa gea, a subi á bakpa nɛkɛ. Aogea bó ka bonjánja á bakpa bɔbhu. \ls 8 Měma á Mokonga aomopha nkpa moti kɔbɔngɛ. \ls Měma ndɔ aomopha moti, ubhapha. \ls 9 Měma ndɔ aomopha moci, beekea gea te, kema ángbó atɔtɔkɛanande. \ls Měma ndɔ aomopha moci bukpɛkpɛ á tɔtɔkisa á boamia danga-danga. \ls 10 Aomopha nkpa moci bukpɛkpɛ á tɔtɔkisa á ketangaɔ, \ls Moci bukpɛkpɛ á ɔtɔa á nyɔngɔ, \ls Moci, bukpɛkpɛ á digimisa á nyɔngɔ á Měma Anja na měma ajede, \ls Moci, bukpɛkpɛ á yɔnga, yɔnga nde bakpa bánauubha, \ls Moci, bukpɛkpɛ á ketia á yɔnga ndɔ bii nnauubhukana.
11 Cina á bukpɛkpɛ ndɔ bhubhui atoki ka Měma ndɔ moti. Yɛ aógabhea bakpa bukpɛkpɛ á gea á kema bíndɔ akondi.
Mbeeki ande gbutuka a nyama á Kiísito
12 Nga, Kiísito a bea nyama á nkpa, nnde a na gbutuka danga-danga. Nanga gbutuka ndɔ ábika, nyama á nkpa ndɔ a tɔ mo. 13 Besu bɔbhu, baYúdha na bunde bána baYúdha, bakɔbɛ na bunde bána bakɔbɛ, Mokonga ǎsobatisi subi á Měma akɛ gea te, bébɛ besu bɔbhu bea nkpa mo. Mokonga ǎsoophi phɔtɔ Měma akɛ, áotuma subi asu bi'ibo á onoa. 14 Nga, nyama á nkpa nna na gbutuka moti tɔ. Gbutuka akɛ abiki ndiu.
15 Cɔ, aobá́ Ecinji nagi: «Ké Njaga. Ka bundɔ, ké gbutuka a nyama.» Nndɔ nna gea te, nna gbutuka a nyama. 16 A goto oba Ketue nagi: «Ké Iso. Ka bundɔ, ké gbutuka a nyama.» Nndɔ nna gea te, nna gbutuka a nyama. 17 Aoba nyama bhui na tɔ iso, bɛɔkaphande bo? Aoba nyama bhui na tɔ ketue, bɛɔkande su á kema bo? 18 Cɔ, Mokonga ajukanisi ndiu gbutuka a nyama moti-moti k'ɔma nɛkɛ bíndɔ akondi. 19 Atú oba gbutuka a nyama bhubhui na tɔ n'ekuma moti, nyama ndɔ abande kema? 20 Ka bondɔ, gbutuka a nyama a ási, nyama a tɔ mo.
21 Iso nnaɔtɔka nangi Njaga: «Ké na siki akɔ.» Mɔ, nna phɔtɔ ɔtɔka nangi Ecinji: «Ké na siki akɔ.» \f + 12.21 Subi á mɛni nde, Iso na Mɔ bánde bea bakpa nabáuubha te, bánde bakɔta. Ecinji na Njaga bánde tɔ bakpa jai-jai. 22 Nanga békanisia gea, gbutuka a nyama moti ande nkusi, bɛ́kɛ́ɔtɔka nebeendi kangai. 23 Gbutuka a nyama nde nna na boombia, a unge beodokomisa. Gbutuka a nyama á soni, a unge beobumba na ngɔmbɛ. 24 Gbutuka a nyama nde bakpa báɔɔna, békéobumba. Cɔ, Mokonga ajukanisigi gǎkɛ gbutuka bhubhui á nyama ndɔ, áodokomisa gbutuka a nyama ndɔ nna na boombia. 25 Ande gea te, kákeni gbutuka á nyama ákatanɛgɛ. Akeni ndiu gea te, gbutuka a nyama bhubhui áenganɛ ninɛngbo. 26 Aoba gbutuka a nyama moti naosamba, gbutuka bhui â phɔtɔ osamba. Aoba gbutuka moti na n'obhebhɔ, gbutuka bhui áoba na maseye. 27 Cɔ, benu bɔbhu bonde nyama á Kiísito. Benu moti-moti bo phɔtɔ gbutuka a nyama ndɔɔ.
28 Ka bondɔ, Mokonga ěbhisi batɔ-ékuma danga-danga subi á kanisa: \ls Ebhisi mosá-mosá bateki, \ls áǒbhisa baɔtu-nyɔngɔ, \ls mpɔ, baphangigi, \ls batɔtɔkisi-ketangaɔ, \ls baamisi ka bukpɛkpɛ á měma á Mokonga, \ls baengi, \ls bamamei ekuma, \ls mbusa, babhebhi-Mokonga ka yɔnga nde bakpa bánauubha.
29 Cɔ, ande gea te, bakpa bɔbhu bánde bateki? baɔtu- nyɔngɔ? baphangigi? batɔtɔkisi-ketangaɔ? 30 baamisi? babhebhi-Mokonga ka yɔnga nde bakpa bánauubha? baketi-obhebhɔ ndɔ? Bɛɛndɔ.
31 Cɔ, kabagani phɔ bukpɛkpɛ á Měma á Mokonga, nnde a anja phɛ̂. b
Ekondani
Oani gǎkɛ, nekophangiande aphe anja, nnde anyɛ́nyi bhui.