11
1 Cɔ, ómobeani, bíndɔ neombea Kiísito.Bake bákakusɛ mɔnɔ kanisa na soni bii báɔ̌tɔmia nyɔngɔ
2 Něnobhebhi bii bogi, bo phɔ́tɔ omokanisia ka nyɔngɔ bhui, nobo phɔtɔ obea ɛɔphi bíndɔ dénongodi. 3 Nekondi gǎkɛ búubhɛ nyɔngɔ ndee: Kiísito ande mɔ á moko-moKiísito. a Moko ande mɔ á nke. b Mokonga ande mɔ á Kiísito. c 4 Ka bondɔ, mbenɔ nde moko aɔmɛma, kabɛ naɔtɔmia nyɔngɔ á Mokonga, nabumbi mɔ akɛ, ankusi Kiísito na soni. 5 A gǎkɛ oba nke naɔmɛma, kabɛ naɔtɔmia nyɔngɔ á Mokonga, nakábumbi mɔ akɛ na bhɔngɔ, ankusi mɔ akɛ na soni. Nga, báɔmɔ̌na nabánkangadu. d 6 Aoba nke nakábumbi mɔ akɛ, kákeni bánkangaduɛ bea moko? Bii a gǎkɛ soni ka kangadua akɛ, ambe ábumbɛ mɔ akɛ na bhɔngɔ.
7 Kákeni moko ábumbɛ mɔ akɛ na bhɔngɔ. Nga, ande iii á Mokonga, na boombia akɛ. Bake bá gǎkɛ boombia ndea boko. 8 Nga, Mokonga dákánconji moko na angaja á nke, dánconji ndiu nke na angaja á moko. 9 Dákánconji moko ka nyɔngɔ á nke, dánconji ndiu nke ka nyɔngɔ á moko. 10 Ka bondɔ, akeni nke ábɛ na mphaniɔ á kɔkɔta gu á mɔ, ka nyɔngɔ á bamalaeka. 11 Bii be gǎkɛ kimoti na Mɔkɔta ka měma, nke nnaoika kanga á moko, moko nna phɔtɔ oika kanga á nke. 12 Negie, bíndɔ Mokonga dánconji nke na angaja á moko, nke áomonja moko, bhui a gǎkɛ ekuma ndea Mokonga.
13 Omongodeani phɔ. Akeni nke ámɛmɛ Mokonga ka madhondanɔ nakábumbi mɔ akɛ? 14 Nga, bakpa báuubha gea, ephuti ande soni ka moko, 15 ande gǎkɛ boombia ka nke. Nga, ephuti abumbi mɔ akɛ. 16 A gǎkɛ oba bakpa nabáopua ka nyɔngɔ ndɔ, cɔ, béké n'ɛɔphi nɛngbo. A tɔ bondɔ subi á kanisa ndea Mokonga bhui.
Nkpa éambɛ mosa á eaga k'endu ɛ́mɛmi ndea Mɔkɔta
17 Ne na nyɔngɔ nɛngbo. Kénobhebhi ka nyɔngɔ á moangɔ bii boodhondanaga. Nga, bii boodhondanaga, bojede abiki phɛ̂ kɔnyɛ́nya bonjánja. 18 Nyɔngɔ imoti a be: Bámongodi gea, bii boodhondanaga, bokatanigi k'ekombo danga-danga.
Nebeeki kau abhɔa. 19 Nga, neuubha gea, baKiísito á doni na baKiísito á mbɛa bákatanagande mbenɔ nde báodhondanaga.
20 Cɔ, bii boodhondanaga ka eaga mosa á Mɔkɔta, nna eea nɛkɛ unge booea doni. 21 Nga, bii booeaga, nkpa aokamisaga ea éea nɛkɛ, kanga á bondea a batɔ-ékombo nɛngbo. Buangbo báosía na nja, buangbo makana aɔ́bhɛda. 22 Cɔ, bókó n'endu nɛnu sasa anu ka eaga na noa ási? Bókóǒtondea bakpa ndea Mokonga mbenɔ nde booeaga mosa abɔ? Bookaba kusa á bauki na soni? Nénongodeɛ bo? Nénobhebhɛ? Kénobhebhɛku tanda.
23 Cɔ, nnde Mɔkɔta Yéso dámongodi, dɛ́nɔtɔ̌migi. Kipha ndɔ, mosa á dhunga akɛ, áɔbhɛda mokati, 24 áombhebha Mokonga, áobunaga mokati ndɔ, áogea te: «Nnde ande nyama ani. Ande ka benu. Geani bo ka kanisia ani.» 25 Mbusa á eaga, â phɔtɔ ɔbhɛda kibe á makana anjɛ, áɔyɔnga: «Nnde ande magia ani, magia á konsamba á kɛkɛ, nnde Mokonga aɔngi ka bakpa nɛkɛ. Mɔngɔ bhui bii boonoa, geani bondɔ ka kanisia ani» 26 Nga, bii booea mokati ndɔ, na noa ibo á subi á kibe ndɔ, bǔubhisa bakpa, kukua á Mɔkɔta na ka bii ajaeka.
27 Cɔ, bii a bondɔ, nkpa nde aogea ajede mbenɔ nde aoea mokati ndɔ na noa ibo á subi á kibe ndɔ, agbau nyama na magia á Mɔkɔta. 28 Ka bondɔ, nkpa éambɛ mosa. Mpɔ, áeɛ mokati ndɔ na noa íbo á subi á kibe ndɔɔ. 29 Nga, aobá́ nkpa nai mokati ndɔ na noa kanga á ianaga a nyɔngɔ á nyama á Mɔkɔta, e aɔphanei bojede gu akɛ sasa akɛ.
30 Cɔ, ka nyɔngɔ á bojede á katanaga subi á maseye, f bakpa ba ási báosamba, buangbo ba kusi, moti-moti báosia. 31 Atú oba nɛbɛɛnji nyɔngɔ nɛsu sasa asu, ámbe Mokonga kásongisi ka nyɔngɔ. 32 Bii Mɔkɔta Mokonga ǎsɔbɛti n'esuia nɛkɛ, a tɔ ka bangisa asu gea, békengiɛ mɔnɔ ka ntua á tena a nyɔngɔ ndea Mokonga, kimoti na bakpa nde bánaomǔbha, k'esa ndɔ abhikaeka. 33 Baya, ka bondɔ, bii boodhondanaga ka eaga mosa á Mɔkɔta, bondeanagani phɔ. 34 Aoba nkpa na na nja, áeɛgɛ k'endu nɛkɛ ka bangisa gea, esuia ndea Mokonga kǎnɔguiɛmbɛ bii boodhondana.
Cɔ, nebɔngisiagande nyɔngɔ nɛngbo, nnde ajigi, mbenɔ nde nejuande mɔtɛnu.