<<    <     1 Bakɔlítɔ     10     >    >> 
Békesikiɛ mɔnɔ mbusa bíndɔ baIsilaɛ́li dábagi kala
10
1 Baya, nekondi phɔ gea, bókanisiɛ tambea á batatasu baIsilaɛ́li mbenɔ nde dábaotámba kimoti na Mósa. Dábatámbi bɔbhu kusi egugu, nnde Mokonga débhisii ka amba abɔ. a Bɔbhu dábankai obenge bii Mokonga dákatanisi ibo ka bhomea abɔ aphe. b 2 Egugu na ibo ndɔ dátú mphaniɔ á batisa abɔ ka njaga a Mósa. 3 Dábai tɔ bɔbhu eea nde Mokonga déophi. 4 Dábanu tɔ bɔbhu ibo nde Mokonga déophi. c Nga, dábanu ibo nde dájuani k'ɛtɛ nde Mokonga déophi mbenɔ nde dábaotámba ka nkanda. ětɛ ndɔ dátú mphaniɔ á gea te, Kiísito dátú kimoti na bɔ. 5 Nanga ába bo, Mokonga dɛ́kɛ́bɔngɛi bɔbhu sɔsɔbɛ abɔ. Ka bondɔ, dábatú bhíbhí á tinda bɔbhu, monda abɔ áogua ka nkanda ɔma bhui.
6 Nyɔngɔ ndɔ ande mɛni ka besu ka gea, békebeɛ mɔnɔ tambea abɔ ajede. 7 Nga, kákeni bógɛ k'aphe ésomba ajede, bíndɔ buangbo sɔsɔbɛ abɔ dábagi. Buku á Mokonga adigimisi nyɔngɔ be: «Bakpa ndɔ dábaiki, báoeaga, báonoa, mpɔ báoma, báobina ka mpɛphɛ ésomba nɛbɔ.» d 8 Békegɛ mɔnɔ k'aphe íɛbɛ, bíndɔ bakpa buangbo sɔsɔbɛ a baIsilaɛ́li ndɔ dábagi. Ka bondɔ, bakpa ɛlɛphu nkama ibɛ na isaɔ dábasi k'esa mo. 9 Bókontombɛgɛmbɛ e Mɔkɔta Mokonga bíndɔ buangbo sɔsɔbɛ a baIsilaɛ́li ndɔ dábantombigi. Ka bondɔ Mokonga áǒtekisia banjɔka, báɔ̌gɔta, baIsilaɛ́li buangbo báosía. \f 10.9 Tombaga, ande gea ajede, ûubha te, Mokonga kageɛku ka kema. 10 Bɔ́kɔngɔngɔnɛgɛmbɛ bíndɔ bakpa buangbo sɔsɔbɛ a baIsilaɛ́li dábangɔngɔnigi. Ka bondɔ, Malaeka-á- kukua áǒma bakpa ndɔɔ. 11 Cɔ, dábadundu nyɔngɔ ndɔ bhui ábɛ mphaniɔ ka besu, ka bangisa asu. Nga, saga nde nyɔngɔ nde atɔtɔkɛanande goto kau, a yetɔ bhîbhí.
12 Nkpa nde aogea, a na bukpɛkpɛ, éambɛ. Kaguɛ mɔnɔ. 13 Tombaga bhubhui nde ǎnodhondande, ědhondaeka tɔ bakpa bɔbhu. Mokonga nna gǎkɛ obosea mɔkɔ nɛkɛ. Kánokambɛku geae, bukpɛkpɛ á tombaga moti ánɔtɔkɛ. Aoba tombaga nǎnodhondi, Mokonga ǎnoophande bukpɛkpɛ á phiphia, áonóphangia aphe á tɔkai.
Bókodhondanisɛmbɛ mɛsa á Mɔkɔta na mɛsa á baketi
14 Ka bondɔ, baya, bangani nyɔngɔ ésomba ajede. 15 Něnongodi nyɔngɔ bea bakpa nabáuubhapha. Tenani nyɔngɔ nde sasa anu. 16 Cɔ, bii beonoa kimoti makana anjɛ ka kibe, nnde beonsega Mokonga ne, nna ɔngana asu na Kiísito, ka nyɔngɔ á magia akɛ? Bii beoea kimoti mokati nde beobunaga, nna ɔngana asu na Kiísito ka nyɔngɔ á nyama akɛ? 17 Nga, mokati ndɔ a tɔ mo. Nanga bébika, be tɔ bea nkpa mo. Nga, beogabhisana mokati moti ndɔ sɔsɔbɛ asu.
18 Okanisiani phɔ baIsilaɛ́li. Bii dábai nyama á phɛa, báodhondana na Mokonga. 19 Cɔ, nɛ́yɔngɛ ye bo? Nyama nde baPagano báphui k'ɔphɛɔ á esomba ajede, ande kema sina? 20 Nna ye kema. Neengekisi gǎkɛ gea, baPaganɔ báɔphɛa nyama mosa á baketi, nna ndiu mosa á Mokonga. Kékondi gǎkɛ bódhondanɛ na baketi. 21 Bɔ́kɔ́ɔtɔka nobonu ibo á subi á kibe ésomba ndea Mɔkɔta n'ibo á subi á kibe ésomba ndea baketi. Bókó phɔtɔ ɔtɔka noboigi ka mɛsa á Mɔkɔta na mɛsa á baketi. 22 Bii a bo, beokaba jujukisa esuia ndea Mɔkɔta? Bebande na bukpɛkpɛ á dhakanisa á esuia nɛkɛ?
Geani tɔ kema bhui ka ombisa á Mokonga
23 Boogea te: «Mokonga kásoimisi ka kema.» A bo! Nna gǎkɛ kema bhubhui unge ǎnoengande. Boogea te: «Mokonga kásoimisi ka kema.» Kema bhubhui nna gǎkɛ ɔ̌mɔtisa bakpa ka měma. 24 Nkpa kakabɛgɛmbɛ kema nde akondi ka yɛ sasa akɛ. Akabɛgɛ ndiu kema nde a anja ka bakpa buangbo.
25 Boodhonda nyama ka mosomba, sombani, bóeɛ, kanga á usiaga, aobá́ nande nyama ɔ́phɛɔ. 26 Nga, buku á Mokonga adigimisi be: «Mɔkɔta Mokonga ande mɛna á mokonda bhui na kema bhubhui nde a subii.»
27 Aoba nkpa nakámbeeki Kiísito ǎnɔɔphanei eea, nobobeeki ga á mɔtɛkɛ, cɔ, gani. Aoba nǎnoophi eea, eani kanga á ngaka. 28 A ye gǎkɛ oba nkpa ba angbo nǎnongodi gea, eea ndɔ báphui ka phɛa, bókoeɛmbɛ, ka nyɔngɔ á ngaka á ka měma. 29 Negi bo ka nyɔngɔ á nkpa ndɔɔ, nna ka nyɔngɔ anu.
Nyɔngɔ sina nde báomoimisia ka nyɔngɔ á nkpa ba angbo? 30 Kabɛ neneombhebha Mokonga ka kema nde neoea, cɔ, bakpa báomoca ka bo?
31 Cɔ, kabɛ nobooeaga, boonoa, noboogea kema sina, geani tɔ kema bhubhui ka ombisa á Mokonga. 32 Bókonsikisɛ mɔnɔ nkpa mbusa, kabɛ moYudha, kabɛ mopaganɔ, kabɛ ntɔa-kanisa ndea Mokonga. 33 Eme Pɔ́lɔ, neókondisaga na bakpa ka nyɔngɔ bhui. Kéokaba bonjánja nɛmɔ sasa ani, ne ndiu okaba bonjánja ka bakpa ba ási gea te, Mokonga éamisɛ.