Beotambea kema bhubhui gea te, békeimisiɛ mɔnɔ nyɔngɔ á Mokonga
9
1 Cɔ, ké na bukpɛkpɛ á gea á kema nde nekondi? Ké nteki? Kɛ́mɔ̌ni Yéso, Mɔkɔta nɛsu? Bókó baniki ékuma nɛmɔ? 2 Nanga bakpa buangbo bámoya gea, ké nteki, benu gǎkɛ boomuubha. Nga, benu sasa anu, bonde mphaniɔ ékuma nɛmɔ gea, nende nteki ndea Mɔkɔta.3 Bii bakpa báomoca, nɛyɔngi be gu á besu bateki: 4 Békékeni eaga na noa k'ekuma nɛsu? 5 Kákeni bébɛ na bake-babeeki ka tamba, bea badhasu bateki, bea Pɛ́tɛɛ, na bamunamakɛ na Yéso?
6 Cɔ, a tɔ eme na Bhaanábha bá unge be tɔ ɔbhɛdanaga ka tɔa á kema nɛsu bhubhui. Nna bó? 7 Nga, ntɔ-émani sina mbe aóphenda sasa akɛ? Ngubhi- ciko sina mbe aokona mbo, kaeɛ kau? Cɔ, animbe aoamba etuge, kaeɛ kau? 8 Ande gea te, nɛyɔngigi bea nkpa? Bɛɛndɔ. ěɔphi ayɔngi kau. 9 Nga, Mokonga dámophi Mósa ɛɔphi gea te:
Bii ngɔmbɛ aombotaga me á dhoa á mponga, bókodakɛmbɛ aphɛnɔkɔ akɛ. Nga, oa unge aoeaga. \picr HK65E, oxen with plow Caption below picture \picc Bangɔmbɛ báoduia ciko, nabáobotaga me á dhoa á mponga. \picl near 1 Cor 9.9
Cɔ, Mósa adundu tɔ nyɔngɔ ndɔ ka bangɔmbɛ? 10 Kásɔyɔngɛi phɔtɔ? Eya, Mósa dádundu nndɔ ka besu bateki. Nkpa nde aogubha na mmbe aodhoa mponga, akeni báeɛgɛ phɔtɔ k'ekuma nɛbɔ. 11 Bii débekoni mbo á Nyɔngɔ á Mokonga ka měma anu, cɔ, abande ajede aobá́ nebedungu mbo ka njaga anu? 12 Bii badhani bateki báoea ka sadaka nɛnu, békékeni phɔtɔ eai bó?
Cɔ, bii débetú sɔsɔbɛ anu, dɛ́bɛ́kɛ́nɔmɛmi ka kema. Débe gǎkɛ otambea kema bhubhui gea te, békeimisiɛ mɔnɔ tutuisa á Nyɔngɔ Anja ndea Kiísito. 13 Nga, bakpa nde báɔbhɛdanaga k'ɔma á phɛa, báoeaga k'ɔphɛɔ. Bakpa nde báɔbhɛdanaga k'endu ɛ́mɛmi ndea Mokonga, bá tɔ oeaga ka sadaka. 14 Mɔkɔta Yéso désosi bakpa nde báɔtɔmiaga nyɔngɔ anja nɛkɛ gea, báeɛgɛ k'ekuma nɛbɔ.
15 Cɔ, dɛ́kɛ́mɛmi ophendɔ mɔtɛnu. Kédundu bó oani ka mɛmagai. Détú ɔmɛma kema, ámbe kéǒbhebha sasa ani. Nékuɛ ye phɔ, nɛkɛ́mɛmigi bangɔa.
16 Kɛ́ɔtɔka neněbhebhi ka tɔ̌miaga á nyɔngɔ anja ndea Mokonga, nga, ande mɔphɛ nde Mokonga abhisi subi ani. Aoba nɛkɛ́tɔ̌migi nyɔngɔ anja ndea Mokonga, ande ngomi k'eme.
17 Aoba nɛdɛ́sɔmbu ekuma á nteki sasa ani, ámbe nekeni ophendɔ. Kɛ́sɔmbu gǎkɛ, Mokonga a ámbé amopi ekuma ndɔ ka tɔtɔkisa á moangɔ nɛkɛ. 18 Ophendɔ nɛmɔ ande kema sina? Ande tɔ̌miaga á bakpa nyɔngɔ anja kanga óphendɔ. Nekeni n'ophendɔ, ké gǎkɛ ɔmɛma.
19 Ké na nyɔngɔ na nkpa. Ké phɔtɔ nkɔbɛ ndea nkpa. Něbhisi gǎkɛ sasa ani nkɔbɛ ndea bakpa bɔbhu gea, néboteɛ bakpa ba ási, bábɛ babeeki. 20 Bii nɛɔbhɛdanaga sɔsɔbɛ a baYúdha, tambea ani akengeani ninɛbɔ ka gea, bámbeekeɛ Kiísito. Nanga ɛɔphi ndea Mósa nna na bukpɛkpɛ k'eme, ne gǎkɛ ɔbhɛdanaga sɔsɔbɛ a bundɔ bá kusii. Eya, něbhisi kau ka gea, bámbeekeɛ Kiísito. 21 Bii nɛɔbhɛdanaga sɔsɔbɛ a bakpa nde bánaobá́nga ɛɔphi ndɔ, tambea ani akengeani ninɛbɔ ka gea te, bámbeekeɛ Kiísito. Nna gea te, kéobanga ɛɔphi ndea Mokonga. Nga, neoamba ɛɔphi ndea Kiísito. 22 Cɔ, bii nɛɔbhɛdanaga sɔsɔbɛ a bakpa nde bákámɔtimbɛ ka beekea a Kiísito, tambea ani akengeani ninɛbɔ ka gea, bámbeekeɛ Kiísito. Eya, neogea bea bakpa bɔbhu ka nyɔngɔ á amisa á bakpa moti-moti sɔsɔbɛ abɔ.
23 Neogea nndɔ bhui ka nyɔngɔ anja ndea Mokonga gea te, ámopɛ k'egabhɔ á maseye á boamia abɔ. 24 Bókûubha gea te, bo bea batɔa-njoko á ga á mbangɔ? Nga, nkpa moti tɔ a ye ɔtɔka, báɔnkɔma. Cɔ, bani bea nkpa ndɔɔ. 25 Nga, nkpa bhuakɛ mmbe akondi ngia á ka njoko, akeni éambɛ. Aogea bondɔ ka gea te, bámophɛ ɛkɔmi á mokonda, nnde aujukanande. Besu gǎkɛ, beogea nɛsu ka geae, bébɛ n'ɛkɔmi nde káujukanɛku, nnde a na kobha. 26 Ka bondɔ, ké bea nkpa nde aoga mbangɔ jǎi. Ké phɔtɔ bea ntɔa-njoko á bɛtanaga, a mmbɔ aoophaga njaga etiti. 27 Neotambisaga nyama ani sasa ani, ka gea, nébɛ mɛnɛi. Mpɔ, mbusa á phɛa á bakpa, Mokonga kamobeɛgɛ mɔnɔ.