Kɔbɔngɛ aobimbisa mɔ, ekondani a gǎkɛ ǒgbagisa bakpa
8
1 Bɛ́yɔngɛni phɔ nyɔngɔ á dhue á nyama á ɔphɛɔ. Bogi te: «Be na kɔbɔngɛ bhui nga, bende babeeki.» A bo. Kɔbɔngɛ ndɔ ǎnobimbisi gǎkɛ mɔ. Ekondani a ndiu ǒgbagisa bakpa. 2 Nkpa nde aogea te, auubhapha, nnauubhapha doni. 3 Mmbe ankondi gǎkɛ Mokonga, a ámbé Mokonga aomǔbha.4 Cɔ, muisiɔ nɛnu a be: Bɛɔtɔka nebei nyama á phɛa? Cɔ, beuubha gea, Mokonga a tɔ mo. Ka bondɔ, nyɔngɔ á iii á mɔkɔta á mbɛa, á na kobha, a tɔ jǎi ka mokonda. 5 Nga, bakpa báogea, bakɔta á na kobha na mokonda ba ási. Cɔ, a tɔ bo ka bɔ. 6 Ka besu gǎkɛ, Abhasu Mokonga a tɔ mo, mmbe aconji kema bhubhui. Asoconji phɔtɔ gea te, bémbhebhɛ. Be tɔ na Mɔkɔta moti, ina akɛ ande Yéso Kiísito, mmbe ǎsoophi enda nɛsu. Kema bhubhui abei ka nyɔngɔ akɛ.
7 Cɔ, bakpa bɔbhu bána gǎkɛ uubha kodoni ndɔɔ. Buangbo báɛmbani gǎkɛ ianaga nyɔngɔ á nkumba ésomba. Měma abɔ kámɔtimbɛ. Báogea te, aobá́ nabái nyama á phɛa, měma abɔ aujukanande. 8 Cɔ, eea kásojusɛku mosa á Mokonga. Beoea nyama á phɛa, békéi, nna ajede. Nndɔ kásobhiimisɛku na Mokonga.
9 Oambani gǎkɛ gea te, bukpɛkpɛ nɛnu ka ea a kema bhui, kěgusɛ mɔnɔ bakpa nde beekea nɛbɔ kámɔtimbɛ. 10 Nga, aobá́ ka bɔ nakɔɔni, obɛ ambɔɔ, o na kɔbɔngɛ, nooeaga k'endu ésomba, měma akɛ kánteka tɔndɔ ka ea a nyama á ɔphɛɔ? 11 Mpɔ, nkpa ndɔ áokua ka měma, ka nyɔngɔ á kɔbɔngɛ nɛkɔ. Yɛ a ámbé Kiísito dánkui, nanga bii kámɔtimbɛ ka měma. 12 Aoba noongea dhakɔ ajede bende, ǔuja měma akɛ, ámbe oongeea phɔtɔ Kiísito ajede. 13 Ka bondɔ unge, aobá́ nenei nyama, nenensikisi dhani mbusa, netaande nyama bhui gea te, kengusɛ mɔnɔ dhani.