Ikani tɔ bíndɔ Mokonga dánɔɔphani
7
1 Cɔ, békpangɛni phɔ nyɔngɔ nde bomodunduima ka baobá nɛnu. Aoba nkpa nakákondi boa á nke, a tɔ anja. 2 Ka nyɔngɔ nde iɛbɛ andandi gǎkɛ, akeni moko ábɛ na nkakɛ sasa akɛ. Nke ábɛ phɔtɔ na munyakɛ sasa akɛ. 3 Akeni moko ádhondanisɛ na nkakɛ eka. Akeni phɔtɔ nke ádhondanisɛ na munyakɛ eka. 4 Nke nnaɔtɔka naunji nyama akɛ sasa akɛ. Nga, a ndiu á munyakɛ. Moko nna phɔtɔ ɔtɔka naunji nyama akɛ sasa akɛ. Nga, a ndiu á nkakɛ.5 Bókuumanɛ mɔnɔ sasa anu. Bo ye gǎkɛ ɔɔkana, bóoga k'aphe ɛ́mɛmi ka mbenɔ abhɔa. Mpɔ mbusa, bóodhondana. Nga, Sɛtáni kǎnodhemɛgɛmbɛ, ka nyɔngɔ nde, bókó na bukpɛkpɛ á amba a nyama anu. 6 Nesosi tɔndɔ nyɔngɔ ndɔ, nna gǎkɛ ɛɔphi. 7 Netókondi gea, bakpa bɔbhu bábɛ be'eme, kanga á boa á nke. Bakpa moci-moci bá gǎkɛ na bukpɛkpɛ bíndɔ Mokonga ěbophi, nanga ika kanga á boa á nke. Nga, bakpa moci-moci bá na bukpɛkpɛ nɛbɔ sasa abɔ.
8 Ka bundɔ bákusani, aobá́ nabáiki kanga á ɔmana be'eme Pɔ́lɔ, a tɔ anja. 9 Aoba nabánaɔtɔka amba á nyama abɔ, báɔmanɛ. Nga, akeni ɔmana, kanga étoboa á měma.
10 Ka bundɔ bɔɔmani, ɛɔphi a be: Nke kandeketɛ mɔnɔ munyakɛ. Nna gǎkɛ eme sasa ani a ámbé nɛyɔngi. Mɔkɔta Yéso ayɔngi phɔtɔ kau. 11 Aoba nke nantoki munyakɛ, kaɔmanɛ mɔnɔ. Akpangɛ phɔ ɔkana na munyakɛ. Moko kanyɛ mɔnɔ gǎkɛ nkakɛ.
12 Ka bakpa buangbo, eme a ámbé nɛɔyɔnga, nna Mɔkɔta Yéso. Negie, aobá́ moko na na nke, nke ka yɛ nǎna mbeeki, nakondi ika na munyakɛ, moko kanyɛ mɔnɔ. 13 Aoba nke na na moko, moko ka yɛ nǎna mbeeki, nakondi ika na nkakɛ, nke kanyɛ mɔnɔ. 14 Nga, ka moko mmbe nna mbeeki, a bhíbhí na Mokonga ka nyɔngɔ á ɔkana akɛ na nkakɛ. Ka nke mmbe nna mbeeki, a phɔtɔ bhíbhí na Mokonga ka nyɔngɔ á ɔkana akɛ na munyakɛ. Kabɛ nǎna bó, ámbe banabɔ bábande baniki ba ajede mosa á Mokonga. Bii a bó, baniki bá bhíbhí na Mokonga doni.
15 Aoba nkpa nǎna mbeeki, naye nkakɛ, áikɛ tɔ bó. ěɔphi nde nɛyɔngi, nna na bukpɛkpɛ gu á mbeeki, ka nyɔngɔ á keye ndɔɔ.
Mokonga ǎsɔɔphani gǎkɛ, bíikɛ ka bɔjɛjɛ. 16 Obɛ nke-mbeeki, kóosebea gea, onamisande munyakɔ? Obɛ moko-mbeeki, kó gǎkɛ osebea gea, onamisande nkakɔ? 17 Bii a bo, akeni nkpa áikɛ n'etete á enda nde Mokonga amophi, bii dámɔphani. ěɔphi nde a unge nebhisi ka kanisa bhubhui.
18 Aoba nkpa nagu ganja mosa, Mokonga nakámɔphanimbɛ, kasɔ̌mɛmbɛ ganja ndɔɔ. A gǎkɛ oba nakágu ganja mosa, Mokonga nakámɔphanimbɛ, kaguɛmbɛ ye ganja. 19 Gua á ganja, na ika kanga á gua a ganja, nna ye kema. Nnde ande kema, a tɔ beekea ɛ́ɔphi ndea Mokonga. 20 Nga, akeni nkpa áikɛ tɔ bíndɔ Mokonga amɔphani.
21 Mbenɔ nde Mɔkɔta Yéso dákɔɔphani, dótú nkɔbɛ? Cɔ, koianɛgɛmbɛ. Aoba nɔtɔki toka á ka kɔkɔbɛ, toka ye tɔ 22 Nkpa nde Mɔkɔta amɔphani, nna nkɔbɛ mosa akɛ. Nkpa nde nna nkɔbɛ, a ndiu nkɔbɛ ndea Mɔkɔta Yéso. 23 Mokonga ǎnosombi. Bókosikiɛ mɔnɔ ye mbusa, bóbɛ bakɔbɛ ndea bakpa. 24 Baya, akeni nkpa áikɛ mosa á Mokonga bíndɔ dáiki mosa, mbenɔ nde Mokonga dámɔphani.
25 Ka baseka na basimba, ké n'ɛɔphi ndea Mɔkɔta Yéso. Něnongodi tɔ nyɔngɔ nde a ka měma ani. Akeni bɔ́mɔɔkɛ bea ntɔa-doni, ka nyɔngɔ á ngomi nde Mɔkɔta Yéso amokui. 26 Ka nyɔngɔ á gbaga a matu nde, nnde a subi á měma ani a be: Akeni nkpa áikɛ tɔ bíndɔ aiki. 27 O na nke? Konyɛ mɔnɔ ye. Kó gǎkɛ na nke? Cɔ, konkabɛ mɔnɔ nke. 28 A gǎkɛ oba nombu nke, nna ajede. A gǎkɛ oba nseka naɔmani, nna phɔtɔ ajede. Bundɔ báɔmani ye, bátambagande ka enda nɛbɔ esa bhui. Ka bondɔ unge, nekondi nénobangisɛ na tambaga ndɔɔ.
29 Baya, nɛyɔngi be: Béké ye n'esa ási. Cɔ, kɛkɛ nde gǎkɛ, \ls bakpa nde bá na bake, báikɛ bea bakpa nde bána na bake, \ls 30 bundɔ báogama, báikɛ bea bundɔ bánaogama, \ls bundɔ bá na maseye, báikɛ bea bundɔ bána na maseye, \ls bundɔ báosomba kema, báikɛ bea bundɔ bána na kema, \ls 31 bundɔ báɔbhɛdaneaga nkumba á ka mokonda, bákasebeɛ mɔnɔu.
Nga, mokonda nde káiphiɛku.
32 Netókondi bóikɛ kanga á ianaga a nyɔngɔ á buiki anu. Nkpa nde káɔmani, aoianaga nyɔngɔ ndea Mɔkɔta Yéso, aokaba ékondisaga na Mɔkɔta. 33 Nkpa nde aɔmani, aoianaga nyɔngɔ á ka mokonda, aokaba ékondisaga na nkakɛ. 34 Oa, nyɔngɔ ibɛ aombota. A tɔ bo ka nseka na ka nke nabákáɔmanimbɛ. Báoianaga nyɔngɔ ndea Mɔkɔta Yéso. Báokaba gea, bábɛ bakpa nɛkɛ ka kema bhubhui nde báogea na ka nyɔngɔ bhubhui nde a ka měma abɔ. Nke nde aɔmani, a ndiu oianaga nyɔngɔ á ka mokonda, aokaba ékondisaga na munyakɛ.
35 Nyɔngɔ ndɔ nɛyɔngi ande k'anu. Nna ka imisia anu. Nekondi ndiu, bótambeɛ bíndɔ akeni gea te, bɔ́mbhɛdaneɛgɛ Mɔkɔta na měma mo.
36 Subi á baobá́ nɛnu, nyɔngɔ á moganda ndɔ nantɔmi nke a ungee. Moganda ndɔ aogea, bádeketanɛ ka nyɔngɔ á Mokonga. Aoba nande gea te, nnaɔtɔka něambi sasa akɛ, â phɔtɔ uubha te, angii nseka ndɔ ajede, oa, aobá́ moganda ndɔ nakondi yetɔ báɔmanɛ, cɔ, báɔmanɛ bíndɔ akondi. Kági ajede. 37 A gǎkɛ oba moganda nakondi ka měma akɛ deketa á nyɔngɔ á boa á nseka ndɔ, aobá́ na na bukpɛkpɛ á amba a nyama akɛ, cɔ, deketa nyɔngɔ éyamani, nna ajede. 38 Nkpa nde ambu nke á mbanje, agi anja. Mmbe adeketi nyɔngɔ á mbanje, agi phɔtɔ anja phɛ̂.
39 Nke aobá́ naɔmani, áikɛ tɔ na munyakɛ na ka bii moko ndɔ aga okua. A ye oba, munyakɛ naku, nakondi ɔmana, áɔmanɛ. Moko ndɔ ba a kɛkɛ, ábɛ tɔndɔ mbeeki ndea Mɔkɔta Yéso. 40 K'eme Pɔ́lɔ, aobá́ nke á kekusa naiki sasa akɛ, abande na maseye phɛ̂.
Nyɔngɔ nde a subi á měma ani a ungɔ. Eme phɔtɔ, ne na Měma á Mokonga.