Bɔ́kɔtɔnganɛmbɛ, bókodhemanɛgɛmbɛ
6
1 Aoba ka benu moti na na nyɔngɔ na dhakɛ moKiísito, kagɛmbɛ ne ka ntua á tena a nyɔngɔ ndea baPaganɔ. Agɛ ndiu ne mosa á bakpa ndea Mokonga. 2 Ai! Bókûubha gea, bakpa ndea Mokonga bátenaeka nyɔngɔ bhui nde á ka mokonda? Bii botenaekau, bókó na bukpɛkpɛ á tena a miki á nyɔngɔ? 3 Bókuubha gea te, betenaeka phɔtɔ nyɔngɔ ndea bamalaeka? Cɔ, kákeni bétenɛ phɔtɔ nyɔngɔ á ka mokonda ndee? 4 Cɔ, bii bo na nyɔngɔ á tenai, eke nde bobhisi nyɔngɔ ndɔ mosa á bateni-nyɔngɔ, bunde bána ye kema subi á kanisa? 5 Bókó na soni? Cɔ, bókó tanda na mɔngɛ moti, mmbe aɔtɔka nateni nyɔngɔ? Eya, a bó. Boku na soni! 6 Kɛkɛ nde gǎkɛ, moKiísito aɔtɔka nantɔngi dhakɛ moKiísito mosa á baPagánɔ?7 Bii bɔɔtɔngana ngungu anu, ande gea te, botu yetɔ. Obɛ, ntɔngi, kóophiphia mbhóma ka bo? Kô goto ophiphia odhemayɔ ka bo?
8 Benu badhemigi, boógeea badhanu baKiísito ajede ka bo? 9 Bókûubha geae, bakpa ba ajede bákangiɛku ka koboamɛ ndea Mokonga? Bókǒdhemɛ mɔnɔ sasa anu. Bakpa nde bákángiɛku ka koboamɛ ndea Mokonga bá ungee: \ls batɔ-íɛbɛ, \ls bakume \ls batɔ-ótungɔ, \ls boko bunde báoda na badhabɔ boko, \ls 10 bakukuba, \ls badhemigi, \ls batɔa-boita, \ls batɔ-ɛ́phɔti, \ls batɔa-njaga-njaga.
11 Cɔ, ka benu, buangbo dábatú tɔ bondɔ mosa. Mokonga ǎnosokosi ye gǎkɛ ka měma. Anɔsɔmbu gea te, bóbɛ bakpa nɛkɛ. Ateni yetɔ nyɔngɔ nɛnu anja k'ina á Mɔkɔta Yéso Kiísito na ka bukpɛkpɛ á Měma á Mokonga.
Ndokomisani Mokonga na nyama anu
12 Buangbo sɔsɔbɛ anu báogeae: «Be tɔ ogea kema bhubhui.» A bo! Nna gǎkɛ kema bhubhui unge a anja ka benu.
Boogea: «Be tɔ ogea kema bhubhui.» Kébɛku ye gǎkɛ nkɔbɛ á kema.
13 Bogi goto te: «Eea ka sɔphɔ, sɔphɔ k'eea. a » Mokonga aujande gǎkɛ kema ndɔ bhui. Nga, nyama á nkpa nna k'iɛbɛ. A ndiu ka bhɛdaneaga a Mɔkɔta, Mɔkɔta áoamba nyama ndɔɔ. 14 Nga, Mokonga dánjujukisi Mɔkɔta Yéso ka kukua na bukpɛkpɛ nɛkɛ. Asojujukisaeka phɔtɔ bondɔ.
15 Cɔ, bókóoúbha gea te, nyama anu ande gbutuka á nyama á Kiísito? Cɔ, akeni nɛ́bhɛdɛ phaeka a nyama akɛ, nédhondanisɛ goto na mosimba á nke? Aoboboa. 16 Bókûubha gea, nkpa nde adhondani na mosimba á nke, báoba na yɛ nkpa moti? Nga, bádundu subi á buku á Mokonga te: «Moko na nke, bábande nkpa mo.» b 17 Nkpa nde adhondani gǎkɛ na Mɔkɔta Yéso, bábande phɔtɔ na yɛ nkpa moti ka měma.